Ansa Long Wan Kwestin

◼ ?Olsem wanem yumi save givim ol gudfala ansa long ol miting?

Yumi glad tumas blong joen tugeta long ol miting blong kongregesen evri wik. Long ples ya, yumi gat jans blong talemaot bilif blong yumi mo leftemap tingting blong ol narafala, taem yumi givim ansa. (Prov. 20:15; Hib. 10:​23, 24) Yumi mas tingbaot fasin blong givim ansa olsem wan nambawan blesing, mo traehad blong givim ansa evri taem. ?Olsem wanem yumi save givim ol gudfala ansa?

Faswan samting i blong reregud. I impoten blong ridim mo tingting dip long ol haf blong miting, samtaem bifo long miting. Traem kasem dip mining blong ol save long miting. Maet oli bin tokbaot sem save long wan miting bifo finis, be traem lukaot sam poen we oli givim moa mining no mekem i moa klia. Tingbaot bigfala tingting biaen long save ya. Taem yu mekemrere ol ansa long wan buk olsem Revelation Climax buk, we i olsem wan dip stadi blong wan buk blong Baebol, traem luksave olsem wanem wan vas i joen wetem ol vas raonabaot long hem. Sipos yu folem ol advaes ya, bambae yu lanem blong tingting long fasin we i moa dip. Bambae samting ya i givhan long yu blong mekemrere ol gudfala ansa mo kasem glad taem yu givim ansa.

Ol nambawan ansa oli sot nomo, i isi blong kasem save long olgeta, mo oli stanap long buk we yumi stap yusum long miting. I gud se faswan blong givim ansa, i ansa long kwestin stret. Hem i save livim ol narafala poen blong ol narafala we oli givim ansa biaen. I moagud blong no givim ol ansa we oli longfala, mo oli tokbaot plante samting. Oli save tekem plante taem mo mekem se ol narafala oli no gat jans blong ansa. Ansa long ol prapa tok blong yu, bitim we yu ridimaot ansa blong yu stret long buk. Olgeta we oli givim ansa biaen, oli save tokbaot sam poen we oli kamaot long ol vas blong Baebol we oli stap. Lesingud long ansa blong ol narafala, blong yu no talem sem poen bakegen.

I gud blong leftemap han blong yu plante taem lelebet, be i no long evri haf. Mifala i leftemap tingting blong ol yangfala blong givim ansa tu. Sipos yu fraet blong givim ansa, yu save go luk brata we i lidim miting, bifo we miting i stat. Nao talem long hem wanem haf we yu wantem givim ansa long hem. Ating hem i save mekem wan jans blong yu blong ansa.

Yumi evriwan i mas traehad blong gat sam gudfala save blong serem wetem ol narafala, taem yumi givim ansa long ol miting blong kongregesen. Tingbaot, wan gudfala miting i dipen bigwan long fasin blong yumi blong wantem givim ansa, mo blong givim ol gudfala ansa.​—⁠Sam 26:⁠12.