Halpem Ol Man Blong Kasem Save Long Saed Blong Trufala God
1 Jisas i prea long Papa blong hem se: “Hemia laef ya we i no save finis, we man i save yu, we yu nomo yu God tru, mo we man i save mi ya, Jisas Kraes, we yu yu sanem mi mi kam.” (Jon 17:3) !Hemia wan bigfala pei ya! Taem yumi yusum buk ya Save Blong Lidim Yu Long Laef We i No Save Finis, yumi save givhan long ol narafala blong lanem wanem we oli mas mekem blong kasem laef we i no save finis. Buk ya Save i eksplenem trutok long klia mo isi fasin, blong halpem ol man blong kasem ol samting we Jeova i wantem tijim long olgeta. Long manis ya, yumi mas traem storeyangud wetem ol man, blong mekem se oli wantem ridim buk ya. Hemia nao sam rod we yu save yusum. Yu no mas traem lanem ol tok ya baehat, be traem yusum prapa toktok blong yu blong talem ol bigfala poen, olsem prapa fasin blong yu blong storeyan.
2 Maet yu yusum wan rod blong storeyan we i tokbaot Baebol olsem wan buk blong lidimgud yumi:
◼ “Mifala i stap storeyan wetem ol man raonabaot long mifala long saed blong weples yumi save faenem advaes blong lidimgud yumi blong winim ol trabol long laef. Long taem bifo, plante man oli lukaot advaes long Baebol fastaem. Be naoia, tingting blong ol man i jenis. Plante man oli no moa bilif fulwan long Baebol, oli ting se hem i wan buk we ol man nomo oli raetem. ?Wanem tingting blong yu? [Wet long ansa.] I gat wan gudfala risen from wanem yumi save talem se Baebol i stretgud long taem blong yumi. [Ridim 2 Timote 3:16, 17.] Ol rul blong Baebol oli stret naoia olsem we oli stret long taem we God i lidim ol man blong raetem olgeta.” Openem buk ya Save i go long pej 16, nao toktok smol long ol gudfala advaes long Bigfala Tok blong Jisas antap long Hil. Ridim tok blong sam haeman we i stap long haf 11 mo 13. Askem man blong karem buk, nao mekem plan wetem hem blong kambak bakegen blong ansarem kwestin ya: ?Olsem wanem save blong Baebol i save givhan long yumi wanwan?
3 Yu save gobak long olgeta we oli intres long poen ya se Baebol i wan gudfala buk blong lidim yumi, mo askem olgeta blong stadi:
◼ “Lastaem, yumitu bin tokbaot from wanem yumi save trastem Baebol olsem wan buk blong lidimgud yumi. From we Baebol i kamaot long God, hem i givim trufala hop mo i mekem yumi haremgud, olsem wan aposol blong Kraes i talem. [Ridim Rom 15:4.] Long en blong laswan storeyan blong yumi, mi stanemap kwestin ya, ?Olsem wanem save blong Baebol i save givhan long yumi wanwan?” Ridim haf 18 long pej 11 blong buk ya Save. Talem se ol Wetnes blong Jeova oli stap mekem bitim faef milyan Baebol stadi long wol, blong halpem ol man long evri ples blong kasem save ya blong lidim olgeta long laef we i no save finis. Talem se bambae yu soem long hem kwiktaem, olsem wanem yumi mekem stadi. Yusum haf 1 kasem 5 long japta 1.
4 Bighaf blong ol man oli bin lusum wan we oli laekem hem tumas long ded, taswe yu save tokbaot hop blong laef bakegen. Fastaem yu save talem samting olsemia:
◼ “Bighaf blong yumi i bin lusum wan we yumi laekem hem tumas long ded. ?Yu bin tingbaot sipos bambae yu luk hem bakegen samtaem? [Wet long ansa.] Fastaem, God i no gat tingting se bambae man i ded. Jisas i pruvum se olgeta we yumi laekem olgeta tumas we oli ded, oli save girap bakegen. [Ridim Jon 11:11, 25, 44.] Nating se samting ya i hapen plante handred yia bifo, hem i soemaot samting we God i promes blong mekem long yumi. [Openem buk ya Save i go long pija long pej 85 mo ridim tok kolosap long pija. Nao soem pija long pej 86 mo tokbaot smol.] Sipos yu laekem blong ridim moa long saed blong hop ya we i mekem yumi haremgud, mi mi glad blong livim buk ya wetem yu.”
