Ol Paenia Oli Givhan Long Ol Narafala
1 Jisas i talem se: “Tru, i gat plante kakae tumas i stap long garen we i rere finis, be smol man nomo i stap blong karem i kam. Yufala i mas askem strong long masta blong garen ya, blong hem i sanem sam moa man oli go karem kakae blong hem i kam.” Long faswan handred yia, ol man blong karem kakae oli no plante, be teritori we oli mas wok long hem i bigwan. Taswe, maet i stret we Jisas i sanem olgeta oli go wanwan blong kasem plante moa man wetem gud nyus. Be, hem i no mekem olsem. Hem i “sanem olgeta oli go tutu.” (Luk 10:1, 2) ?From wanem oli go tutu?
2 Ol disaepol ya oli nyuwan mo oli no gat plante save long wok ya. Sipos oli wok tugeta oli save lanem samting from narafala mo oli save leftemap tingting blong olgeta tu. Olsem Solomon i talem, ‘fasin ya we tu man i stap joen wanples blong wok, hem i moa gud, i winim wan man nomo.’ (Ekl. 4:9, 10) Afta we tabu speret i kamdaon long ol man blong bilif, long Pentekos 33 K.T., Pol, Banabas, mo sam narafala bakegen, oli gohed yet blong stap joen wetem ol narafala long wok blong prij. (Ol Wok 15:35) !Long rod ya, samfala oli gat nambawan jans blong kasem trening tru long ol man ya we oli gat gudhan blong prij!
3 Wan Nambawan Program Blong Trenem Yumi: Kristin kongregesen blong tede i sem mak long hemia blong fastaem. Hem tu i wan ogenaesesen blong prij. Mo hem i trenem yumi blong mekem wok ya. Long hat blong yumi wanwan, yumi mas wantem tumas blong gat gudhan blong serem gud nyus wetem ol narafala. Blong mekem se plante moa pablisa oli save gat gudhan long wok blong prij, oli nidim help.
4 I no longtaem i pas, long Miting blong Kingdom Wok, Sosaeti i talemaot wan program, hemia se ol paenia oli givhan long narafala long wok blong prij. ?I rili nidim samting ya? Yes, i nidim. Bitim wan milyan pablisa oli baptaes long ol laswan tri yia, mo plante long olgeta ya oli nidim trening blong kam moa gud long wok blong prij. ?Bambae hu i trenem olgeta?
5 Ol fultaem paenia oli save givhan. Ogenaesesen blong Jeova i givim fulap advaes mo trening long olgeta ya. Long Paenia Skul, ol paenia oli kasem advaes blong tu wik, we i stret long nid blong olgeta. Oli kasem gudfala advaes from ol miting we oli mekem wetem ol seket mo distrik elda, mo ol elda blong ol wanwan kongregesen. Nating se i no olgeta paenia evriwan we oli gat plante save olsem Pol mo Banabas, oli kasem fulap impoten save we oli glad blong serem wetem narafala.
6 ?Hu Olgeta We Bambae Oli Kasem Help? ?Program ya i blong givhan nomo long ol nyufala pablisa mo olgeta we oli jes baptaes? !No gat! I gat sam yangfala mo sam olfala tu, we maet oli save trutok blong plante yia finis, be oli wantem tumas blong kasem help blong kam moa gud long sam haf blong minista wok blong olgeta. Samfala oli mekem nambawan wok blong seremaot ol buk, be oli faenem i had blong mekem ol visit no blong statem ol Baebol stadi. Sam narafala, maet oli statem ol Baebol stadi isi nomo, be oli luk se ol studen blong olgeta oli no gohed gud. ?Wanem i stap blokem ol studen ya? Maet wan paenia we i gat plante save long wok ya i save halpem olgeta long saed ya. Sam paenia oli gat gudhan blong pulum intres blong man, statem ol Baebol stadi, mo pulum ol nyufala studen i kam long ogenaesesen. Save we oli gat long wok ya bambae i givhan bigwan long nyufala program ya.
7 ?Yu yu faenem se yu no gat jans oltaem blong joen plante long ol miting blong prij we kongregesen i mekem? Maet wan paenia i save wok wetem yu long ol taem we ol narafala pablisa oli no go aot.
8 I Nidim Blong Wokgud Wanples: Tu taem wan yia, bambae ol elda oli mekem plan blong ol pablisa we oli wantem narafala i halpem olgeta, blong joen long program ya “Ol Paenia Oli Givhan Long Ol Narafala.” Sipos yu wantem kasem help olsem, storeyan wetem paenia we bambae i halpem yu mo stanemap wan program blong prij, mo folemgud program ya. Yu no mas mestem ol taem we yutufala i jusum blong prij. Taem yutufala i stap prij tugeta, makemgud ol rod blong serem gud nyus we oli karem frut. Traem luksave from wanem samfala fastok oli karem gudfala frut moa i bitim narawan. Tingting gud long ol advaes we brata no sista ya we i paenia, i givim long yu blong mekem yu kam moa gud long fasin blong talemaot gud nyus. Taem yu mekem ol samting we yu lanem i wok, bambae yu mo ol narafala tu, i luksave se yu stap kam gud moa. (Lukluk 1 Timote 4:15.) I gud we yutufala i joen tugeta plante taem long wok blong prij, mo joen long ol defren haf blong wok ya, olsem tekem jans blong prij. Be tu, i gud blong luk wanem haf blong wok ya we yu nidim blong kam gud moa long hem, ale, traehad long hem.
9 Elda we i lukaot long wok blong prij bambae i intres tumas long traehad we yu mekem blong kam moa gud. Sam samtaem, bambae hem i storeyan wetem brata we i lidim Buk Stadi, blong save sipos yu yu stap kasem gudfala frut from program ya. Taem seket elda i visitim kongregesen, bambae hem i halpem yu tu.
10 Jeova i wantem se ol man blong hem oli kasem gudfala trening mo oli “savegud ol rod blong mekem ol gudfala wok.” (2 Tim. 3:17) Tingbaot program ya “Ol Paenia Oli Givhan long Ol Narafala” olsem wan nambawan presen we i save halpem eniman we i rili wantem kamgud moa long wok blong prij. Sipos yu kasem jans blong joen long program ya, yu mas gat tangkyu from, mo yu mas wok wetem tingting daon mo glad.