!Yumi Kasem Blesing From King Ya We Spirit Blong God i Stap Lidim!
“King ya, Spirit blong Hae God bambae i stap long hem.”—AES. 11:2.
1. ?Wanem tingting we sam man oli gat long saed blong ol trabol long wol?
“LONG fulwol tede, i gat ol trabol long saed blong politik, nogud fasin blong ol man, mo ol narafala trabol we oli kamaot long win, solwota, mo ol tri. ?Olsem wanem? ?Ol man oli save gohed blong laef 100 yia moa long wol ya?” Hemia nao wanem we Stephen Hawking, wan man blong stadi long ol samting long skae i askem long yia 2006. Wan stori long buk ya (New Statesman) i talem se: “Ol man oli no finisim fasin pua mo oli no putum pis long wol. Samting we oli mekem i defren olgeta. Ol man oli traem ol defdefren samting. Oli traem mekem se gavman i kontrolem olgeta mane blong kantri, be i no wok. Oli traem mekem se gavman i no kontrolem olgeta mane blong kantri, be hemia tu i no wok. Ol man oli stanemap Ligofnesen blong traem stopem faet, be i no wok. Ale oli hivimap plante tul blong faet, mo oli mekem ‘plante faet blong traem finisim ol faet,’ be hemia tu i no wok. Oli no moa save nao olsem wanem blong finisim faet.”
2. ?I no longtaem Jehova bambae i mekem wanem, blong soemaot we hem nomo i gat raet blong rul long olgeta ples long wol?
2 Ol man blong wok blong Jehova, oli no sapraes long ol tok ya we ol man oli stap talem. Baebol i talem se God i mekem ol man long fasin ya we oli no save rul antap long olgeta bakegen. (Jer. 10:23) Jehova nomo i gat raet blong rulum yumi. From samting ya, hem i gat raet blong putum ol rul we yumi mas folem. Mo hem i gat raet tu blong talem long yumi, wanem stamba tingting we yumi mas gat long saed blong laef blong yumi, mo blong lidim yumi blong folem stamba tingting ya. I no longtaem bambae Jehova i yusum paoa blong hem, blong finisim olgeta gavman, we ol man nomo oli stanemap. Mo long semtaem, bambae Jehova i spolem gud olgeta man we oli sakemaot hae rul blong hem, from we oli wantem holem ol narafala man oli stap kalabus long sin, mo trabol, mo oli wantem se ol man oli stap aninit long paoa blong “rabis god blong wol ya,” Setan.—2 Kor. 4:4.
3. ?Aesea i talemaot wanem long saed blong Mesaea?
3 Long niufala wol, Jehova bambae i yusum Kingdom blong Mesaea blong soemaot hae rul blong hem, mo blong soemaot we hem i lavem ol man. (Dan. 7:13, 14) Profet Aesea i tokbaot King blong Kingdom ya, i talem se: “Olgeta. Naoia, laen blong King Deved i olsem stamba blong wan tri we man i katemdaon finis. Be oltaem, stamba olsem i gat niufala gru i save kamaot long hem. Mo long sem fasin, bambae i gat wan niufala king i kamaot long stamba ya. King ya, Spirit blong Hae God bambae i stap long hem, i mekem hem i waes, mo i mekem hem i man blong save. Spirit ya bambae i givim gudfala toktok long hem, mo i mekem hem i gat paoa. Bambae hem i mekem hem i save ol samting we Hae God i wantem, mo i mekem hem i man blong ona long Hae God.” (Aes. 11:1, 2) Laen blong King Deved i olsem stamba blong wan tri we man i katemdaon finis, mo Jisas Kraes i olsem ‘niufala gru we i kamaot long hem.’ ?Ale long wanem rod, God i yusum tabu spirit blong hem blong mekem Jisas i naf blong rulum ol man? ?Wanem ol blesing we bambae oli kamaot taem hem i rul? ?Mo yumi mas mekem wanem blong kasem ol blesing ya?
God i Mekem Jisas i Naf Blong Rul
4-6. ?Wanem ol impoten save, we bambae oli givhan long Jisas, blong i mekem wok blong hem olsem King, Hae Pris, mo Jaj, long fasin we i waes mo i gat sore?
4 Jehova i wantem we ol man blong hem oli kam stret gud olgeta, aninit long wan King, Hae Pris, mo Jaj we i waes gud mo i gat sore. Hemia nao from wanem God i jusum Jisas Kraes, mo wetem tabu spirit blong hem, Jisas i naf gud blong mekem ol wok we oli impoten moa long ol narafala wok. Yumi save tingbaot sam long ol risen ya we oli mekem se Jisas, bambae i naf blong finisim gud ol wok ya we God i putum long han blong hem.