5 Taem yu gobak long wan we yu bin tokbaot laef bakegen wetem hem, yu save gohed blong storeyan wetem hem long rod ya:
◼ “Ating yu rimemba we yumi bin tokbaot se, fastaem God i no gat tingting ya se bambae man i ded. Sipos samting ya i tru, ?from wanem yumi kam olfala mo yumi ded? Samfala totel oli laef blong bitim 100 yia, mo sam tri oli laef blong plante taosen yia. ?From wanem ol man oli laef blong 70 no 80 yia nomo? [Wet long ansa.] Ded i kasem yumi from we faswan man mo woman tufala i no obei long God.” Ridim Rom 5:12. Openem Save buk i go long pej 53 mo ridim nem blong japta. Tokbaot haf 1 kasem 3, mo soem ansa blong ol kwestin we oli stap. Mekem plan blong kambak bakegen blong tokbaot ol narafala haf long japta ya. Askem man blong haos blong traem ridim ol haf ya bifo we yu kambak.
6 Tingting long saed blong laef we i no save finis, i wan nyufala tingting long bighaf blong ol man. Taswe, maet fastok ya i pulum olgeta blong lesin:
◼ “Mifala i stap askem wan kwestin long ol man. Sipos yu gat jans blong stap laef blong olwe long wan wol olsem hemia, ?bambae yu tekem jans ya? [Soem pija long pej 4 mo 5 blong Save buk. Wet long ansa.] Hemia nao gudfala samting ya we yu save kasem. ?Be yu ting se yu mas mekem wanem blong kasem laef olsem? [Wet long ansa.] Traem luk wanem samting yu mas mekem folem tok blong Jon 17:3. [Ridim.] Buk ya i stap givhan long plante man blong kasem spesel save ya. Praes blong buk ya hemia 130 VT nomo. ?Yu yu glad blong karem wan blong yu? [Wet long ansa.] Taem mi pas bakegen, yumi save tokbaot from wanem i stret blong bilif se yumi save kasem laef we i no save finis long wol ya nomo.”
7 Taem yu gobak long olgeta we yu bin tokbaot Jon 17:3 wetem olgeta, maet yu talem olsem:
◼ “Taem mi kam luk yu bifo, mi bin ridim nambawan tok blong Jisas long Jon 17:3, we hem i promes se yumi save kasem laef we i no save finis sipos yumi kasem save long saed blong God. Be plante man oli bilif se bambae yumi kasem wan laef we i moagud taem yumi go long heven nomo. ?Wanem tingting blong yu? [Wet long ansa.] Sipos buk ya we mi bin livim wetem yu i stap kolosap, mi glad blong soem long yu sam vas blong Baebol we oli pruvum se Paradaes bambae i kambak bakegen long wol ya. [Tokbaot haf 11-16 long pej 9 mo 10 blong Save buk.] Taem mi kam luk yu bakegen, bambae mi soem from wanem yu save trastem ol promes ya blong Baebol. Bifo we mi kambak, i gud sipos yu save ridim japta 2 blong buk ya.”
8 Sipos yumi yusumgud buk ya Save, bambae hem i givhan long yumi blong seremaot stret save we bambae i givim blesing long ol man. (Prov. 15:7) Olgeta we hat blong olgeta i stret, bambae oli haremgud tumas. Mo bambae oli gat strong risen blong folem ol stret fasin blong Jeova long laef blong olgeta. Samting ya bambae i lidim olgeta blong kasem laef we i no save finis.