?Bambae Oli Harem Olsem Wanem?
1. ?From wanem maet samtaem i no isi blong mekem wok blong prij, mo from wanem yumi mas gohed nomo blong prij?
1 From we naoia dei blong Jeova i stap kam kwik, i gat nid blong givhan kwiktaem long plante man blong oli kasem stret save blong God mo stamba tingting blong hem long saed blong ol man. (Jon 17:3; 2 Pita 3:9, 10) Maet samtaem i no isi blong mekem wok blong prij from we plante man oli no intres no maet oli jikim yumi taem yumi prij. (2 Pita 3:3, 4) Nating se i olsem, yumi sua fulwan se i gat samfala long teritori blong yumi we bambae oli akseptem gud nius taem oli harem. ?Sipos man i no go talemaot nius blong God, bambae ol man ya oli save harem nius ya olsem wanem?—Rom 10:14, 15.
2. ?Olsem wanem eksampol blong aposol Pol i leftemap tingting blong yumi?
2 Fesem Fasin Agens: Yumi no mas lego wok blong prij from we i gat plante man yet oli wantem harem mesej blong Kingdom. Filipae i faswan taon long Yurop we aposol Pol i talemaot gud nius long hem. Ol man blong taon ya oli talem ol giaman tok agensem Pol mo Saelas, nao oli wipim tufala mo oli putum tufala long kalabus. (Wok 16:16-24) Be nating se Pol i harem nogud long bodi mo filing blong hem, hem i no fraet mo i no tanem baksaed long wok blong prij. Taem hem i go long Tesalonaeka, hemia nekis taon we hem i visitim long misinari trip blong hem, ‘God i mekem tingting blong hem i strong.’ (1 Tes. 2:2) Eksampol blong Pol i soemaot long yumi se yumi ‘no mas kam slak.’—Gal. 6:9.
3. ?Wanem i mekem se samfala oli jenisim tingting blong olgeta nating se fastaem oli no bin intres long gud nius?
3 Plante man we oli no wantem lesin long gud nius blong plante yia finis, oli jenisim tingting blong olgeta. Ol samting we oli jenisim tingting blong ol man ya hemia, problem long saed blong mane, sik, wan ded long famle mo ol ripot blong ol nogud samting we i stap hapen long wol. (1 Kor. 7:31) Sam pikinini we papa mama blong olgeta i agensem trutok taem oli smol, naoia oli kam bigman mo oli rere blong lesin. Fasin ya we yumi gohed blong prij i givim janis long olgeta ya blong oli “singaot long nem blong Jeova” bifo we i let tumas.—Rom 10:13, NW.
4. ?Wanem i pusum yumi blong gohed long wok blong prij we yumi “no kam slak”?
4 “No Kam Slak”: Lav we yumi gat long God mo ol man raonabaot long yumi bambae i pusum yumi blong “no kam slak “long wok blong prij mo mekem disaepol, olsem ol aposol long faswan handred yia. (Wok 5:42, NW) Tede, plante man oli “sore mo oli krae from olgeta rabis fasin” we i stap hapen. (Esik. 9:4, NW) !Ating olgeta ya oli glad tumas taem oli harem gud nius ya we i givim hop long olgeta! Nating se plante man oli no wantem lesin, yumi glad from we Baebol i promes se Jeova i glad tumas long ol traehad blong yumi.—Hib. 13:15, 16.