?Olsem Wanem Yumi Soemaot Se Yumi Tinghae Long Nem Blong Jehova?

1-2. ?Olsem wanem yumi save se Jisas i tinghae long nem blong Jehova?

JISAS i tinghae moa long nem blong Jehova i bitim eni narafala samting. Mo hem nao i leftemap nem blong Papa blong hem moa i bitim eni narafala man. Olsem we yumi luk long las stadi, Jisas i rere nomo blong ded from nem blong Jehova, mo blong pruvum se olgeta samting we Hem i mekem oli stret. (Mak 14:36; Hib. 10:​7-9) Mo afta we Jisas i rul blong wan taosen yia, bambae hem i glad nomo blong givimbak olgeta paoa we hem bin kasem i go long Jehova, blong nem blong Jehova nomo i stap tabu. (1 Kor. 15:​26-28) Ol samting we Jisas i mekem from nem blong Jehova, oli pruvum se hem i lavem tumas Papa blong hem.

² Jisas i kam long wol ya long nem blong Papa blong hem. (Jon 5:43; 12:13) Hem i mekem ol man blong hem oli save nem blong Papa blong hem. (Jon 17:​6, 26) Hem i stap tijim ol man mo i mekem ol merikel long nem blong Jehova. (Jon 10:25) Mo tu, long prea blong hem, hem i askem blong Jehova i lukaot gud long ol disaepol blong hem “from nem blong [Hem].” (Jon 17:11) Yes, yumi luk se Jisas i tinghae bigwan long nem blong Jehova. Taswe, ?i stret we wan man i talem se hem i stap folem Kraes, be hem i no save nem blong Jehova o yusum?

3. ?Bambae yumi tokbaot wanem long stadi ya?

³ Yumi ol Kristin we i stap traehad blong folem trak blong leg blong Jisas, yumi tinghae tu long nem blong Jehova. (1 Pita 2:21) Long stadi ya, bambae yumi luk from wanem Jehova i givim nem blong hem long ol man we oli stap talemaot “gud nius ya blong Kingdom.” (Mat. 24:14) Mo tu, bambae yumi tokbaot olsem wanem yumi wanwan i save soemaot se yumi tinghae long nem blong Jehova.

“OL MAN WE OLI KAREM NEM BLONG HEM”

4. (1) Bifo we Jisas i go long heven, ?hem i talem wanem long ol disaepol blong hem? (2) ?Wanem kwestin we bambae yumi tokbaot?

⁴ Bifo we Jisas i go long heven, hem i talem long ol disaepol blong hem se: “Taem tabu spirit i kam long yufala, bambae yufala i gat paoa nao yufala i witnes blong mi long Jerusalem, mo long olgeta ples long Judia mo Sameria, gogo yufala i kasem olgeta ples long wol.” (Wok 1:8) Yes, ol man bambae oli talemaot gud nius long Isrel mo long ol narafala ples tu. Sloslo, ol man blong olgeta nesen bambae oli gat janis blong kam ol disaepol blong Jisas. (Mat. 28:​19, 20) Be Jisas i talem se: “Yufala i witnes blong mi.” ?Hemia i min se ol niufala disaepol ya bambae oli witnes blong Jisas nomo, o oli mas save nem blong Jehova mo oli witnes blong hem tu? Ol samting we Ol Wok japta 15 i tokbaot, bambae oli halpem yumi blong faenem ansa blong kwestin ya.

5. ?Olsem wanem ol aposol mo ol elda long Jerusalem oli soemaot se ol man oli mas save nem blong Jehova? (Mo tu, yu luk pija.)

⁵ Long yia 49 K.T., ol aposol mo ol elda long Jerusalem oli joen wanples, blong tokbaot sipos ol man we oli no man Jiu oli mas sakomsaes blong kam wan Kristin o nogat. Long en blong storian ya, Jemes we i haf brata blong Jisas i talem se: “[Pita] i talemaot gud finis olsem wanem God i lukluk i go long ol man blong ol nesen, blong hem i tekemaot sam long olgeta blong oli karem nem blong hem.” ?Jemes i stap tokbaot nem blong hu? Hem i gohed i talem bakegen ol tok blong profet Amos, i se: “Blong mekem se ol man we oli stap yet, wetem ol man blong olgeta nesen, yes ol man we oli holem nem blong mi, oli save lukaot Jehova. Hemia tok blong Jehova.” (Wok 15:​14-18) Ol niufala disaepol ya bambae oli save Jehova, be tu bambae oli ‘holem nem blong hem.’ Hemia i min se bambae oli karem nem blong God mo ol man bambae oli luksave samting ya.

