Glad Tumas We God i Stap Mekem Ol Man Blong Hem Oli Kam Plante
1 Ol Kristin long faswan handred yia oli wok strong blong talemaot Kingdom. Oli glad tumas taem ‘namba blong ol kongregesen i stap kam antap moa.’ (Wok 16:5) Olgeta ya oli prij strong, go kasem Esia, Yurop, mo Afrika. From samting ya, plante man oli bilif.
2 !Jisas i talemaot se long ol las dei, wok blong prij bambae i kasem ‘olgeta ples blong wol mo olgeta nesen’! (Mat. 24:14) Long 1996, mifala kasem plante nambawan ripot we oli soemaot se wok i gohedgud mo namba blong ol pablisa i kam antap long plante ples blong wol. I gat plante nyufala kongregesen we oli stanap. Bigfala namba ya i mekem se i gat nid blong bildim plante handred nyufala Haos Kingdom mo Haos Asembli, mo mekem hedkwota blong sam kantri oli kam bigwan moa.
3 Kingdom Wok Blong Yumi blong Ogis 1996, i tokbaot bigfala wok blong bildim ol samting ya long Afrika. Wok olsem i stap gohed long plante ples long Latin Amerika tu. Long sevis yia blong 1996, namba blong ol pablisa long Meksiko i go antap kasem 470,098 mo oli mekem 600,751 Baebol stadi. !From samting ya, oli stanemap 466 nyufala kongregesen! Oli stap mekem hedkwota blong kantri ya i kam bigwan moa, mo oli hop se bambae oli finisim wok ya long en blong 1998. Namba i stap kam antap bigwan long plante narafala kantri tu. Taswe oli no save stop blong bildim ol tiokratik haos we oli nidim.
4 I nidim plante mane blong bildim ol haos long evri kantri. Mo long sam kantri, ol brata blong yumi oli no gat plante mane blong sapotem wok ya. Be, from we oli gat strong tingting blong mekem wok blong Jeova, oli rili stap gru long saed blong speret, mo namba blong olgeta i stap gru. Proveb 28:27 i promes se, “hem we i givim samting long puaman, bambae i no sot long wan samting.” Fasin blong yumi blong glad blong givim mane tu blong bildim ol haos, i mekem se ‘olgeta evriwan oli gat naf.’ !From samting ya, olgeta evriwan oli save kasem glad taem oli givim presen i go, mo oli save glad blong luk we Jeova i stap mekem ol man blong hem oli kam plante!—2 Kor. 8:14, 15; Wok 20:35.
[Ol foto]
Hedkwota Blong Paragwae
Hedkwota Blong Ekwado
Hedkwota Blong Meksiko i Kam Bigwan Moa
Hedkwota Blong Dominikan Ripablik
Hedkwota Blong Brasil We Oli Mekem i Kam Bigwan Moa
Hedkwota Blong Urugwae We Oli Stap Bildim
Long Latin Amerika, oli stap bildim plante Haos Kingdom olsem hemia, we oli no sas tumas
1. Brasil
2. Nikaragua
3. Jili
4. Kolombia
5. Meksiko
6. Brasil
7. Peru
8. Veneswela
9. Meksiko