Laef i Stap Jenis
1 Baebol i talem se ‘wol ya wetem ol fasin blong hem oli stap jenis.’ (1 Kor. 7:31) !Samting ya i tru tumas tede! Long ol yia we yumi bin stap laef, yumi luk ol bigfala jenis long tingting mo fasin blong ol man, nating se oli rij no oli pua. Sipos yumi wantem se oli lesin long mesej blong Kingdom, ol tok blong yumi oli mas laenap wetem ol samting we oli stap jenis long wol ya. Yumi wantem talemaot gud nyus long fasin we ol man oli intres long hem mo i kasem hat blong olgeta.
2 Bifo, long plante kantri, wok blong prij i defren. Bigfala risen se, bighaf blong ol man oli gat gudfala laef, mo oli harem se oli sef. Skul i impoten tumas long laef blong olgeta. Oli tinghae long Baebol. Long taem ya, long wok blong prij, plante taem yumi ansarem ol kwestin blong ol man long saed blong ol tijing blong Baebol. Tede, laef blong ol man i fulap long trabol. Oli laf nomo long ol skul. Sam nomo oli bilif long Baebol. Mo plante man, tingting blong evolusen i mekem se oli no moa bilif long God.
3 Wan elda we i goraon blong visitim ol kongregesen i talem se: “Naoia, i gat plante tumas trabol mo hadtaem long laef blong ol man, taswe i luk olsem we yumi mas tijim olgeta olsem wanem blong laef.” Oltaem ol man oli wari fastaem long saed blong laef blong olgeta, famle blong olgeta, mo ol samting we oli tingting tumas long hem. Hemia ol samting we oli tokbaot taem oli joen wanples. Yumi mas tingbaot samting ya taem yumi stap prij.
4 Kingdom Blong God Nomo i Trufala Hop Blong Fyuja: Bighaf blong ol man oli no rili trastem ol gavman blong man. Oli harem se oli no save luk wan gudfala wol long laef blong olgeta. Ol gyaman skul oli no givim wan gudfala hop long olgeta. Hemia nao from wanem ol man oli nidim tumas blong harem gud nyus long saed blong Kingdom blong God. Soem long olgeta olsem wanem Kingdom bambae i winim olgeta trabol we ol man oli stap fesem.
5 Baebol Nomo, Yumi Save Dipen Long Hem Blong Lidim Yumi: Tede, ol lida we oli dipen long waes blong man mo ol save blong wol, oli lidim ol man oli go krangke. Ol man oli no luksave yet se “man i no naf blong jusum wanem rod hem i mas wokbaot long hem.” (Jer. 10:23) Nambawan lesen we oli save lanem, se oli mas ‘trastem Jeova wetem olgeta hat blong olgeta mo oli no mas dipen long prapa save blong olgeta.’ (Prov. 3:5) Nating se ol samting long wol oli stap jenis, Baebol i neva jenis. Taswe, taem yumi prij, oltaem yumi mas yusum Tok blong God, mo tijim ol narafala blong gat tangkyu from ol advaes we God i givim blong lidim yumi. (2 Tim. 3:16, 17) Blong mekem olsem, yumi mas soem long ol man oltaem se Baebol i impoten. Yumi save mekem samting ya, taem yumi yusum Baebol long ol storeyan blong yumi, blong ansa long ol kwestin blong olgeta, mo blong soem long olgeta se oli nidim blong stadi long Baebol mo folem ol waes blong hem long laef blong olgeta.
6 Nating se ol samting long wol oli stap jenis, samting we yumi wantem mekem long wok blong prij i stap sem mak oltaem. Yumi mas talemaot gud nyus blong Kingdom, halpem ol man blong trastem Tok blong God, mo givhan long olgeta blong luksave se oli nidim blong stadi long Baebol wetem yumi. Samting we yumi talem i mas laenap wetem laef blong ol man we yumi prij long olgeta. Taem yumi mekem olsem, yumi kam man blong talemaot gud nyus long ol narafala. Olsem nao, yumi save pulum plante moa man blong oli lesin.—1 Kor. 9:19, 23.