Presen Mane Blong Sapotem Wok We i Kam Bigwan Moa Long Olgeta Ples Blong Wol
Olsem Aesea 54:2, 3 i talem, trufala wosip blong Jeova i stap kam bigwan moa long olgeta ples blong wol. Hemia long plante kantri blong Afrika mo long sam aelan kolosap. Long ol ten yia we i pas, sam gavman oli tekemaot tabu we oli bin putum long wok blong Kingdom, long ol kantri olsem Angola, Ekwatorial Gini, Itiopia, Kamarun, Madagaska, Malawi, Mosambik, mo Togo. Long ol ples ya mo sam narafala kantri we i gat plante man oli wantem save trutok, plante handred misinari blong Gilead, ol brata we oli kamaot long Ministeriol Trening Skul, plante memba blong ol Betel famle, mo sam narafala, oli go wok.—Mat. 9:37, 38.
I klia se, namba blong ol man blong mekem trufala wosip we i stap kam antap long ogenaesesen blong Jeova, i mekem se yumi nidim plante handred nyufala Haos Kingdom. Mo tu, yumi nidim blong mekem plan from ol nyufala Haos Asembli mo ol nyufala branj ofis no wok blong mekem sam branj ofis oli kam bigwan moa. Blong wokem ol haos ya mo blong mekem wok blong Kingdom i gohed moa, i no long Afrika nomo, be long plante narafala ples blong wol tu, samting ya i tekem plante mane we ol man oli givim olsem presen, blong givhan long wok blong Sosaeti long olgeta ples blong wol.
Ol pija mo plan long tufala pej blong pepa ya i soem samting we Sosaeti i stap traehad blong mekem long Afrika. Yu save luk sam haos we oli stap wokem naoia mo sam we bambae oli wokem i no longtaem.
Taem yu ridim ripot long wok blong prij long 1996 Yearbook, yu kasem save moa long wok blong prij we ol pablisa oli stap mekem long ol kantri ya. Long plante kantri, namba blong ol man we oli kasem trutok i stap kam antap bigwan, mo bigfala namba we oli kam long Memoriol i soem se plante moa oli save kam long trutok yet. Taem yumi tingbaot wanem i stap hapen long plante narafala kantri long saed blong wok blong prij mo mekem disaepol long olgeta ples blong wol, samting ya i makem long yumi se yumi gat wan nambawan jans blong givim mane blong sapotem trufala wosip long ol kantri ya.—Luk 16:9; 1 Tim. 6:18.
[Tok blong pija long pej 3]
Haos Kingdom we oli bildim long 9 dei long KwaSulu-Natal, Saot Afrika
Haos Kingdom long Naejeria we i no sas tumas
Haos Asembli long Mosambik we i gat 1,500 jea blong hem, mo bambae oli finisim long en blong 1996
Branj ofis long Mosambik, we bambae oli finisim long en blong 1996
Branj ofis long Siera Leon, we bambae oli finisim long hot taem long yia ya
[Tok blong pija long pej 4]
Long Moritas, oli finisim Haos Asembli ya we oli no blokem ol saed blong hem, mo branj ofis ya bambae oli finisim kolosap long hot taem blong 1997
Branj ofis long Simbabwi we oli stap wokem
Long Senegal, oli stap wokem wan Haos Asembli we oli no blokem ol saed blong hem, mo wan nyufala branj ofis
Nyufala branj ofis long bigfala taon blong Kenya, Naerobi
Branj ofis long Madagaska we i no longtaem bambae i finis
Branj ofis we oli wantem bildim long Malawi