Baebol i Talem Wanem . . .

?From Wanem Yumi Mas Bos Long Fasin Kros?

LONG stat blong mared nomo, i klia se bigfala trabol bambae i kamaot bitwin long tufala. John i tok strong long waef blong hem Ginger,a we tufala i jes mared, i se: “Naoia we mi mi bos blong haos ya, bambae yu yu no moa let blong evri samting mo mekem mi mi sem from.” Hem i givim oda long woman blong hem blong sidaon mo no muf nating, nao hem i gohed blong tok strong long hem blong 45 menet. Ol tok nogud i kam wan haf blong mared blong tufala ya. Sore tumas, fasin kros blong John i kam nogud moa. Ale, hem i stat satem strong ol doa, kilkilim tebel long kijin wetem han blong hem, mo kilkilim stia blong trak taem hem i draev long krangke fasin we i mekem denja long laef blong ol narafala man.

Sore tumas, samting ya i stap kamaot bakegen mo bakegen long plante mared, olsem yu yu save finis. ?Man ya i gat gudfala risen blong kam kros, no hem i lusum hed blong hem nomo we i no moa bos long ol fasin blong hem? ?Fasin kros i rong oltaem? ?Wetaem nao yumi save talem se man i no moa bos long fasin kros? ?Wetaem nao hem i bitim mak?

Maet wan man i gat gudfala risen blong kam kros long fasin we i no bitim mak. Eksampel, God i kros tumas long tufala rabis taon ya bifo, Sodom mo Gomora. (Jenesis 19:24) ?From wanem? From we ol man long tufala taon ya oli stap mekem ol raf mo doti fasin long saed blong seks, mo ol man raonabaot oli savegud long ol samting ya. Tingbaot taem we sam enjel oli kam luk stret man ya Lot, nao wan grup blong ol yangfala man mo ol olfala man oli traem fosem ol enjel ya blong slip wetem olgeta. Jeova God i gat gudfala risen blong kam kros from rabis fasin ya long saed blong seks we i bitim mak.—Jenesis 18:20; 19:4, 5, 9.

I gat sam taem we Jisas Kraes tu, we hem i stretgud olgeta, i gat gudfala risen blong kros, olsem Papa blong hem. Long taem ya, haos prea long Jerusalem i olsem stampa ples blong wosip blong ol man blong God. Haos ya i mas stap olsem wan “Haos blong prea,” we ol man wanwan oli save kam long hem blong givim ol sakrifaes mo presen oli go long God, mo wan ples we oli save kasem tijing blong God mo askem fogif blong ol sin blong olgeta. Long haos prea ya, i olsem we oli save toktok wetem Jeova. Be, ol lida blong skul long taem blong Jisas, oli mekem haos prea ya i kam “olsem ples blong maket” mo “ples blong haed blong ol man blong stil.” (Matyu 21:12, 13; Jon 2:14-17) Olgeta ya oli stap wingud from ol anamol we oli salem long ol man, blong oli mekem sakrifaes. Tru ya, oli stap stilim mane blong ol man ya. Taswe, Pikinini blong God i gat raet blong ronemaot ol man ya blong stil long haos blong Papa blong hem. !Jisas i gat gudfala risen blong kam kros!

Taem Ol Man We Oli No Stretgud Olgeta Oli Kam Kros

Sam samtaem, ol man we oli no stretgud olgeta tu, oli gat gudfala risen blong kam kros. Tingbaot samting we i hapen long Moses. Wan merikel i jes bin kamaot blong mekem ol man Isrel oli fri long fasin slef long Ijip. Jeova i jes bin soemaot long bigfala fasin se hem i gat moa paoa i bitim ol gyaman god blong Ijip, taem hem i sanem ten trabol i go long ol man Ijip. Biaen, hem i mekem wora blong Red Si i seraot long tu haf, blong mekem rod blong ol man Isrel ya oli save ronwe. Biaen long samting ya bakegen, God i lidim olgeta oli go kolosap long Hil blong Sinae. Long ples ya, oli kam wan nesen. Moses i kam olsem man blong tekem olgeta oli go long God. Taswe, hem i go antap long hil ya nao God i givim ol loa long hem. Jeova i givim plante loa long hem, wetem Ten Komanmen we “fingga blong God” i raetem olgeta long ol ston we Hem wan i katemaot long hil ya. Be, taem Moses i godaon long hil ya bakegen, ?hem i luk wanem samting? !Ol man oli stap wosipim wan aedol blong wan pikinini buluk we oli wokem long gol! !Oli fogetem kwiktaem tumas ol samting we Jeova i bin mekem long olgeta sam wik bifo nomo! Taswe, i stret nomo we Moses i “kros we i kros.” Ale, hem i smasem ol ston ya, mo hem i spolem aedol blong pikinini buluk we oli stap wosipim hem.—Eksodas 31:18; 32:16, 19, 20.

