Krismas Long Esia

• SAMWE LONG TU HANDRED YIA BIFO, wan haeman blong stadi long Korea, i go long Peking, Jaena. Hem i lukluk wan pija we wan man i bin pentem insaed long ruf blong wan jos haos. Pija ya i soem Meri we i stap karem Jisas. Man ya i tokbaot pija ya we hem i luk, i se:

“Wan woman i holem wan pikinini we i sidaon long leg blong hem. Pikinini ya i gat samwe long faef no sikis yia, mo i luk olsem se hem i sik tumas. I luk olsem se woman ya i no moa gat paoa blong leftemap hed blong hem, ating hem i sore tumas long pikinini boe blong hem nao hem i no naf blong lukluk pikinini ya. Mo longwe biaen long tufala ya, i gat plante gos mo ol bebi we oli gat wing oli stap flaeflae olbaot. Taem mi stap lukluk ol samting long pija ya, i olsem we wantaem nomo ol samting ya bambae oli foldaon i kam long mi. Mi fraet smol, ale, mi pusum han blong mi i go antap blong kasem olgeta.”

SAMTING ya i hapen longtaem biaen long bigfala jenis we i kamaot long Katolik Jos long Yurop, mo longtaem biaen long nogud taem we oli kolem Medel Ejes.a Be, bighaf blong ol man long ol kantri blong Is oli no gat save nating long saed blong Kristin Skul, olsem we oli no save nating long saed blong pija ya blong Meri mo Jisas. !Be, tede, ol samting oli no moa olsem! Evri yia, long taem blong Krismas, i gat ol pija long evri ples we oli soem Jisas taem hem i bebi. Ol man blong Is oli lan blong luk ol kaen pija olsem. Mo naoia, plante rod long ol taon long Is oli luk olsem ol rod blong Yurop, from we oli flasem gud ol ples wetem ol samting blong Krismas.

Long Paris, long naet blong Novemba 25, 1998, hemia wan manis bifo long Krismas dei, bigfala ples ya we oli kolem Champs Élysées, i saen we i saen. Ol man oli hangem bitim 100,000 laet long ol 300 tri we oli laen folem longfala rod blong ples ya. Long Korea, ol man oli stanemap wan bigbigfala Krismas tri long fored blong wan bigfala stoa long medel blong taon ya Seoul. Oli flasem tri ya wetem ol laet we oli saenaot blong laetem ol ples blong taon ya. I no longtaem biaen, oli stat flasem ol narafala rod long taon ya wetem ol samting blong Krismas.

Evri dei, ol program mo ripot long saed blong Krismas oli stap kamaot long televisen, radio mo niuspepa. Tingting ya se Krismas i stap kam, i pulum ful kantri blong i stat bisi mo mekemrere from lafet ya blong en blong yia. Olgeta jos haos long Seoul, we namba blong olgeta i mekem fulap man oli sapraes, oli flasgud wetem ol samting blong Krismas kwiktaem nomo. Taswe, long semtaem we ol man long Yunaeted Stet oli bisi wetem Dei blong Soem Tangkiu (Thanksgiving Day) long en blong Novemba, ol man long Korea mo ol narafala kantri blong Is, oli bisi tu blong mekemrere from Krismas.

Bighaf blong ol kantri long Is oli no joen long Krisendom. Eksampel, long Korea i gat 26.3 pesen nomo blong ol man we oli talem se oli Kristin. Long Hong Kong, i gat 7.9 pesen blong ol man we oli talem se oli Kristin, long Taiwan i gat 7.4 pesen, mo long Japan i gat 1.2 pesen nomo. I klia nomo se, bighaf blong ol man long Is oli no joen long Kristin skul. Be, ol man ya oli no agensem fasin blong mekem lafet blong Krismas. Tru tumas, plante taem olgeta ya oli glad moa blong joen long lafet ya i bitim ol man long ol kantri blong Wes. Wan eksampel blong samting ya, hemia Hong Kong. Ol man oli savegud se long ples ya, nating se bighaf blong ol man oli joen long skul blong Budis no Taois, be Krismas i wan lafet we i bigwan mo i flasgud. Long Jaena tu, fasin blong mekem lafet blong Krismas i stap kam antap kwiktaem, nating se i gat 0.1 pesen nomo blong ol man we oli talem se oli Kristin.

?From wanem ol man long ol kantri blong Is oli stap joen bigwan long lafet blong Krismas? ?From wanem ol man we oli no bilif se Jisas hem i Mesaea, oli joen blong mekem lafet blong Krismas, we ol man we oli talem se oli Kristin oli talem se hem i betde blong Jisas? ?I stret sipos ol trufala Kristin oli folem tingting blong olgeta ya long saed blong Krismas? Bambae yumi luk ansa blong ol kwestin taem yumi gohed blong luk olsem wanem Krismas i kam wan samting we plante man oli laekem tumas long Korea, wan kantri ya blong Is.

[Futnot]