No Letem Fasin Kros i Mekem Yu Yu Foldaon

“!PULUM win fastaem!” “!No hareap!” “!Tingting fastaem!” ?Yu yu harem ol tok ya finis? Maet yu bin talem ol tok ya long yu wan blong blokem wan strong filing we i stap insaed long yu. Samfala man, taem oli kros, oli aot, oli go wokbaot. Oli mekem olsem blong no faerap long kros. Hemia sam isi rod blong bos long fasin kros mo blong holemtaet fasin fren blong yumi wetem ol narafala.

Be long ol yia we oli jes pas, ol man blong givim advaes oli gat ol defren tingting long saed ya. Samfala, oli taem se i stret blong bos long fasin kros, be sam narafala, oli talem se yumi mas winim fasin ya. Samting ya i mekem se tingting blong ol man i fasfas. Eksampel, sam man blong stadi long tingting blong man oli sapotem tingting ya se yu mas letem kros i kamaot sipos yu ting se “fasin ya bambae i mekem yu yu harem gud moa.” Sam narafala oli givim woning se fasin blong faerap oltaem long kros “i gat moa paoa blong kilim man i ded, i bitim tabak, hae blad presa, mo tumas gris long blad (kolestrol).” Tok blong God i talem klia se: “I nogud yu kros, i nogud yu faerap, i nogud yu wari. Ol samting ya i rod blong kasem trabol nomo.” (Ol Sam 37:8) ?From wanem Baebol i givim klia advaes olsem?

Sipos yumi no bos long filing blong yumi, yumi no save bos long fasin blong yumi tu. Wanem we i hapen long stat blong histri blong man i pruvum samting ya. Yumi ridim se: “Nao Ken i kros tumas, mo fes blong hem i kam nogud.” ?Fasin kros i lidim Ken blong mekem wanem? Fasin ya i holemtaet hem mo i bos long hem, nao hat blong hem i kam strong, mekem se hem i no save lesin long woning blong Jeova blong winim fasin nogud ya. Ken i no bos long fasin kros, nao hem i mekem bigfala sin​—i kilim brata blong hem i ded.​—Jenesis 4:​3-8.

Sem samting i hapen long Sol, we i faswan king blong Isrel. Sol i kros tumas taem hem i harem se ol woman Isrel oli stap presem Deved moa, i winim hem. “Taem oli stap danis, oli stap singsing se, ‘King Sol i kilim plante taosen man, be Deved i kilim plante plante taosen moa, winim hem.’ Nao king i kros tumas, hem i no wantem olgeta oli singsing olsem.” Fasin kros i lidim tingting blong Sol, nao hem i traem plante taem blong kilim Deved i ded. Deved i traehad blong frengud bakegen wetem Sol, be Sol i no wantem mekem pis wetem hem blong tufala i frengud bakegen. From samting ya, Jeova i no moa glad long Sol.​—1 Samuel 18:​6-​11; 19:​9, 10; 24:​1-​21; Ol Proveb 6:​34, 35.

Taswe, taem wan man no woman i no bos long fasin kros, bambae hem i mekem, no i talem ol samting we i spolem narafala. (Ol Proveb 29:22) Ken mo Sol, tufala i kros from we wanwan long tufala i gat fasin jalus mo nogud tingting. Be, man i save kros from plante defren risen. Samtaem, man i kros from we narafala i tok agens long hem, i tok nogud, i gat rong tingting, mo i mekem nogud long hem.

Eksampel blong Ken mo Sol i soem se tufala tugeta i gat wan bigfala problem. I klia we presen we Ken i givim, i no kamaot from bilif blong hem. (Hibrus 11:4) Sol i no obei long oda blong Jeova, mo i traem blong mekem eskius blong soem se hem i stret. From samting ya, God i no moa glad long hem mo i tekemaot tabu spirit long hem. I klia se Ken mo Sol, tufala i spolem fasin fren blong tufala wetem Jeova.