Long wan narafala taem bakegen, Moses i kam kros tumas taem ol man oli toktok smol from oli no gat naf wora. Moses i harem nogud tumas, mo blong smoltaem, hem i lusum tingting daon mo kwaet fasin, ol fasin we Baebol i talem se Moses i strong long olgeta. Ale samting ya i lidim hem blong mekem wan bigfala mastik. Hem i no leftemap Jeova olsem Man we i Givim Ol Samting long Isrel, be hem i tok nogud long ol man mo i leftemap hem wan mo brata blong hem Eron. Taswe, God i luk se hem i mas stretem Moses. Ale, hem i no letem Moses i go insaed long kantri we hem i bin promes blong givim long ol man Isrel. Afta long samting ya we i hapen long Meriba, Baebol i no moa talem se Moses i kam kros. Ating hem i lanem wan bigfala lesen long taem ya.—Namba 20:1-12; Dutronome 34:4; Ol Sam 106:32, 33.

Ale, Jeova i defren long ol man long saed blong fasin ya. Hem i save ‘bos long kros blong hem.’ Mo Baebol i stret, taem hem i talem se God i “no save kros kwik.” Hemia i kamaot from we lav nao i stampa fasin blong hem, i no fasin kros. Oltaem hem i soemaot kros blong hem long fasin we i stret, oltaem i gat gudfala risen blong kam kros, mo oltaem i bos long fasin kros blong hem. (Eksodas 34:6; Aesea 48:9; 1 Jon 4:8) Taem Jisas Kraes i stap long wol ya olsem wan man we i stretgud olgeta, hem tu i bos oltaem long fasin kros blong hem. Baebol i talem se hem i “wan kwaet man.” (Matyu 11:29) Be, ol man we oli no stretgud olgeta, oli faenem i hadwok blong bos long fasin kros, nating se oli gat strong bilif olsem Moses.

Mo tu, kolosap oltaem, ol man oli no tingtinggud long frut blong fasin kros we oli no bos long hem. I save gat bigfala trabol i kamaot taem wan man i kros bitim mak. Eksampel, ?wanem trabol bambae i kamaot sipos wan hasban i kros bitim mak long woman blong hem, nao i kilim wol blong haos mo mekem wan hol long hem? I klia se hem i spolem wol. Maet hem i kasem kil long han blong hem tu. Be antap long samting ya, ?nogud fasin ya bambae i mekem wanem long lav mo respek we waef blong hem i mas gat long hem? Hem i save fiksimap wol long wan no tu dei, mo han blong hem i save kamgud afta sam wik. ?Be bambae i tekem hamas taem blong woman blong hem i trastem mo respektem hem bakegen?

Baebol i fulap long ol store blong ol man we oli no bos long fasin kros mo we oli kasem nogud frut from. Tingbaot sam long olgeta. God i ronemaot Ken i go farawe afta we hem i kilim brata blong hem Ebel i ded. Papa blong Simeon mo Livae i putum wan panis long tufala afta we tufala i kilim i ded ol man blong Sekem. Jeova i kilim Usaea wetem sik ya leprosi afta we hem i kam kros tumas long ol pris we oli stap traem blong stretem hem. Taem Jona i “kam kros bitim mak” Jeova i stretem hem. Olgeta man ya evriwan oli gat fol long fored blong Jeova from fasin kros blong olgeta.—Jenesis 4:5, 8-16; 34:25-30; 49:5-7; 2 Kronikel 26:19; Jona 4:1-11.

Ol Kristin Oli Mas Talemaot Ol Fasin Blong Olgeta

Sem mak nao, ol Kristin tede oli mas talemaot ol fasin blong olgeta long God, mo samtaem long ol Kristin brata blong olgeta tu. Yumi luksave samting ya from Grik tok we Baebol i yusum blong minim kros. Wan long tufala tok ya we Baebol i yusum moa long saed ya, hemia or·geʹ. Kolosap oltaem oli tanem tok ya i kam “kros,” mo i karem tingting se man i save se hem i kros mo i minim blong kam kros, mo plante taem hemia from we i wantem givimbak long narafala man. Taswe, Pol i talem long ol Kristin long Rom se: “Sipos wan man i mekem trabol long yufala, bambae yufala i no traem blong mekem trabol long hem bakegen. Yufala i mas livim i stap, mo no kam kros [or·geʹ]. From we Baebol i talem se ‘Hae God i talem se “Fasin ya blong givimbak long man we i mekem i nogud, mi nomo mi gat raet blong mekem. Mo mi bambae mi givimbak long olgeta.” ’ ” I moagud blong ‘holemstrong ol stret fasin blong winim ol nogud fasin,’ i bitim we yumi stap harem nogud oltaem long brata blong yumi.—Rom 12:19, 21.

