Baebol-Stadi Blong Tajem Hat Blong Ol Man

¹ Jisas i wantem tumas blong mekem ol samting we Papa blong hem i wantem mo hem i givhan long ol narafala man blong olgeta tu oli mekem wok blong Jeova. (Sam 40:8; Mat. 9:​37, 38; 11:​28-30) Hem i no stap talemaot gud nyus nomo. Sipos yumi wantem we ol man we yumi stadi wetem oli kam pablisa, yumi mas tajem hat blong olgeta. Blong kasem mak ya, i no naf we yumi tekem wan buk ale yumi mekem toktok wetem kwestin mo ansa. Sipos yumi gat plan blong tajem hat blong olgeta, yumi mas tingbaot olgeta taem we yumi mekemrere stadi blong ol.

² Jisas i tingbaot ol narafala. Hem i teknotis long tingting we ol nara man oli gat. Hem i yusum ol pija tok blong mekem se ol man oli kasem save long ol bigfala poen we hem i tijim olgeta long hem. (Mat. Japta 5 kasem 7) Jisas i save finis wanem kaen trabol ol man we oli lesin long hem bambae oli kasem, taswe hem i givim ol gudfala advaes long olgeta. (Mak 9:​33-37) Taem ol man we oli lesin long hem oli no kasem save long ol samting we hem i stap talem, Jisas i soemaot longfala tingting long olgeta mo hem i yusum ol pija tok blong mekem se i moa isi long ol. (Mat. 16:​5-12) Jisas i gat bigfala intres long ol narafala, taswe yumi wanwan i save tingbaot kwestin ya, se: ‘?Sipos mi nao mi stadi, wanem poen mi mas save long hem, ale bambae mi klia long ol samting we mi lanem? ?Wanem samting i save pusum mi blong mekem Baebol i wok long laef blong mi?’​—Ridim 1971 Yearbook, pej 246 mo 247.

YUFALA I TOKBAOT BAEBOL FASTAEM

³ Wan pablisa i givim wetnes long wan man mo woman blong hem. Biaen, mifala i askem long tufala from wanem tufala i kam kwiktaem nomo long trutok. Tufala i ansa se: “Evri samting i stap long Baebol.” Yes, Tok blong God i save tajem hat. (Hib. 4:12) Yufala i mas yusum Baebol oltaem mo i gud blong jekemap ol vas we i stap long ol haf. Yufala i halpem stadi blong yufala blong hem i luksave from wanem fasin olsem i waes no maet i krankge nomo. Yufala i pulum hem blong hem i tingtinggud, ale hem i save gud from wanem fasin blong obei long ol loa blong God i gud long hem.​—Ridim Wajtaoa (Engglis) blong Ogis 1, 1984, pej 15-16. (wF 1/11/84, p.15-16)

⁴ Plante pablisa oli luksave se blong tokbaot Baebol fastaem, i gud blong yusum Reasoning buk. Tingbaot eksampel ya: Yu stap stadi wetem wan man long Laef Foreva buk, pej 124, haf 13. Ale, man ya i askem from wanem pasta blong hem i talem se sam pikinini oli stap ded from we God i jusumaot olgeta blong oli stap wetem hem long heven. Sipos yufala i tekem Reasoning buk long pej 254, long haf ya se “?From wanem ol smol pikinini tu oli stap ded?”, haf ya i soemaot klia se Jeova i tinghae long ol famle mo hem i wantem se ol famle oli joengud tugeta. Ol gudfala poen ya oli save halpem man ya, ale hem i gat strong tingting se God i laekem tumas ol man.

YUFALA I ASKEM OL KWESTIN

⁵ Jisas i gat gudfala fasin blong yusum ol kwestin, taswe hem i pulum ol man blong oli mekemap maen blong olgeta mo oli tingtinggud long ol samting we oli stap mekem. (Mat. 17:​24-27) Taem yumi stadi wetem wan man, ol ansa we hem i givim oli halpem yumi blong luksave ol poen we hem i kasem save long hem finis. Mo tu, ol ansa ya oli soemaot klia ol rong tingting blong man we hem i holemtaet long olgeta yet. Wan eksampel: Maet wan stadi i wantem we hem i no moa smok. Yufala i stadi finis wetem hem long japta 27 blong Laef Foreva buk mo Wekap! namba 4, 1990. (Engglis: Julae 8, 1989, pej 13 kasem 16) Hem i save se hem i mas stop long fasin ya. ?Be yufala i ting se hem i gat strong tingting blong lego long sigaret? Yufala i save talem long hem se: “?Wanem tingting blong yu? ?Bambae yu mekem wanem sipos ol fren blong yu oli jikim yu from we yu no moa smok?”

⁶ I gat wan samting bakegen we yufala i mas rere long hem. Samtaem, ol ansa we ol man oli givim long ol kwestin ya oli save mekem yufala i sapraes, no maet tingting blong yufala i foldaon from. ?Bambae yufala i mekem wanem? Sipos bisnes ya i no isi tumas, maet i moa gud blong talem se: “Bambae yumi stop long ples ya tistaem. Nekis taem bambae yumi tokbaot poen ya.” No: “Yes, hemia wan poen we yumi mas tingtinggud long hem.” (Jon 16:12) From we yufala i save tingting blong man ya long wan samting, i gud blong faenemaot ol gudfala poen we oli save halpem hem blong hem i gohed long saed blong speret. Yumi mas wok had blong tajem hat blong ol man mo yumi mas prea long Jeova blong hem i givhan long olgeta blong oli kam strong moa long saed blong speret.​—1 Korin 3:​5-9.

⁷ Taem we yufala i mekem wan Baebol-stadi, yufala i mas tekem inaf taem blong mekem man ya i tingtinggud long ol poen we yutufala i stap tokbaot. Taem we yufala i tij, yufala i mas lukaot gud long ol nid blong ol man. Yufala i mas pulum man we yufala i stadi wetem blong hem tu i laekem mo i soemaot respek long Jeova, long Baebol mo long ogenaesesen blong Jeova. Yes, bambae yumi evriwan i gohed nomo blong givhan long ol narafala man, ale bambae oli kam man blong Jisas. !Yes, bambae yumi traehad blong mekem ol gudfala Baebol-stadi!​—Ol Wok 2:​41-46.