Givim Ansa Blong Bildimap Narafala Long Ol Miting
1 Hibrus 10:24 i leftemap tingting blong yumi blong “stap givgivhan long yumi blong mekem yumi strong blong lavem ol man, mo blong mekem ol gudfala fasin.” Samting ya i minim tu se, yumi givim ol gudfala ansa long miting, blong bildimap narafala long saed blong spirit. ?From wanem yumi mas givim ansa? ?Olsem wanem yumi save mekem samting ya? ?Ol ansa ya oli save halpem hu?
2 Ating plante taem yu bin glad taem ol narafala oli givim ansa we i sot nomo be i kliagud, no we i halpem yu blong kasem moa save long wan poen mo i mekem yu strong long saed blong spirit. Be, yu tu, yu gat jans blong givim ansa blong mekem narafala i strong. Taem yu givim ansa, yu stap soemaot se yu rili wantem ‘givhan long narafala blong kasem paoa ya we tabu spirit i stap givim’ blong leftemap tingting blong olgeta we oli stap long miting ya.—Rom 1:11, 12.
3 Olsem Wanem Blong Givim Ol Gudfala Ansa: I no nid blong givim ol longfala ansa we yu kavremap olgeta poen insaed long wan paragraf. Plante taem, ol ansa we oli longfala tumas, oli no makem impoten poen we i stap long wanwan paragraf, mo i mekem ol narafala oli no gat jans blong ansa. Oltaem, faswan ansa blong wan paragraf i mas sot mo stret long kwestin we i stap. Olgeta we bambae oli ansa biaen, oli save ademap sam narafala tingting long saed ya no oli save tokbaot sam long ol vas we oli stap long paragraf ya. Lukluk School Guidebook, pej 90-92.
4 Sipos yu fraet lelebet blong givim ansa, reregud long haos fastaem. Ale, askem brata we bambae i lidim stadi, blong hem i jusum yu blong ansa long paragraf we yu rerem finis. Afta we yu mekem samting ya plante taem lelebet, maet bambae yu faenem i moa isi blong givim ansa. Tingbaot se Moses mo Jeremaea oli bin fraet tu, from we oli no naf blong toktok long fored blong plante man. (Eks. 4:10; Jer. 1:6, futnot) Be Jeova i halpem tufala blong kam inaf blong talemaot ol tok blong Hem. Taswe, yu save sua se bambae Jeova i halpem yu tu.
5 ?Ol Ansa Blong Yu Oli Save Halpem Hu? Ol ansa we yu givim oli save givhan bigwan long yu fastaem, from we oli mekem se trutok i stap strong long tingting mo hat blong yu. Nao biaen bambae i isi moa long yu blong rimemba ol impoten save taem yu nidim. Mo tu, ol ansa blong yu oli save givhan bigwan blong bildimap ol narafala we oli lesin. I rili leftemap tingting blong yumi taem, olgeta we oli gat save, ol yangfala, olgeta we oli sem, ol niuwan, yes evriwan, i joen blong talemaot bilif blong hem long ol miting blong kongregesen.
6 ‘Ol tok we yumi talem long stret taem blong hem, oli save mekem narafala i harem gud.’ !Yumi save mekem olsem taem yumi givim ansa blong bildimap narafala long ol miting!—Prov. 15:23.