5 Jisas i save God moa i winim ol narafala man. Jisas i wan Pikinini ya nomo we God i gat, mo hem i stap wetem Papa blong hem blong plante bilian yia. Taswe hem i save Papa blong hem longtaem moa, i winim olgeta narafala man. Long taem ya, Jisas i kasem save gud long Jehova. From samting ya, Baebol i tokbaot Jisas se, hem i “wan pija blong God ya we yumi no save luk.” (Kol. 1:15, Nyutesteman wetem Ol Sam long Bislama) Jisas hem wan i talem se: “Man we i luk mi, hem i luk Papa blong mi.”—Jon 14:9.
6 Jisas, hem i namba tu man afta long Jehova we i kasem save gud long olgeta samting we Jehova i mekem, mo long ol man tu. Kolosi 1:16, 17 i talem se: “Taem God i mekem olgeta samting long heven mo long wol, olgeta samting we yumi save luk mo olgeta samting we yumi no save luk, . . . God i yusum Kraes blong mekem olgeta. . . . Kraes i wok blong God, mo God i mekem olgeta samting ya oli blong Kraes. Fastaem, taem we God i no mekem ol samting ya yet, be Kraes i stap finis.” !Yumi traem tingbaot samting ya! Jisas i olsem “nambawan man blong wok,” we i joen wetem God blong mekem olgeta narafala samting. Taswe, Jisas i kasem save gud long evri smosmol samting we oli stap long heven mo long wol, mo i save gud nambawan bren blong yumi ol man tu. !Yes Kraes i waes tumas!—Prov. 8:12, 22, 30, 31, NW.
7, 8. ?God i yusum tabu spirit olsem wanem, blong halpem Jisas long wok blong prij?
7 Tabu spirit blong God i makemaot Jisas. Jisas i talem se: “Hae God i jusumaot mi, mo paoa blong Spirit blong hem i kam fulap long mi blong mi talemaot gud nius long ol puaman. Hem i sanem mi blong mi talemaot long ol man we oli stap long kalabus se, ‘Yufala i save go fri,’ mo blong mi talemaot long ol man we oli blaen se, ‘Ae blong yufala i save kam gud.’ Hem i sanem mi blong mi mekem ol man we oli stap harem nogud aninit long han blong narafala man, oli go fri, mo blong mi talemaot se, ‘Taem i kam finis we Hae God bambae i sevem ol man blong hem.’” (Luk 4:18, 19) I luk olsem se taem Jisas i tekem baptaes, tabu spirit i mekem hem i tingbaot bakegen ol samting we hem i lanem, bifo we hem i kamdaon long wol olsem wan man. Mo hem i tingbaot tu, olgeta samting we God i wantem hem blong mekem taem hem i stap prij olsem Mesaea long wol.—Ridim Aesea 42:1; Luk 3:21, 22; Jon 12:50.
8 Jisas i fulap long tabu spirit. Tingting mo bodi blong hem tu i stret gud olgeta. From samting ya, Jisas i hae moa long olgeta man we oli laef long wol, be i no hemia nomo. Hem i bigfala tija tu. Tru ya, ol man we oli stap lesin long hem, oli “sapraes tumas long tok blong hem.” (Mat. 7:28) Jisas i luksave stamba samting we i mekem problem i kasem ol man. Hemia se oli gat sin, oli no stret gud, mo oli no gat naf save long saed blong God. Mo tu, hem i stap lukluk long tingting mo hat blong ol man, blong faenemaot se ol man ya oli wanem kaen man. Olsem nao, hem i mekem samting long olgeta, we i stret folem wanem we hem i luk long tingting mo hat blong olgeta.—Mat. 9:4; Jon 1:47.
9. ?Taem yu tingtingbak long ol gudfala fasin we Jisas i mekem taem hem i stap long wol, wanem samting i mekem se yu trastem hem olsem wan gudfala man blong rulum man?
