!Yumi Leftemap Fasbon Blong Jeova!
1 Long Sande, Naesan 9, 33 K.T., wan bigfala hif blong man we oli holem ol han blong pamtri long han blong olgeta oli ona long fasbon pikinini boe blong Jeova, Masta Jisas Kraes, olsem ‘Hemia we i kam olsem King long nem blong Jeova.’ (Luk 19:38; Hib. 1:6) Long Mande mo Tusde, Naesan 10 mo 11, Jisas i bin stap bisi fulwan long pablik minista wok blong hem, hem i mekem ol laswan dei blong hem oli bisi moa bitim ol narafala dei long laef blong hem long wol.
2 Tede, wan hif blong ol man we i bigfala moa we oli gat samting olsem han blong pamtri long han blong olgeta oli singaot wetem bigfala voes se: “God ya blong yumi, we i stap sidaon long bigfala jea blong hem, wetem Smol Sipsip ya, tufala ya nao i wokem rod blong sevem mifala.” (Rev. 7:9, 10) Long Maj 26, bambae yumi joen wanples blong mekem lafet blong Memoriol blong ded blong Kraes. Taem dei ya i stap kam kolosap, ?yumi save wok strong moa mo joen long bigfala singaot ya blong leftemap nem blong God long minista wok we i stap gohed long olgeta ples long wol?
3 Mekem Moa Long Wok Blong Prij: Plante pablisa oli bin joen finis long wok blong haftaem paenia long Maj. ?Yu laekem blong joen wetem olgeta? Sipos yes, yu no wet blong givim nem blong yu. Wan long ol elda bambae i glad blong ansa long eni kwestin we yu gat long saed blong wok ya.
4 Nating se yu save mekem haftaem paenia no no gat, bambae yu wantem joen fulwan long minista wok long Maj. Maet kongregesen i mekem plan blong wok blong prij evri dei long manis ya. Ol elda oli mas mekem sua se i gat inaf teritori oli stap blong taem ya.
5 Ol kongregesen oli mas mekem plan blong spesel miting blong wok blong prij long Sarede, Maj 26. Nating se i gat plante samting blong rere long Memoriol, i gud se olgeta we oli save joen long wok blong prij long Sarede moning ya, oli mekem olsem. Antap long wok blong prij long ol haos wanwan, yu mas sua se olgeta we yu invaetem olgeta blong kam long Memoriol oli gat transpot mo oli savegud long taem mo ples blong miting.
6 Invaetem Mo Leftemap Tingting Blong Ol Narafala: Jisas i givim oda long ol man blong hem se: “Yufala i mas stap mekem samting ya blong tingbaot mi bakegen.” (1 Kor. 11:24) Taem olgeta we oli folem Jisas we tabu speret i makemaot olgeta oli obei long oda ya, evri man blong wok blong Jeova oli save kam mo mekem lafet blong Memoriol. Wetem ol narafala, yu mas invaetem ol Baebol studen, ol famle, olgeta we yu bin storeyan long olgeta long Baebol, ol hasban mo waef we oli no gat sem bilif, mo ol wok fren blong yu. Mekem wan lis blong mekem se yu no mestem wan long olgeta.
7 Bambae i gat jans tu blong leftemap tingting blong ol man we oli intres long taem blong Memoriol. Yu mas sua blong kam eli blong mekem se yu save mekem welkam long ol nyuwan we i fastaem blong olgeta blong kam. Sipos plante long ol Baebol studen blong yu oli kam, maet i moa gud se wan nara pablisa i save sidaon wetem sam long olgeta long taem blong miting. Invaetem ol nyuwan we oli kam blong oli kam long Pablik Miting we kongregesen i stap mekem oltaem. Elda we oli jusum blong mekem pablik tok i mas reregud blong hem i save givim wan tok we i pusum man blong mekem i wok long laef blong hem.
8 !Long en blong lafet blong Memoriol, taem yumi joenem voes blong yumi blong singsing long sing 105, “!Yumi Leftemap Fasbon Blong God!,” yumi save tingtingbak wetem glad long wan manis we yumi wok strong long tiokratik wok blong presem Jeova!