OL YANGFALA OLI ASKEM
?Olsem Wanem Sipos Papa o Mama Blong Mi i Sik?
Bighaf blong ol yangfala oli no tingbaot wok blong lukaot long wan sikman. Oli ting se plante yia i mas pas yet bifo we helt blong papa mo mama blong olgeta i kam nogud.
?Be olsem wanem sipos papa o mama blong yu i kasem wan sik taem yu yu yangfala yet? Traem luk stori blong tu yangfala we tufala i fesem problem ya.
Stori blong Emmaline
Mama blong mi i kasem sik ya Ehlers-Danlos syndrome (EDS), we i spolem ol joen, skin, mo ol string blong blad, mo i mekem bodi i soa bitim mak.
I no gat rod blong winim sik ya, mo long ol ten yia we i pas, helt blong mama blong mi i godaon bigwan. I gat sam taem we blad blong hem i godaon tumas nao klosap hem i ded, mo sam taem we hem i wantem ded from we bodi blong hem i soa tumas.
Mi mo famle blong mi, mifala i Witnes blong Jehova. !Kongregesen blong mifala i mekem plante samting blong sapotem mifala mo mekem mifala i harem gud! I no longtaem i pas, wan gel we i yangfala olsem mi, i sanem wan kad long famle blong mifala, blong talem se hem i lavem mifala mo i rere oltaem blong givhan long mifala. !I gud tumas blong gat ol fren olsem!
Baebol i givhan bigwan long mi. Wan long ol vas we mi laekem tumas hemia Ol Sam 34:18, we i talem se: “Jehova i stap klosap long olgeta we hat blong olgeta i brok.” Wan narafala vas hemia Hibru 13:6, we i talem se: “Jehova nao i stap halpem mi. Bambae mi no fraet.”
Laswan vas ya i gat bigfala paoa long mi. Mi fraet we mi fraet se mama blong mi bambae i ded. Mi lavem hem tumas, mo mi talem tangkiu from evri dei we mi mi gat wetem hem. Vas ya i halpem mi blong trastem Jehova, nomata wanem samting i hapen long fiuja.
Mi fraet from wan narafala samting tu. EDS i wan sik we i save pas i go long ol pikinini. Mama blong mi i kasem sik ya long mama blong hem, mo mi mi kasem sik ya long mama blong mi. Yes, mi tu mi gat EDS. Be long taem ya tu, Hibru 13:6 i promes se Jehova bambae i “halpem mi.”
Mi glad long helt we mi gat naoia. Mi traem blong no tingbaot tumas ol yia we oli pas finis mo mi no wari long fiuja. Sipos mi tingbaot ol samting we mama blong mi i naf blong mekem bifo, mo mi skelem wetem smol samting we hem i save mekem naoia, mi harem nogud tumas. Baebol i talem se sipos yumi tingbaot hop blong laef olwe we yumi no moa sik, bambae ol trabol we yumi fesem naoia oli “smol nomo, mo oli no save stap longtaem.”—2 Korin 4:17; Revelesen 21:1-4.
Blong tingbaot: ?Wanem i stap givhan long Emmaline blong holem wan gudfala tingting? ?Olsem wanem yu yu save holem gudfala tingting taem yu kasem ol problem olsem?
Stori blong Emily
Taem mi stap go long haeskul, papa blong mi i kasem sik ya we tingting i foldaon olgeta. I olsem se papa blong mi i lus mo wan narafala man i tekem ples blong hem. Afta long taem ya, hem i harem nogud oltaem, i fraet blong nating nomo, mo sam taem hem i wari bitim mak. Samting ya i gohed 15 yia finis. !Sore tumas we hem i harem nogud olsem nating we hem i save se i no gat risen!
Mifala i Witnes blong Jehova mo kongregesen we mifala i joen long hem i givhan bigwan long mifala. Olgeta long kongregesen oli kaen, oli soemaot se oli kasem save, mo i no gat wan we i mekem papa blong mi i harem se kongregesen i no nidim hem. Taem mi luk olsem wanem papa blong mi i stap stanap strong, mi lavem hem moa evri dei.
Mi misim fasin we papa blong mi i gat bifo, we hem i no harem nogud mo wari oltaem, be hem i hapi. Mi no laekem nating we hem i mas faet evri dei agensem wan enemi we i stap insaed long tingting blong hem.
Nating se i olsem, papa blong mi i stap traehad blong holem wan gudfala tingting. Long wan taem we hem i harem nogud tumas, hem i traehad blong ridim wan smol haf blong Baebol evri dei, nating se i ridim sam vas nomo. Hemia i givim paoa long hem. Hemia wan smol samting nomo, be i olsem we i sevem laef blong hem. Mi praod we mi praod long papa blong mi long taem ya.
Mi laekem tumas vas ya long Nehemaea 8:10, we i talem se: “Glad we i kamaot long Jehova, hem i strong ples blong haed blong yufala.” Hemia i tru tumas. Taem mi stap wetem kongregesen, mo mi joen fulwan long ol miting mo ol narafala samting we kongregesen i mekem, glad we mi kasem i tekem ples blong ol filing blong harem nogud long hat blong mi. Mi harem gud blong fuldei. Eksampol blong papa blong mi i tijim mi se nomata wanem trabol yumi fesem, oltaem Jehova bambae i sapotem yumi.
Blong tingbaot: ?Olsem wanem Emily i sapotem papa blong hem we tingting blong hem i foldaon olgeta? ?Olsem wanem yu yu save givhan long wan we i gat semfala sik ya?