!Ol Papa Mama We Oli Glad Tumas!

¹ Sipos yu yu wan yangfala we yu stap long wan Kristin famle, i gat wan spesel rod blong yu save mekem papa mama blong yu i glad tumas. Sipos yu folem rod we i stret, “papa mo mama blong yu bambae tufala i haremgud tumas.” (Prov. 23:​22-25) Tufala i wantem se yu gat wan nambawan laef. I no gat wan samting we i save mekem tufala i glad moa, bitim we tufala i luk yu yu bilif fulwan long trutok, mo yu givim laef blong yu i go long Jeova.

² Yu save glad se papa mama blong yu, tufala i stap long trutok. Stat taem yu bon, tufala i givim kakae, klos mo haos long yu, mo tufala i lukaot long yu taem yu sik. Samting we i moa impoten, tufala i traehad blong tijim yu long saed blong Jeova mo ol stret rod blong hem. Hemia trening we i save halpem yu blong kasem laef we i no save finis. (Efes. 6:​1-4) ?Olsem wanem yu save soem fasin tangkyu?

³ Bilif Fulwan Long Trutok: Papa mama blong yu, tufala i bin traehad blong tijim yu blong tinghevi long trutok, blong gru long saed blong speret, mo blong stap kolosap long ogenaesesen blong Jeova. Yu save soem fasin tangkyu blong yu taem yu intres gud long famle stadi, we tufala i no nidim blong fosem yu. Soem se yu wantem go long ol miting. Yu wan yu save rere long ol miting bifo we tufala i talem long yu, blong mekem se famle i save kasem miting long stret taem. Sidaon wetem papa mama blong yu long ol miting, mo folem miting long buk we oli stap stadi long hem, blong soem se yu stap lesingud. Givim ansa blong soem se yu traehad blong joen long ol miting. Soem se yu glad blong stap olsem wan studen blong Tiokratik Skul. Akseptem ol tok we oli givim long yu, mo mekem olgeta long beswan fasin blong yu. Talem long ol brata se yu glad blong mekem ol smol wok raonabaot long Haos Kingdom. Long ples ya, yu save givhan bigwan. Fasin blong joen long ol wok olsem, i save mekem se hat blong yu i stap strong long ol samting we oli gud long yu long saed blong speret.

⁴ Putum Ol Mak Blong Gohed: Traehad blong joen long wok blong prij long fasin we i gat mining. Soem se yu wantem kam naf blong kam wan pablisa. Folem program blong ridim Baebol evri wik, no samting we i moagud, ridim ful Baebol yu wan. Mekem disisen blong kasem ol mak we yu kam naf blong givim laef blong yu long Jeova mo tekem baptaes. Papa mama blong yu, tufala i save halpem yu blong mekemgud program blong yu blong skul, wetem tingting blong kasem ol trening we i save givhan long yu blong joen fulwan long wok blong Jeova. Wokhad blong kasem wan gudnem we bambae i pulum ol narafala blong agri se yu naf blong kasem ol spesel wok, olsem wok blong paenia no Betel. (Wok 16:​1, 2) Taem yu kasem ol mak ya, samting ya i save halpem yu blong ‘jusumaot ol samting we oli impoten moa. Nao laef blong yu bambae i fulap long ol stret fasin.’​—Fil. 1:​10, 11.

⁵ Taem yu yu yangfala, hemia taem blong lanem ol samting, kasem ekspiryens, mo faenem ol rod blong joengud wetem ol narafala. Hemia taem we yu save haremgud long laef, we yu no gat ol wari mo responsabiliti we ol olfala oli gat. Solomon i talem se: “Yangfala man, yu mas haremgud long yang taem blong yu. Mo yu mas letem hat blong yu i mekem i gud long yu long ol yia we yu yu yangfala yet.” (Ekles. 11:9) Sipos yu putum hat blong yu long wok blong Jeova taem yu yangfala, bambae yu kasem ol blesing we oli no save finis.​—1 Kron. 28:9.

⁶ Sipos yu “traehad blong mekem ol stret fasin” bitim we yu “folem ol krangke fasin blong ol yangfala,” bambae yu mekem se laef blong papa mama blong yu i no hevi from wari mo fasin blong harem nogud. (2 Tim. 2:22) Bambae yu gat risen blong haremgud long prapa hat blong yu tu. (Prov. 12:25) Bigfala samting se, bambae yu givim glad long Man ya we i Wokem yu, Jeova God.​—Prov. 27:11.