9 Jisas i laef olsem wan man. Taem Jisas i stap long wol, hem i kampani oltaem wetem ol man. Mo samting ya i mekem se hem i save gud fasin blong yumi ol sinman. Hemia i halpem Jisas blong i kam nafgud blong rul olsem King. Aposol Pol i raetem se: “Fastaem [Jisas] i kam stret olsem ol brata ya mo ol sista ya blong hem, blong hem bambae i save gat sore long olgeta, mo blong olgeta bambae oli save trastem hem. Taswe hem i save mekem ol wok blong hem, we hem i Hae Pris blong olgeta, nao hem i mekem rod blong God i fogivim olgeta i tekemaot ol sin blong olgeta. Mo naoia, hem i save givhan long olgeta we ol samting oli stap traem olgeta, from we hem tu i harem nogud finis, mo ol samting ya oli traem hem finis.” (Hib. 2:17, 18) Ale from we ol samting blong wol ya ‘oli traem Jisas finis,’ hem i save gat sore long olgeta ya tu, we tede oli stap fesem ol trabol. Long wok blong prij we Jisas i mekem long wol ya, hem i soemaot klia nomo we hem i gat sore long ol man. Ol man we oli sik, olgeta we haf bodi blong olgeta i nogud, olgeta we ol narafala oli mekem i strong long olgeta, mo ol pikinini tu oli no fraet blong kam long hem. (Mak 5:22-24, 38-42; 10:14-16) Ol man we tingting blong olgeta i stap daon, mo olgeta we oli wantem tumas blong save God, olgeta tu oli stap kam long Jisas. Be ol man blong flas, mo ol man we oli “no lavem God” oli no wantem lesin long Jisas, mo oli no laekem hem nating, oli agens long hem.—Jon 5:40-42; 11:47-53.
10. ?Long wanem rod, Jisas i soemaot se hem i lavem yumi tumas?
10 Jisas i givim laef blong hem blong sevem yumi. Ating samting we i pruvum moa se Jisas i stret blong rulum gud ol man, hemia fasin blong hem we i rere nomo blong ded from yumi. (Ridim Ol Sam 40:6-10.) Kraes i talem se: “I no gat man we i lavem ol fren blong hem moa, i winim man we i lusum laef blong hem blong i sevem ol fren blong hem.” (Jon 15:13) Yes Jisas i defren olgeta long ol sinman tede, we oli stap rulum ol man. Plante taem ol man ya oli gat isi laef from we oli mekem i strong tumas long ol man we oli stap aninit long paoa blong olgeta. Be Jisas i givim laef blong hem blong sevem ol man.—Mat. 20:28.
Jisas Bambae i Yusum Sakrefaes Blong Hem Blong Givim Ol Gudgudfala Samting Long Ol Man
11. ?From wanem yumi save trastem gud Jisas olsem Man ya we i pemaot yumi?
11 !Jisas i olsem Hae Pris, taswe i stret nomo we hem i givim ol gudgudfala samting long yumi, we oli kamaot from sakrefaes blong hem! Taem Jisas i stap mekem wok blong prij long wol, hem i mekem ol sikman, mo olgeta we haf blong bodi blong olgeta i nogud, oli kamgud bakegen. Hem i mekem ol dedman oli laef bakegen, hem i givim kakae long plante taosen man, mo hem i bos long win mo solwota tu. Yes, ol samting ya we Jisas i mekem oli blong soemaot wanem we bambae hem i mekem taem hem i rul blong wan taosen yia, mo blong mekem ol wok blong hem olsem Man we i pemaot yumi. Sipos yumi stanap strong go kasem en, yumi save harem gud long olgeta gudgudfala samting ya. (Mat. 8:26; 14:14-21; Luk 7:14, 15) Jisas i no mekem ol samting ya blong traem pulum tingting blong ol man blong tingbaot haenem mo paoa we hem i gat. Hem i wantem soemaot long ol man se hem i lavem olgeta mo i gat sore. Wan man we i gat sik ya leprosi i kam luk Jisas blong i mekem hem i gud bakegen, nao Jisas i talem long hem se: “Mi mi wantem.” (Mak 1:40, 41) Taem Jisas i rul blong wan taosen yia, bambae hem i soemaot sore ya bakegen, i no long sam ples nomo, be long fulwol.
12. ?Aesea 11:9 bambae i kamtru olsem wanem?
12 Jisas Kraes mo olgeta we oli rul wetem hem, bambae oli gohed nomo long wok ya we Jisas i statem 2,000 yia i pas finis. Wok ya, hemia blong tijim ol man long saed blong God. Olsem nao, profet tok we i stap long Aesea 11:9, bambae i kamtru i se: “Kantri ya [“wol,” NW] bambae i fulap gud long ol man we oli savegud Hae God, olsem we solwota i fulap gud long ples blong hem.” Ol save ya we God i tijim yumi long hem, bambae i givhan long yumi blong lukaot gud long wol ya, mo long olgeta samting we i stap long hem. Wok ya nao we Jehova i bin talem long Adam blong mekem. Long en blong wan taosen yia rul blong Kraes, God bambae i mekem stamba tingting blong hem we i stap long Jenesis 1:28, i kamtru fulwan. Mo ol gudgudfala samting we bambae oli kamaot from sakrefaes blong Jisas, oli save kasem ful mak blong olgeta.
