“Hemia Laef Ya We i No Save Finis”
1 Tok blong Jisas long Jon 17:3 i impoten tumas. !Jisas i minim samting we hem i talem—hemia se, save long saed blong God mo Kraes bambae i givim laef we i no save finis! ?Be sipos yumi gat save long Jeova mo Jisas, samting ya nomo bambae i givim laef we i no save finis long yumi? No gat. Ol man Isrel tu oli save se Jeova i God blong olgeta. Be fasin blong laef blong olgeta i no soem se oli bilif strong long samting ya. Taswe, God i no moa glad long olgeta. (Hos. 4:1, 2, 6) Tede, plante milyan man oli ‘wantem God tumas, be oli no save prapa rod blong faenem hem.’ (Rom 10:2) Oli mas kasem save long Jeova, ‘we hem nomo i God tru,’ mo oli mas kasem save long stret rod blong wosip long hem. Blong givhan long olgeta blong mekem olsem, long Novemba, bambae yumi seremaot buk ya Save Blong Lidim Yu Long Laef We i No Save Finis. ?Bambae yu yusum wanem toktok blong seremaot Save buk ya? Hemia sam rod blong storeyan we maet oli givhan long yu.
2 Tingting long saed blong laef we i no save finis, i wan nyufala tingting long bighaf blong ol man. Taswe, maet fastok ya i pulum olgeta blong lesin:
◼ “Mifala i stap askem wan kwestin long ol man. Sipos yu gat jans blong stap laef blong olwe long wan wol olsem hemia, ?bambae yu tekem jans ya? [Soem pija long pej 4 mo 5 blong Save buk. Wet long ansa.] Hemia nao gudfala samting ya we yu save kasem. ?Be yu ting se yu mas mekem wanem blong kasem laef olsem? [Wet long ansa.] Traem luk wanem samting yu mas mekem folem tok blong Jon 17:3. [Ridim.] Buk ya i stap givhan long plante man blong kasem spesel save ya. Praes blong buk ya hemia 130 VT nomo. ?Yu yu glad blong karem wan blong yu? [Wet long ansa.] Taem mi pas bakegen, yumi save tokbaot from wanem i stret blong bilif se yumi save kasem laef we i no save finis long wol ya nomo.”
3 Taem yu gobak long olgeta we yu bin tokbaot Jon 17:3 wetem olgeta, maet yu talem olsem:
◼ “Taem mi kam luk yu bifo, mi bin ridim nambawan tok blong Jisas long Jon 17:3, we hem i promes se yumi save kasem laef we i no save finis sipos yumi kasem save long saed blong God. Be plante man oli bilif se bambae yumi kasem wan laef we i moagud taem yumi go long heven nomo. ?Wanem tingting blong yu? [Wet long ansa.] Sipos buk ya we mi bin livim wetem yu i stap kolosap, mi glad blong soem long yu sam vas blong Baebol we oli pruvum se Paradaes bambae i kambak bakegen long wol ya. [Tokbaot haf 11-16 long pej 9 mo 10 blong Save buk.] Taem mi kam luk yu bakegen, bambae mi soem from wanem yu save trastem ol promes ya blong Baebol. Bifo we mi kambak, i gud sipos yu save ridim japta 2 blong buk ya.”
4 Long ol man we oli strong lelebet long saed blong skul, maet yu wantem yusum toktok ya:
◼ “Mifala i stap storeyan wetem ol man long kwestin ya, se from wanem i gat plante defren skul long wol. I gat bitim 10,000 skul long fulwol. Be, i gat wan Baebol nomo. ?Long tingting blong yu, from wanem i gat ol defren tingting ya long saed blong skul? [Wet long ansa. Openem Save buk i go long japta 5, mo ridim haf 1.] Bambae yu kasem wan gudfala ansa blong ol kwestin ya taem yu ridim japta ya. Mi glad blong livim buk ya wetem yu sipos yu glad blong ridim.” Sipos man i karem buk ya, putum wan stret taem blong kambak bakegen, nao talem se: “Taem mi kambak, ating yumi save tokbaot sipos olgeta skul oli stap lidim yumi evriwan long sem rod nomo.”
5 Taem yu gobak blong storeyan moa long kwestin ya se from wanem i gat plante tumas skul, yu save talem se:
◼ “Taem yumitu storeyan bifo, mi stanemap wan kwestin se, ?olgeta skul oli stap lidim yumi evriwan long sem rod nomo? ?Wanem tingting blong yu? [Wet long ansa.] Mi glad blong soem tok blong Jisas we i ansarem kwestin ya. Hem i stap long buk we mi bin livim wetem yu lastaem. [Openem Save buk i go long japta 5, mo ridim haf 6 mo 7, wetem Matyu 7:21-23.] Maet yu stap tingbaot from wanem i impoten blong kasem stret save long saed blong samting we God i wantem. Bambae yu luk se ol haf we oli kam biaen, oli givim plante save long yu. Plis ridim ol haf ya. Taem mi kam luk yu bakegen, bambae mi glad blong soem from wanem i impoten blong kasem stret save long saed blong Baebol.”
6 Plante taem i gud blong askem stret long man sipos hem i wantem stadi Baebol. Hemia wan fastok we i stap long pej 12 blong “Reasoning” buk:
◼ “Mi stap askem long ol man sipos oli wantem stadi Baebol long haos blong olgeta, we oli no pem. Sipos yu glad, bambae mi tekem smoltaem naoia blong soem long yu olsem wanem plante famle long bitim 200 kantri blong wol oli stap storeyan tugeta long saed blong Baebol long haos blong olgeta. [Soem nem blong ol japta long Save buk.] ?Weswan japta nao we yu yu intres long hem?” Wet long man blong haos blong jusum wan japta. Openem buk i go long japta ya, mo statem stadi long faswan haf.
7 Hemia wan narafala rod we yu save traem, blong askem stret long man sipos hem i wantem stadi Baebol:
◼ “Mi mi stap givim ol lesen long saed blong Baebol we ol man oli no pem, mo i gat ples i stap yet long program blong mi blong sam moa studen. Mifala i yusum buk ya blong givhan blong stadi Baebol. [Soem Save buk.] Kos i gohed blong sam manis nomo, mo i ansarem ol kwestin olsem: ?From wanem God i letem ol man blong oli harem nogud? ?From wanem yumi kam olfala mo yumi ded? ?Wanem i hapen long ol fren mo famle blong yumi we oli ded finis? ?Mo olsem wanem yumi save kam kolosap long God? ?Yu glad sipos mi soem long yu olsem wanem mifala i mekem Baebol stadi ya?” Sipos man blong haos i no wantem, askem hem blong karem Save buk mo ridim hem wan.
8 !Stret save long saed blong God mo Kraes i wan samting we i sas tumas long olgeta we oli kasem! Save ya i rili save givim laef we i no save finis long wol ya, taem hem i kam stret olgeta. Yumi mas yusum olgeta jans long Novemba, blong serem ol save ya we i blong lidim ol man long laef we i no save finis.