6-7. (1) ?From wanem Jisas i kam long wol? (2) ?Wanem narafala impoten risen we Jisas i kam from?

⁶ Nem blong Jisas i minim “Jehova i Sevem Man,” mo Jehova i yusum hem blong sevem olgeta man we oli soemaot se oli bilif long Hem mo Boe blong hem. Jisas i kam long wol blong givim laef blong hem from ol man. (Mat. 20:28) Tru long ransom we hem i givim, Jehova i save fogivim sin blong ol man mo oli save gat janis ya blong kasem laef olwe.—Jon 3:16.

⁷ ?Be from wanem ol man oli nidim ransom? Hemia from samting we i bin hapen long garen blong Iden. Olsem we yumi bin tokbaot long las stadi, faswan perens blong yumi, Adam mo Iv, tufala i rebel agensem Jehova mo tufala i lusum janis ya blong laef olwe. (Jen. 3:​6, 24) Be Jisas i no kam blong sevem ol man nomo, hem i kam blong mekem wan narafala samting tu we i moa impoten. Setan i talem plante giaman tok blong spolem nem Jehova. (Jen. 3:​4, 5) Taswe, ol samting we Jisas i mekem blong sevem ol pikinini we oli kamaot biaen long Adam mo Iv, i blong mekem tu se nem blong Jehova i stap tabu. Mo from we Jisas i stap mekem ol samting long bihaf blong Jehova mo i karem nem blong hem, hem nomo i beswan man we i save mekem nem blong Jehova i stap tabu.

8. ?Evri man we oli bilif long Jisas oli mas luksave wanem?

⁸ Evri man we oli soemaot se oli bilif long Jisas, we hemia i minim ol man Jiu mo ol man blong narafala nesen, oli mas save se Papa blong Jisas, Jehova God, hem nao i mekem rod blong sevem olgeta. (Jon 17:3) Olsem Jisas, oli mas luksave se oli karem nem blong Jehova. Mo tu, oli mas luksave se i impoten we oli mekem nem ya i stap tabu, from we hemia samting we bambae i mekem Jehova i glad mo oli save kasem laef olwe. (Wok 2:​21, 22) Taswe, evri man we oli folem Jisas oli mas save Jehova sem mak olsem we oli save Jisas. Hemia nao from wanem long en blong prea blong Jisas long Jon japta 17, hem i talem se: “Mi mi mekem olgeta oli save nem blong yu, mo bambae mi mekem olgeta man oli save nem ya, blong bambae oli lavem ol narafala man olsem we yu yu lavem mi, nao mi mi save joen long olgeta.”—Jon 17:26.

“YUFALA I WITNES BLONG MI”

9. ?Yumi soemaot olsem wanem se nem blong Jehova i impoten tumas long yumi?

⁹ Folem ol samting we yumi tokbaot, i klia se ol man we oli folem Jisas, oli mas mekem nem blong Jehova i stap tabu. (Mat. 6:​9, 10) Oli mas tingbaot se nem blong Jehova i impoten moa i bitim eni narafala nem. Mo oli mas soemaot samting ya tu long ol aksen blong olgeta. ?Be olsem wanem yumi save mekem nem blong Jehova i stap tabu, mo pruvum se ol samting we Setan i talem long saed blong Jehova oli giaman?

10. ?Aesea japta 42 kasem 44 i tokbaot wanem? (Aesea 43:9; 44:​7-9) (Mo tu, yu luk pija.)