God i Givim Paoa Long Jisas Blong Jajem Ol Man
13. ?Long wanem rod, Jisas i soemaot se hem i laekem tumas stret fasin?
13 Kraes ya, “God i putumap hem finis blong hem bambae i jajem olgeta man, olgeta we oli stap laef wetem olgeta we oli ded finis.” (Wok 10:42) !I gud tumas blong save se fasin blong Jisas i no save kam nogud samtaem! Oltaem hem i mekem i stret, mo fasin blong hem blong jajem man i sem mak oltaem. (Aes. 11:5) Jisas i soemaot se hem i no laekem nating fasin blong man we i wantem evri samting, fasin tu fes, mo ol narafala nogud fasin. Mo hem i tok strong long olgeta we oli no sore long ol man we oli harem nogud. (Mat. 23:1-8, 25-28; Mak 3:5) Mo tu, man i no save giaman long Jisas long ol fasin blong hem, “from we [Jisas] i savegud wanem i stap long tingting blong man.”—Jon 2:25.
14. ?Long wanem rod tede, Jisas i soemaot se hem i laekem stret fasin? ?Wanem kwestin we yumi wanwan i mas askem?
14 Jisas i gohed blong soemaot we hem i laekem stret fasin. Hem i mekem olsem taem hem i lukaot long wok ya we i bigwan moa i bitim ol narafala wok we man i mekem samtaem, hemia wok blong prij mo blong tijim ol man. I no gat wan man, wan gavman blong man, no wan rabis spirit we i save stopem wok ya blong God. Bambae God i finisim wok ya olsem we hem i wantem. Taswe, yumi save bilif strong se afta long Amagedon, bambae yumi luk we stret fasin blong God i win. (Ridim Aesea 11:4; Matiu 16:27.) I gud yu askem se: ‘?Taem mi stap prij, mi mi soemaot sem fasin olsem Jisas long ol man? ?Mi mi mekem bes blong mi long wok blong Jehova, nating sipos mi gat wan sik, no wan problem we i blokem mi, blong mi no save mekem moa wok?’
15. ?Sipos yumi wantem mekem bes blong yumi long wok blong God, yumi mas tingbaot wanem?
15 Sipos yumi tingbaot oltaem se wok blong prij hem i wok blong God, hemia bambae i halpem yumi blong mekem wok ya wetem ful hat blong yumi. God nao i talem long yumi se yumi mas go prij. Hem i yusum Pikinini blong hem blong lidim wok ya, mo hem i yusum tabu spirit blong givim paoa long olgeta we oli joen long wok ya. ?Yu yu glad long blesing ya we yu gat blong wok wetem God, mo wetem Pikinini blong hem we spirit blong God i stap lidim? Tede i gat moa long seven milian man we oli joen long wok ya blong talemaot gud nius blong Kingdom long 236 kantri. Plante long olgeta ya oli ‘no gat nem, mo oli no skul gud.’ ?Hu i naf blong givim paoa long olgeta seven milian man ya? Jehova nomo i save mekem samting ya.—Wok 4:13.
!Yumi Wanwan i Mas Traehad Blong Kasem Blesing Long Kraes!
16. ?Jenesis 22:18 i soemaot wanem long saed blong ol blesing we God i givim?
16 Jehova i talem long Ebraham se: “Bambae ol man blong ol narafala kantri oli save prea long mi blong mi blesem olgeta, olsem we bambae mi blesem olgeta ya. Be bambae mi mi mekem i gud tumas long olgeta we bambae oli kamaot biaen long yu, from fasin ya we yu yu mekem tede, we yu obei long tok ya blong mi.” (Jen. 22:18) Hemia i soemaot se olgeta we oli glad long janis ya blong mekem wok blong God mo Pikinini blong hem, oli save bilif strong se bambae oli kasem ol blesing we Mesaea bambae i mekem i kamtru. Tede oli stap bisi long wok blong God, we tingting blong olgeta i stap strong long ol blesing ya.
17, 18. ?Wanem promes blong Jehova we i stap long Dutronome 28:2, mo samting ya i min se yumi mas mekem wanem?
