Yumi Gohed Oltaem Long Minista Wok Blong Yumi
1 Taem yumi stap gohed insaed long taem blong en, plante nyufala samting i stap kamtru long wol ya. (1 Kor. 7:31) Plante man oli sek nomo long ol samting we i stap kamaot, be i gat longtaem finis, Baebol i talemaot ol samting ya. Taem yumi tingtinggud long ol samting we oli stap kamtru long wol, mo long ol samting we oli stap kamtru long ogenaesesen blong Jeova, yumi luksave se i impoten tumas blong talemaot “gud nyus” blong Kingdom.—Mak 13:10.
2 Jisas i lidim yumi mo i soemaot rod long yumi. Hem nao i givim wan oda long yumi, se yumi mas mekem disaepol. Hem i talem se bambae yumi win long wok ya, i se: “Bambae mi mi stap wetem yufala oltaem, gogo wol ya i finis.” (Mat. 28:19, 20) Ol man blong Jisas oli tinghevi long tok ya. Nating se ol man i mekem trabol long olgeta, “evri dei . . . oli stap tijim ol man mo oli stap talemaot gud nyus ya blong Jisas, se hem i Mesaea.” (Wok 5:42) !Oli soemaot wan nambawan rod long yumi!
3 Taem yumi ridim Yearbook blong 1990, yumi luk olsem wanem Jeova i stap blesem minista wok blong yumi. Hem i mekem namba blong yumi i gru. Long sam kantri, ol pablisa oli gru we i bitim mak. Samting ya i kamaot long olgeta ples long wol, mo neva bifo yumi ting long wan samting olsem. (Aes. 60:22) ?Be olsem wanem long ples blong yufala? ?Mo olsem wanem long wok we yu wan yu stap mekem? ?Hem tu i save mekem ol narafala man blong God oli harem gud from? Yumi wanwan i mas gohed oltaem blong traehad long minista wok blong yumi.
Mekem Wok Blong Yu
4 I klia we olgeta ples long wol oli no save karem “frut blong tok ya” long sem fasin (Skelem wetem Matyu 13:23). Mo i tru tu se sam ples olsem Aealan mo kebek oli no karem “frut” fastaem. Ol pablisa oli gat strong tingting blong hadwok long plante yia, nao wok i stat gru. Long sam ples, plante man i agensem trutok. Long sam narafala ples, ol man oli no lesin gud long mesej blong Kingdom, oli no intres long hem. Mo long sam ples i gat plante pablisa, mo oli no gat plante ples blong prij long hem. Be nomata wanem kaen ples yumi mas prij long hem, yumi neva mas letem tingting blong yumi i kam we i no moa strong blong prij. Aposol Pol i talem se: “Bambae yumi no kam slak blong mekem ol gudfala fasin, from we sipos yumi no lego, bambae long stret taem blong hem, yumi save kasem kakae from ol hadwok ya blong yumi.” (Gal. 6:9) Tok ya i stret long yumi evriwan. ?Olsem wanem blong mekem olsem? ?Wanem samting i save halpem yumi blong gohed oltaem long minista wok blong yumi?
5 Blong gohed long wok mo karem frut, yumi mas trastem Jeova olgeta, mo wet long paoa blong hem we i save givhan long yumi. Oltaem yumi mas rimemba we hem nomo i save mekem ples blong yumi i karem frut, olsem sam nyu disaepol. (1 Kor. 3:6) Taem yumi prea long hem, Jeova i givim sam advaes we yumi nidim, mo i trenem yumi. Mo tu, hem i givim ol buk we i save givhan long yumi wanwan mo long plante narafala man we i mas kasem save long God yet. ?Olsem wanem? Yu yu stap yusum olgeta rod ya?
Holem Wan Gudfala Fasin
6 Sipos yumi no tinghae long minista wok blong yumi, fasin ya i save blokem yumi, nao yumi no save karem plante frut. Ating wan man i save gat tingting finis se ol man we i stap long ples blong hem oli nogud, from we i gat longtaem finis we oli no rili intres long trutok, no oli no lesin. Sipos yumi gat tingting olsem, ol man oli save luksave samting ya long fes blong yumi. No oli save haremsave long fasin blong voes blong yumi. Mo tu samting ya i klia from we yumi no hadwok blong mekem yumi i rere blong go prij. Jisas i givim oda long yumi, se yumi mas talemaot mesej blong Kingdom mo tijim ol man. Hem i no talem long yumi se wok ya i finis nao. Yumi wantem obei long God we i lidim yumi. Taswe yumi wantem gohed oltaem long minista wok blong yumi.
7 Jeova i gat plan blong givim woning long ol rabis man mo blong hivimap ol disaepol, bifo we rabis wol ya i finis. Bambae samting ya i kamtru. Yumi save harem gud blong mekem wok blong prij naoia. Mo yumi glad tu from we bambae Jeova i blesem yumi blong olwe wetem ol narafala man blong hem. Sipos yumi gat bilif mo lav, mo oltaem yumi gohed long minista wok blong yumi, ale bambae yumi kasem ol blesing ya.