Yumi Joengud Oltaem Long Famle
1 Ol papa mama oli gat plante samting blong mekem. Taswe, i impoten tumas we oli tekem taem blong mekem famle blong ol i joen tugeta long wosip blong trufala God. Yes, ol Kristin famle oli gat nid blong joengud tugeta from we laef long wol ya i kam strong tumas naoia. (Ekles. 4:9-12; 2 Tim. 3:1-5) Sipos ol famle oli gru oltaem long saed blong speret, bambae oli save joengud tugeta mo bambae oli winim ol trabol we Setan mo rabis wol blong hem oli putum long rod blong ol.
YUMI MEKEM GUDFALA FASIN LONG SPERET
2 Ol miting blong kongregesen mo famle stadi oli impoten haf blong program we ol famle wanwan oli mas folem evri wik. (Dutr. 6:6, 7; Hibr. 10:23-25; w 1/11/86 , pej 23-25) Be i no finis yet. Blong tijim pikinini long saed blong speret yumi mas mekem sam samting moa.
3 Ol papa mama oli save joengud moa wetem ol pikinini blong olgeta sipos oli rili intres long ol samting we ol pikinini blong ol oli mekem long saed blong speret. Long taem blong ol man Isrel, ol papa mama oli gat wok blong tijim mo trenem ol pikinini blong ol, ale ol pikinini ya oli naf gud long laef. Oli tijim ol pikinini blong olgeta taem oli toktok wetem olgeta, mo long evri dei blong laef blong ol oli soemaot gudfala rod long olgeta. Long program we oli stap folem, oli trenem pikinini long wan wok we hem i save mekem taem bambae hem i kam bigman. Oli tijim pikinini blong i save rid mo raet, mo blong hem i save mekem ol gudfala fasin long saed blong speret oli wok long laef blong hem. Fasin ya blong tij i halpem pikinini blong fraetgud long Jeova mo long Loa blong hem. Taswe, ol pikinini oli save se oli mas soemaot respek long papa mama blong ol mo oli mas gat ona long ol olfala. Mo tu, oli luksave from wanem i impoten we oli obei oltaem long ol rul we God i givim.
4 Yufala i mas tektaem blong storeyan wetem famle blong yufala from we fasin olsem i save mekem bilif blong olgeta i strong bakegen. Maet long taem blong kakae, yufala i save tokbaot sam samting long saed blong speret. Wan papa we i waes i talem se: “Papa mo mama oli mas spenem taem wetem ol pikinini—oli mas soemaot long ol pikinini olsem wanem blong mekem ol Kristin fasin i wok long laef blong olgeta mo olsem wanem blong winim ol trabol blong ol.” Yumi mas tijim ol pikinini long ol fasin long saed blong speret from we oli nidim ol fasin ya blong winim ol trap blong wol.—1 Korin 3:10-15.
YUMI GLAD NOMO BLONG GO PRIJ
5 Yumi glad tumas taem we yumi kasem no yumi wet long wan gudfala samting. Bifo we wan man i go prij, i stret nomo we hem i gat tingting blong kasem gudfala frut. Taswe, sipos yumi rere gud fastaem, bambae yumi save glad long wok we yumi mekem. Sipos yumi rere long haos wetem famle blong yumi, bambae yumi toktok isi nomo taem yumi prij. (Ridim Taetas 3:1b) Bambae yumi evriwan i gat wan mak. Yumi save mekem bakegen wan smol pleplei blong prij wetem ol pikinini no olgeta we oli stat nomo blong prij.
6 Sipos oli joen long minista wok wetem ol pikinini blong ol, ol papa mama oli save givhan ol pikinini blong intres moa long ol narafala man, olsem we Jeova mo Jisas tufala i mekem. Minista wok blong yumi i givhan long yumi tu blong yumi joengud moa wetem Jeova. (w 15/5/82, pej 24-30) Sam famle oli mekem plan blong spenem taem tugeta. Maet oli prij fastaem, ale biaen oli kam hivap wanples blong pleplei no blong spel lelebet. Ol famle oli save storeyan tugeta, ale ol papa mama oli kam kolosap moa long ol pikinini blong ol.
7 Yufala papa mama, yufala i mas traehad blong gat gudhan long fasin blong toktok oltaem wetem ol famle blong yufala. Yufala i mas mekem olsem blong joengud wetem ol pikinini blong yufala. Yufala i no mas letem wan samting i blokem yufala, ale yufala i no tektaem blong mekem famle blong yufala i kam strong moa long saed blong speret. Bambae yufala i prea oltaem from ol pikinini blong yufala mo wetem olgeta, from we yufala i bilif strong se Jeova nomo i save blesem ol hadwok we yufala i stap mekem naoia.—Sam 127:1; Prov. 24:3.