¹⁰ Aesea japta 42 kasem 44 i tokbaot impoten samting we yumi mas mekem blong nem long Jehova i stap tabu. Long ol japta ya, Jehova i askem ol man we oli no wosipim hem blong oli traem pruvum se god blong olgeta i tru o nogat. Mo olsem long wan kot kes, hem i askem sipos i gat eni witnes we i save pruvum samting ya. !Be i no gat wan long olgeta we i naf blong pruvum se god blong hem i tru!—Ridim Aesea 43:9; 44:​7-9.

11. Long Aesea 43:​10-12, ?Jehova i talem wanem long ol man blong hem?

¹¹ Ridim Aesea 43:​10-12. Jehova i talem long ol man blong hem se: “Yufala nao i witnes blong mi, mo mi nao mi God.” Mo Jehova i askem long olgeta blong ansa long kwestin ya: “?I gat wan moa God, no mi nomo?” (Aes. 44:8) Tede, yumi gat janis blong ansa long kwestin ya. Tru long ol toktok mo aksen blong yumi, yumi soemaot se Jehova nomo i tru God. Nem blong hem i hae moa i bitim eni narafala nem. Mo yumi pruvum se yumi lavem Jehova mo yumi holemstrong long hem long olgeta samting long laef blong yumi, nomata wanem samting we Setan i mekem blong traem stopem yumi. Taem yumi mekem olsem, yumi stap givhan blong mekem nem blong Jehova i stap tabu.

12. ?Olsem wanem profet tok ya long Aesea 40:​3, 5 i kamtru?

¹² Taem yumi difendem nem blong Jehova, yumi stap folem fasin blong Jisas Kraes. Aesea i talem tu se wan man bambae i “kliarem [o “mekemrere,” fut.] rod blong Jehova.” (Aes. 40:3) ?Olsem wanem tok ya i kamtru? Jon Baptaes i mekemrere rod blong Jisas, we i kam long nem blong Jehova mo i toktok long bihaf blong Jehova. (Mat. 3:3; Mak 1:​2-4; Luk 3:​3-6) Semfala profet tok ya i talem se: “Jehova bambae i soemaot glori blong hem.” (Aes. 40:5) ?Hem i mekem samting ya olsem wanem? Taem Jisas i kam long wol, hem i mekem ol samting long bihaf blong Jehova. Taswe, hemia i olsem we Jehova hem wan i kam long wol.—Jon 12:45.

13. ?Yumi save mekem wanem blong folem fasin blong Jisas?

¹³ Olsem Jisas, yumi tu yumi witnes blong Jehova. Yumi karem nem blong hem mo yumi talemaot long evriwan ol gudfala samting we hem i mekem. Be i no hemia nomo, yumi mas talemaot impoten samting tu we Jisas i mekem blong mekem nem blong Jehova i stap tabu. (Wok 1:8) Jisas nao i beswan man blong tijim ol man long saed blong Jehova, mo yumi mas mekem olsem hem. (Rev. 1:5) ?Be yumi save mekem wanem moa blong soemaot se yumi tinghae long nem blong Jehova?

SAM NARAFALA ROD BLONG SOEMAOT SE YUMI TINGHAE LONG NEM BLONG JEHOVA

14. Folem Ol Sam 105:​3, ?wanem tingting we yumi mas gat long nem blong Jehova?

¹⁴ Yumi praod from nem blong hem. (Ridim Ol Sam 105:3.) Jehova i glad tumas taem yumi tok flas from nem blong hem. (Jer. 9:​23, 24; 1 Kor. 1:31; 2 Kor. 10:17) Tok ya “tok flas from Jehova” i min se yumi praod se Jehova i God blong yumi. Yumi tingbaot se hemia wan nambawan janis we yumi gat blong ona long nem blong hem mo difendem nem ya. !Yumi no mas sem blong talemaot long ol fren blong yumi long wok, long skul, long ol neba blong yumi, mo long ol narafala, se yumi ol Witnes blong Jehova! Devel Setan i wantem stopem yumi blong tokbaot nem blong Jehova long ol narafala. (Jer. 11:21; Rev. 12:17) Mo tu, Setan mo ol giaman profet blong hem, oli wantem mekem ol man oli fogetem nem blong Jehova. (Jer. 23:​26, 27) Be from we yumi lavem nem blong Jehova, yumi wantem tumas blong presem nem ya “fuldei.”—Sam 5:11; 89:16.

