Ansa Long Wan Kwestin
◼ ?Yumi mas tingbaot haftaem paenia olsem wanem?
Yumi mas tingbaot haftaem paenia olsem wan gudfala wok mo wan impoten responsabiliti. I gat plante taosen pablisa we evri manis oli naf blong mekem wok olsem haftaem paenia, mo sam oli gohed nomo blong mekem olsem. Mifala i tinghae long ol pablisa ya we oli gat taem blong mekem 60 haoa, olsem mak we oli mas kasem long wok blong prij evri manis taem oli stap wok strong olsem ol haftaem paenia. Ol elda mo ol narafala oli mas leftemap tingting blong ol pablisa we oli givim nem blong olgeta blong mekem haftaem paenia blong oli tingbaot wok ya olsem wan impoten wok, mo oli mas lukaot long tingting we i save pulum olgeta blong no stap kea long wok ya.
Olsem ol fultaem paenia, olgeta we oli wantem blong mekem haftaem paenia long wan no moa manis oli mas kaontem praes fastaem. (Luk 14:28) Samting ya i minim se oli mas skelemgud fastaem blong luk sipos oli naf blong kasem haoa we oli mas kasem, be long semtaem oli no lego ol narafala kristin responsabiliti blong olgeta. Wan man we i wantem mekem haftaem paenia, i mas mekem disisin ya afta we hem i prea mo skelemgud ol samting long laef blong hem. Man we i givim nem blong hem blong mekem paenia, i no mas mekem from ol narafala oli mekem wok ya. Hem i mas wan desisin we hem i tingting gud long hem we i wan plan we hem i mekem blong save kasem ol mak we hem i mas kasem. Hem i impoten blong ridimgud pepa blong askem haftaem paenia mo mekem desisin long hat blong hem wan blong hem rili talem yes long mak we hem i mas kasem.
I tru, i nidim blong traehad moa. Sam manis blong yia oli mekem se yumi “stap oltaem nomo” long wok blong prij. (Ol Wok 18:5) Hemia olsem taem blong Memoriol long Maj mo Epril mo manis we seket elda i visitim kongregesen. Plante pablisa oli glad blong stretem olgeta wanwan blong folem wan program we i save pulum olgeta blong joen moa long wok blong prij long ol spesel taem ya blong wok, taem oli luksave se plante taem ol rij blesing oli save kamaot from. (2 Korin 9:6) Plante pablisa oli traehad blong paenia long taem blong holidei blong olgeta mo ol manis we oli gat faef ful wiken long olgeta. Be taem oli putum nem blong olgeta, oli luksave nid blong folem rul ya se ‘Yes blong yufala i mas minim yes nomo’ taem oli traehad fulwan blong mekem 60 haoa no moa long evri manis we oli mekem wok olsem haftaem paenia.—Matyu 5:37.
Ol pablisa we oli no save mekem paenia oli save rere blong mekem sam stret plan blong wok wetem ol haftaem paenia. Bambae i halpem olgeta bigwan taem oli stap longtaem wetem ol paenia long wok blong prij sipos oli gat jans blong mekem olsem. Ol paenia oli save haremgud sipos ol narafala pablisa oli prij wetem olgeta long eli moning, let long aftenun, no let long sapa. Ol haftaem paenia oli glad sipos ol narafala oli askem olgeta blong wok wetem olgeta blong mekem sam visit mo statem sam Baebol stadi. Olgeta we oli rere blong sapotem ol haftaem paenia oli save kasem bigfala glad we i kamaot long fasin blong givim.—Ol Wok 20:35.
I gud tumas blong luk hadwok ya we plante haftaem paenia oli stap mekem. Olgeta we oli gat jans blong joenem olgeta oli save kasem plante rij blesing. (Prov. 10:4) ?Wetaem bambae yu save joen blong mekem moa gudfala wok olsem haftaem?