17 God i talem long neson blong Isrel we i prapa laen blong Ebraham se: “Olgeta blesing ya [we i stap long kontrak blong Loa] bambae oli kasem yufala mo bambae oli kavremap yufala, sipos yufala i stap lesin oltaem long God blong yufala, Jehova.” (Dut. 28:2, NW) Tok ya i go tu long ol man blong wok blong God tede. Sipos yu wantem kasem ol blesing blong Jehova, yu mas “lesin oltaem” long hem. Biaen, ol blesing blong hem ‘bambae oli kasem yu mo bambae oli kavremap yu.’ ?Yumi mas mekem wanem blong “lesin” gud long Jehova?
18 Man we i lesin gud, i tinghevi long ol samting we Tok blong God i talem, mo long ol save we God i givim. (Mat. 24:45) Mo man we i lesin gud hem i obei long God mo long Pikinini blong hem. Jisas i talem se: “I no olgeta man evriwan we oli stap singaot mi se ‘Masta, Masta’ we bambae oli save go insaed long niufala wol ya we God i king long hem. Man we i stap mekem ol samting we Papa blong mi long heven i wantem, hem nomo bambae i save go insaed.” (Mat. 7:21) Man we i lesin gud, i glad blong folem ol plan blong Kristin kongregesen we God i stanemap. Mo i glad blong obei long ol elda, we oli olsem ol ‘presen we Kraes i givim’ long ol man.—Efes. 4:8.
19. ?Yumi mas mekem wanem blong kasem blesing?
19 Long medel blong olgeta ya we oli olsem ol “presen,” i gat ol memba blong Hed Kampani. Olgeta oli wok long nem blong Kristin kongregesen we i stap long fulwol. (Wok 15:2, 6) Blong talem stret, tingting we yumi gat long ol brata ya blong Kraes i wan bigfala samting. Long taem blong bigfala trabol we i stap kam, Jisas bambae i jajem yumi folem tingting mo fasin blong yumi long saed blong olgeta ya. (Mat. 25:34-40) Taswe, wan rod we yumi folem blong kasem wan blesing, hemia se yumi mas trastem mo wok gud wetem ol man ya we God i putumap olgeta.
20. (a) ?Ol man ya we oli olsem ol “presen” oli mekem wanem bigfala wok? (b) ?Long wanem fasin yumi save soemaot we yumi tinghae long ol brata ya?
20 Sam narafala man we oli olsem ol “presen,” hemia olgeta long ol Branj Komiti, ol seket elda, mo ol elda long Kristin kongregesen. Olgeta evriwan, tabu spirit nao i putumap olgeta. (Wok 20:28) Ol brata ya oli gat bigfala wok, hemia blong mekem ol man blong God oli kam strong, gogo ‘oli save kam wan nomo, we oli bilif long Pikinini blong God, mo oli savegud hem. Nao long fasin ya, bambae oli kam olsem we oli no moa pikinini, oli bigman finis. Bambae oli kam olsem Kraes nomo, we hem i bigman tru.’ (Efes. 4:13) Yumi mas tingbaot se yumi evriwan i no stret gud olgeta, mo olgeta ya tu we oli olsem ol “presen” oli no stret gud. Be nating se i olsem, yumi save kasem blesing yet, taem yumi glad blong obei long olgeta ya we oli wok blong lukaot long yumi mo givhan long yumi.—Hib. 13:7, 17.
21. ?From wanem yumi mas obei long Pikinini blong God naoia?
21 I no longtaem Kraes bambae i faet agensem rabis wol blong Setan. Mo Long taem ya, bambae hem i jajem yumi se yumi laef no yumi ded. Jisas nao, we God i givim wok ya long hem blong lidim “bigfala hip blong ol man” oli go “dring long ol springwota ya we i save givim laef.” (Rev. 7:9, 16, 17) From samting ya, i gud we yumi mekem bes blong yumi naoia, blong soemaot se yumi glad blong obei long King ya we spirit blong Jehova i stap lidim.
?Yu Yu Lanem Wanem Long . . .
• Aesea 11:1-5?
• Mak 1:40, 41?
• Ol Wok 10:42?
[Tok blong pija long pej 23]
Jisas i soemaot klia we hem i gat sore, taem hem i mekem gel blong Jaeras i laef bakegen
[Tok blong pija long pej 24]
Jisas Kraes i stap lukaot long wok ya we i bigwan moa i bitim ol narafala wok we man i mekem samtaem, hemia wok blong prij