15. ?I minim wanem blong singaot long nem blong Jehova?

¹⁵ Yumi gohed blong singaot long nem blong Jehova. (Joel 2:32; Rom 10:​13, 14) Singaot long nem blong Jehova i no minim nomo se yumi save prapa nem blong God mo yusum. Yumi mas savegud God, trastem hem, mo lukluk i go long hem blong i halpem yumi mo lidim yumi. (Sam 20:7; 99:6; 116:4; 145:18) Mo tu, yumi talemaot nem blong hem mo ol gudfala fasin blong hem long ol narafala, mo yumi givhan long olgeta blong oli jenisim fasin blong olgeta, blong Jehova i save glad long olgeta mo sevem olgeta.—Aes. 12:4; Wok 2:​21, 38.

16. ?Olsem wanem yumi save pruvum se Setan i wan man blong giaman?

¹⁶ Yumi rere nomo blong safa from nem blong Jehova. (Jem. 5:​10, 11) Taem yumi gohed blong holemstrong long Jehova nomata se yumi stap safa, yumi pruvum se Setan i wan man blong giaman. Long taem blong Job, Setan i tokbaot ol man we oli wosipim hem se: “Bambae man i lego evri samting we hem i gat blong sevem laef blong hem.” (Job 2:4) Setan i talem se ol man bambae oli wosipim Jehova nomo taem evri samting i go gud, mo sipos oli fesem hadtaem, bambae oli lego Jehova. Be gudfala man ya Job i pruvum se tok ya i giaman. Yumi tu, yumi gat janis ya blong pruvum se nomata wanem samting we Setan i mekem long yumi, bambae yumi neva tanem baksaed long Jehova. Yumi save sua fulwan se Jehova bambae i gohed blong lukaot gud long yumi from nem blong hem.—Jon 17:11.

17. Folem 1 Pita 2:​12, ?yumi save mekem wanem moa blong leftemap nem blong Jehova?

¹⁷ Yumi soemaot se yumi respektem nem blong Jehova. (Prov. 30:9; Jer. 7:​8-11) Ol man oli save se yumi ol Witnes blong Jehova. Taswe, ol samting we yumi mekem oli save leftemap nem blong Jehova, o daonem nem blong hem. (Ridim 1 Pita 2:12.) From samting ya, yumi wantem mekem evri samting we yumi naf blong mekem, blong presem nem blong Jehova. Mo yumi mekem olsem tru long ol toktok mo fasin blong yumi. Long rod ya, bambae yumi gohed blong presem nem blong Jehova nating se yumi sinman.

18. ?Wanem narafala samting we yumi save mekem blong soemaot se yumi tinghae long nem blong Jehova? (Mo tu, yu luk futnot.)

¹⁸ Yumi tingbaot nem blong Jehova moa i bitim nem blong yumi wan. (Sam 138:2) ?From wanem hemia i impoten? Taem yumi mekem ol samting we Jehova i glad long hem, plante man bambae oli no laekem yumi mo oli save talem ol samting we i spolem nem blong yumi.a Jisas i rere nomo blong ded olsem wan kriminol blong hem i save leftemap nem blong Jehova. Hem i “no sem nating” from ol trabol ya we oli kasem hem, o wari from tingting we ol narafala oli save gat long hem. (Hib. 12:​2-4) Be hem i tingbaot nomo blong mekem samting we God i wantem.—Mat. 26:39.

19. ?Wanem tingting we yu gat long nem blong Jehova, mo from wanem?

¹⁹ Yumi praod from nem blong Jehova, mo i wan bigfala ona blong karem nem ya ol Witnes blong Jehova. From samting ya, bambae yumi gohed nomo blong presem Jehova, nating se ol man oli talem ol tok blong spolem nem blong yumi. Nem blong Jehova i moa impoten i bitim nem blong yumi wan. Taswe, i gud yumi gat strong tingting blong gohed blong presem nem blong Jehova, nomata wanem samting we Setan i mekem blong spolem yumi. Long rod ya, bambae yumi pruvum se yumi tinghae moa long nem blong Jehova, sem mak olsem we Jisas Kraes i tinghae long nem ya.