Narafala tok we Baebol i yusum plante taem, hemia thy·mosʹ. Hem i kamaot long wan tok we “i minim win, wora, graon, anamol, no man we i muvmuf kwik blong mekem raf fasin.” Taswe, samtaem tok ya i minim “man we i faerap wantaem agensem narafala,” “faerap long kros,” no “ol filing we oli no stap kwaet, oli mekem tingting i no kwaet, mo oli mekem faet mo wari i kamaot insaed long famle mo bitwin long ol man.” Wan man no woman we i no bos long fasin kros, i olsem wan volkeno we i save bosta enitaem mo sakem hot ases, ston, mo wora olbaot. Hem i save givim kil, spolem bodi, mo kilim man i ded. Wan tok we i kamaot long thy·mosʹ mo we oli yusum blong tokbaot plante samting wantaem, i stap long Galesia 5:20. Long ples ya, Pol i talem se “kros” i wan long ‘ol rabis samting we tingting blong man nomo i wantem’ (vas 19). Sam narafala fasin olsem, hemia, mekem nogud wetem woman, mekem ol samting blong sem, mo drong. Tru ya, fasin blong John, we yumi tokbaot fastaem finis, i stret long fasin “kros” ya.

From samting ya, ?Kristin kongregesenb i mas gat wanem tingting long saed blong eni man blong hem we i stap mekem raf fasin no spolem ol samting blong narafala man? Kros we man i no bos long hem i save spolem hem mo i save lidim hem blong kilim narafala man. Taswe, Jisas i talem se: “Mi mi talem long yufala, se ‘Man we i kros long brata blong hem, i stret blong hem i pas long kot.’ ” (Matyu 5:21, 22) Baebol i givim advaes long ol hasban se: ‘Yufala i mas laekem tumas ol woman blong yufala, yufala i no mas kros bigwan long olgeta.’ Man ‘we i kros kwik’ i no naf blong kam wan man blong lukaot long kongregesen. Taswe, kongregesen i no tingbaot wan man we i no save bos long fasin kros olsem wan eksampel blong gudfala fasin. (Kolosi 3:19; Taetas 1:7; 1 Timote 2:8) Mo tu, afta we ol elda long kongregesen oli lukluk long tingting mo fasin blong wan man we i no save bos long fasin kros, mo long bigfala trabol we hem i mekem long laef blong narafala, maet oli putumaot hem long kongregesen. Hemia wan nogud frut tru.

?Olsem wanem long John we yumi tokbaot fastaem finis? ?Hem i lanem blong bos long fasin kros? ?Hem i naf blong stopem nogud fasin ya we i stap lidim hem kwiktaem blong kasem bigfala trabol? Sore tumas, fasin blong hem blong tok strong mo singaot bigwan i kam moa nogud gogo, hem i stat pusum mo mekem i raf long waef blong hem. Fasin blong poenem fingga blong hem i kam fasin blong stikim woman blong hem wetem fingga ya, we i mekem skin blong woman i soa mo i blu. John i lukaotgud blong no putum mak long bodi blong waef blong hem we ol man oli save luk, from we hem i wantem haedem nogud fasin ya blong hem. Be biaen, hem i stat blong kikim mo kilim woman blong hem, pulum hea blong hem, mo mekem ol samting we oli moa nogud. Naoia, Ginger i no moa stap wetem John.

Samting ya i no nid blong kamaot. Plante man oli bin winim problem ya we oli no save bos long fasin kros. Taswe, i impoten tumas blong folem eksampel blong Jisas Kraes we i stretgud olgeta. Hem i neva kam kros tumas we i no save bos long hem. Oltaem hem i soemaot kros blong hem long fasin we i stret. Hem i neva bitim mak. Pol i givim sam waes advaes long yumi evriwan, i se: “Sipos yufala i kros, yufala i no letem we kros ya i lidim yufala, blong yufala i mekem ol sin. Yufala i mas no stap kros, gogo kasem san i godaon.” (Efesas 4:26) I gud we yumi gat tingting daon, yumi luksave se yumi man nomo, mo se yumi mas kasem frut blong sid we yumi planem. Olsem nao, bambae yumi traehad blong bos long fasin kros.

[Ol Futnot]

[Foto Credit Line Blong Pija Long Pej 18]

Saul Attempts the Life of David/The Doré Bible Illustrations/Dover Publications, Inc.