No Kam Slak Blong Talemaot Gud Nyus

¹ Ol faswan Kristin oli tinghevi long wok blong prij blong olgeta. Luk i mekem ripot ya se: “Evri dei, insaed long haos blong God, mo insaed long ol haos blong ol man, oli stap tijim ol man, mo oli stap talemaot gud nyus ya blong Jisas, se hem i Mesaea.” (Wok 5:​42) !I no gat wan samting i save stopem olgeta! !Taem ol man oli mekem trabol long olgeta, samting ya tu i no stopem olgeta! (Wok 8:⁠4) Evri dei, oli tokbaot trutok wetem ol narafala.

² ?Olsem wanem long yumi? Askem long yu wan: ‘?Mi mi harem se taem ya i impoten tumas? ?Mi mi wantem gohed blong talemaot gud nyus we mi no kam slak?’

³ Ol Eksampel Tede Blong Olgeta We Oli No Kam Slak Blong Prij: Wan sista we hem i bin kasem sik ya polio, i no save wokbaot. Hem i mas stap insaed long wan mesin oltaem blong halpem hem blong pulum win. Hem i no save go long Haos Kingdom mo long ol asembli. Be hem i stap bisi oltaem blong talemaot gud nyus. !Long 37 yia we hem i stap sik olsem, hem i givhan long 17 man blong kasem trutok! ?Olsem wanem hem i mekem olsem? Nating se hem i no save wokbaot i go long ol haos wanwan, hem i faenem wan rod evri dei blong tekem jans blong prij.

⁴ Ol brata blong yumi long Bosnia oli mas stanap strong tru long faet mo hadtaem. Be, oltaem oli gohed blong prij. Long Sarayevo, ol wanwan pablisa oli spenem samwe 20 haoa evri manis blong toktok wetem ol narafala long saed blong gud nyus, mo wanwan long olgeta oli mekem tu Baebol stadi. Nating se oli trabol tumas, oli gohed nomo blong prij mo blong tijim ol man.

⁵ Ol yangfala tu oli stap wok strong long wok blong prij. Long Ruwanda, ol soldia oli putum wan famle we oli Wetnes insaed long wan rum, mo oli rere blong kilim olgeta i ded. Famle ya i askem sipos oli save prea fastaem. Ol soldia oli letem olgeta, mo yangfala gel ya, Deborah, i prea wetem bigfala voes se: “Jeova, long wik ya mi mo Papa mitufala i seremaot faef magasin. ?Olsem wanem bambae mitufala i save gobak blong tijim ol man ya long trutok mo blong halpem olgeta blong kasem laef?” From strong bilif blong smol gel ya mo lav we hem i gat long wok blong prij, oli no kilim famle ya i ded.

⁶ Tede, yumi mas lukaot ol jans blong prij long ol narafala mo traehad blong faenem olgeta ‘we oli stret blong kasem laef we i no save finis.’ (Wok 13:48) Bambae ol elda oli putum taem blong ol miting blong prij we i stret long evriwan long kongregesen, maet long moning, aftenun no sapa. Ol haf long Kingdom Wok Blong Yumi, ol tok long Miting blong Kingdom Wok, wetem ol seket mo distrik asembli, oli givim ol gudfala advaes mo toktok olsem wanem blong yusum ol defren rod blong talemaot Kingdom. Antap long samting ya, ol seket mo distrik elda oli trenem ol pablisa blong prij long rod, long ol stoa, mo oli soem rod blong givim wetnes long ol man long plante defren ples. !Olgeta samting ya i soem wan poen, se yumi no mas kam slak blong talemaot gud nyus!

⁷ Ol aposol blong Jisas oli no fraet blong talem se: “Mifala i no save stap kwaet. Mifala i mas gohed blong talemaot ol samting ya we mifala i luk long ae blong mifala, mo we mifala i harem long sora blong mifala.” ?Olsem wanem oli stap gohed, nating se oli kasem trabol? Oli askem Jeova blong givhan long olgeta. Hem i mekem olsem, mo ‘tabu speret i kam fulap long olgeta. Oli stat talemaot tok blong God, we tingting blong olgeta i strong.’ (Wok 4:​20, 29, 31) Maet i no olgeta evriwan we oli kasem ol nambawan ekspiryens long wok blong prij. Be sipos yumi rili traehad blong gohed blong talemaot gud nyus we yumi no kam slak, mo sipos yumi traehad blong mekem olsem evri dei, bambae Jeova i givhan long yumi.