?I Tru Se Pita Nao i Faswan Pop?

PLANTE milian man we oli joen long Katolik skul, oli mas bilif mo obei long tijing ya we faswan Kaonsel blong Vatican i stanemap long yia 1870. Nating se i olsem, i gud blong tingbaot ol kwestin ya: ?Tijing ya i kamaot long Baebol? ?I tru se Pop Francis i tekem ples blong aposol Pita? ?Mo i tru se Pita nao i faswan Pop?

“LONG STON YA BAMBAE MI STANEMAP JOS BLONG MI”

Desisen we Kaonsel blong Vatican i mekem long yia 1870, i folem save we i stap long Matiu 16:16-19 mo Jon 21:15-17. Ol vas ya mo sam narafala vas bakegen long Baebol, oli tokbaot stori blong Jisas mo Pita mo oli soemaot se Pita i gat wan impoten wok blong mekem long taem blong ol Kristin bifo. Long faswan taem we Jisas i mitim Pita, hem i talem se Pita bambae i strong blong mekem ol gudfala fasin. (Jon 1:42) ?Be, i tru se Jisas i talem se Pita i hae moa long ol narafala?

Jisas i talem long Pita, long Matiu 16:17, 18, se: “Mi talem long yu, yu yu Pita [we i minim “Wan Smol Ston”], mo long ston ya bambae mi stanemap jos blong mi.”a ?Yu ting se tok ya blong Jisas, i min se bambae hem i stanemap “jos” no kongregesen blong hem long Pita we i wan man nomo? ?I tru se Pita bambae i kam lida blong ol disaepol blong Jisas? ?Ol narafala disaepol blong Jisas we oli stap long taem ya, oli tingbaot wanem taem oli harem tok blong Jisas? Ol Gospel oli tokbaot se sam taem afta we Jisas i talem tok ya, ol disaepol oli raorao from tingting ya se hu nao i hae moa long olgeta. (Matiu 20:20-27; Mak 9:33-35; Luk 22:24-26) Sipos Jisas i talem finis long Pita se hem i hae moa long ol narafala aposol, ?i stret we oli raorao se hu i hae moa long olgeta?

?Pita i tingbaot wanem taem Jisas i talem ol tok ya long hem? Pita i wan man Isrel, mo hem i savegud ol profet tok we oli tokbaot wan “ston” no “fandesen.” (Aesea 8:13, 14; 28:16; Sekaraea 3:9) Taem Pita i raetem wan leta i go long ol Kristin, hem i eksplenem se tok ya “fandesen,” i minim Masta Jisas Kraes we i Mesaea. Pita i yusum Grik tok ya pe’tra (hemia sem tok we i Jisas i talem long Matiu 16:18) blong minim Jisas Kraes nomo.—1 Pita 2:4-8.

Aposol Pol i wan gudfala man blong Masta Jisas. ?Olsem wanem? ?Pol i bilif se Jisas i talem se Pita i hae moa long ol narafala? Long wan leta we Pol i raetem i go long ol fas Kristin, hem i tokbaot Pita wetem sam narafala Kristin se oli olsem “ol stamba pos blong kongregesen.” From we long tingting blong Pol, i gat plante Kristin we oli olsem ol ‘stamba pos.’ (Galesia 2:9) Taswe, sipos Jisas i putumap Pita olsem hed blong kongregesen, ?from wanem ol Kristin oli luk Pita se hem i sem mak long ol narafala Kristin we oli olsem ol stamba pos?

Taem Pol i raetem leta blong tokbaot nogud fasin we Pita i mekem long ol man, hem i toktok wetem respek mo i se: “Mi tok strong long hem from we i klia nomo se hem i rong.” (Galesia 2:11-14) Pol i no gat tingting ya se Kraes i stanap jos no kongregesen blong hem long Pita, no long wan narafala sinman. Be hem i bilif se Jisas Kraes nao, i fandesen ya we kongregesen i stanap long hem. Mo long tingting blong Pol, “ston ya hem i Kraes.”—1 Korin 3:9-11; 10:4.

“YU YU PITA . . . ”

Taswe, ?olsem wanem yumi save kasemsave long toktok ya se: “Yu yu Pita, mo long ston ya bambae mi stanemap jos blong mi”? Blong kasemsave stret, yumi mas ridim ol vas we oli stap raonabaot. ?Jisas mo Pita tufala i stap tokbaot wanem? Jisas i jes askem nomo long ol disaepol blong hem se: “?Yufala i stap talem se mi mi hu?” Wantaem nomo Pita i ansa se: “Yu yu Mesaea, yu pikinini blong God ya we i laef i stap.” From samting ya, Jisas i glad long Pita mo i talem se, bambae hem i stanemap “jos” blong hem no kongregesen long wan “ston” we i strong moa. Ston ya hem i Jisas, man ya we Pita i soemaot se hem i bilif long hem.—Matiu 16:15-18.

Folem tingting ya, plante “Bigman Blong Ol Jos” oli raetem se Kraes nao i ston ya we Matiu 16:18 i tokbaot. Eksampol, wan bigman blong jos we nem blong hem Augustine, i raetem plante yia bifo se: “Kraes i talem se: ‘Long ston ya bambae mi stanemap jos blong mi.’ Ston ya hem i Kraes from we Pita i bin talem long hem se: ‘Yu yu Kraes ya, yu yu Pikinini blong God.’ Taswe, folem tok ya we Pita i talem, Kraes i talem se hem bambae i stanemap jos blong hem long ston ya.” Augustine i talem bakegen se “Ston ya (Petra) hem i Kraes.”

Ol man we oli bilif se tijing ya blong Katolik i tru, maet oli luk Augustine mo ol narafala bigman blong jos, se oli stap agensem tok blong Baebol. Ulrich Luz wan man Swiselan we i man blong stadi long Baebol, i talem se tede, ol man we oli gat hae save long Baebol mo oli no agri long tijing ya blong Katolik, oli stap brekem loa we Kaonsel blong Vatican i stanemap long yia 1870.

?POP NAO I TEKEM PLES BLONG PITA?

Aposol Pita i neva save taetel ya “pop.” Long ol yia bifo kam kasem ol yia 800, plante bisop we oli no blong Rom oli yusum taetel ya pop blong tokbaot olgeta. Nating se i olsem, afta long ol yia 1000, taetel ya pop i kam ofisol mo plante man oli save long hem. Mo tu, ol fas Kristin oli save se Pita i sem mak long ol narafala mo hem i no gat wan taetel we hem i pasem long ol narafala man. Taswe, Martin Hengel blong Jemani we i gat hae save long Baebol, i talem se “ol man we oli stadi long Baebol mo histri, oli no gat pruf blong soemaot se i gat ol man we oli tekem ples blong Pita olsem ol ‘hae man’ blong jos.”

Folem ol save we yumi tokbaot: ?I tru se Pita nao i faswan pop? ?I gat sam narafala man we oli tekem ples blong hem? Katolik skul i bilif se pop i hae moa long olgeta man, ?tijing ya i kamaot long Baebol? Ansa blong ol kwestin ya hemia se, nogat. Jisas i stanemap jos no trufala kongregesen, long hem wan nomo. (Efesas 2:20) From samting ya, wanwan long yumi i mas tingbaot impoten kwestin ya se, ?Mi mi faenem trufala kongregesen ya finis?