Traem skelem tufala ya wetem Deved. Deved i gat risen blong kros from samting we Sol i mekem long hem, be hem i bos long tingting blong hem. ?From wanem? Hem i talem se: “Prea blong mi we Hae God bambae i blokem mi oltaem, blong mi no mekem wan trabol long king blong yumi, we Hae God i jusumaot. Mi no mas mekem wan samting nating long hem we i nogud, from we Hae God nomo i jusumaot hem.” Deved i tingbaot fasin fren we hem i gat wetem Jeova, mo samting ya i gat paoa long fasin we hem i soem long Sol. Ale, hem i mekem tingting blong hem i stap daon, mo i letem evri samting i stap long han blong Jeova.​—1 Samuel 24:​6, 15.

Tru ya, ol nogud frut oli save kamaot sipos man i no bos long fasin kros. Pol i givim woning se: “Sipos yufala i kros, yufala i no letem we kros ya i lidim yufala, blong yufala i mekem sin.” (Efesas 4:​26) Nating se samtaem, i stret blong kros, be i gat denja oltaem se fasin ya i save mekem yumi foldaon. From samting ya, yumi no sapraes se i hadwok blong bos long fasin kros. ?Olsem wanem blong bos long fasin ya?

Faswan samting i blong wokem wan strongfala fasin fren wetem Jeova. Hem i stap askem long yu blong talemaot hat mo tingting blong yu long hem. I gud we yu talemaot long hem ol samting we yu kea long olgeta mo ol wari blong yu. Askem hem blong givim wan hat long yu, we i kwaet, blong yu save winim fasin kros. (Ol Proveb 14:30) Yu save sua se, “Hae God i stap lukluk long ol stret man, mo i stap lesin blong harem ol prea blong olgeta.”​—1 Pita 3:​12.

Prea i save putum yu long stret rod mo i save lidim yu. ?Olsem wanem prea i save mekem samting ya? Hem i save gat bigfala paoa long fasin we yu mekem long ol narafala. Rimemba ol fasin we Jeova i stap mekem long yu. Baebol i talem se Jeova “i no save panisim yumi stret long mak blong ol sin blong yumi.” (Ol Sam 103:10) I impoten tumas blong gat fasin fogif, olsem nao, bambae “Setan i no save winim yu.” (2 Korin 2:​10, 11, NW) Mo tu, prea i openem rod blong tabu spirit blong lidim hat blong yu, nao yu save winim ol fasin we oli stap dip insaed long yu. Jeova i glad blong givim ‘pis we i bigfala moa, i bitim save blong yumi.’ Pis ya i save tekemaot yu long fasin kros we i stap holemtaet yu.​—Filipae 4:7.

Be taem yu prea finis, yu mas stadi oltaem long Baebol blong ‘save olgeta samting we Masta blong yumi i wantem yumi blong mekem.’ (Efesas 5:​17; Jemes 3:​17) Sipos yu faenem se i hadwok blong bos long fasin kros, traem save tingting blong Jeova long saed ya. Lukluk bakegen ol vas we oli tokbaot fasin blong bos long kros.

Aposol Pol i mekem yumi tingtingbak long impoten poen ya: “Yumi mas mekem i gud long olgeta man. Antap moa, yumi mas mekem olsem long olgeta ya we oli brata mo sista blong yumi from we olgeta tu oli bilif long Kraes.” (Galesia 6:​10) Traehad blong tingbaot mo mekem ol samting we i blong givhan long ol narafala. Ol gudfala samting ya bambae i mekem se yu gat sore mo trastem narafala. Nao, bambae samting ya i blokem ol rong tingting we i save mekem fasin kros i kamaot.

Man blong raetem Ol Sam i talem se: “Plis yu lukaot gud long mi blong mi no foldaon long sin. Plis yu holem promes blong yu, yu no letem rabis fasin i winim mi. Olgeta we oli laekem Loa blong yu oli stap gud oltaem nomo, i no gat wan samting we i save mekem olgeta oli foldaon.” (Ol Sam 119:133, 165) Samting ya i tru long saed blong yu tu.

[Bokis/Foto blong pija long pej 9]

OL STEP BLONG BOS LONG FASIN KROS

□ Prea long Jeova.​—Ol Sam 145:18.

□ Stadi long Baebol evridei.—Ol Sam 119:133, 165.

□ Bisi long ol gudfala wok.—Galesia 6:​9, 10.