Olgeta We Oli Lidim Kongregesen—Sekretari
1 Sekretari blong kongregesen i gat wan wok we i impoten tumas from we hem i lukaot se evriwan i “mekem olgeta samting long fasin we i stret gud, we ol man oli glad long hem.” (1 Kor. 14:40) Hem i memba blong Sevis Komiti blong kongregesen, mo hem i lukaot long ol mesej mo ol impoten ripot blong kongregesen. Bighaf blong ol pablisa oli no luk wok blong hem, olsem oli save luk wok blong ol narafala elda. Be nating se i olsem, yumi haremgud long wok blong hem we i impoten tumas.
2 Sekretari i ridim ol leta we kongregesen i kasem long Sosaeti no ol narafala ples, mo hem i ansarem ol leta ya taem i stret blong mekem olsem. Hem i meksua se ol elda oli ridim ol leta ya fastaem, nao hem i putumgud olgeta long ol fael, blong yusum olgeta bakegen taem i nidim. Hem i jekem ol oda blong ol magasin mo ol buk, mo hem i sanem olgeta i go long Sosaeti. Hem i lukaot long ol brata we oli mekem wok blong ol kaon mo sabskripsen, mo hem i lukaot tu long olgeta samting we oli joen long ol asembli.
3 Sekretari i mas sanem ripot blong wok blong prij long Sosaeti bifo, no long namba sikis dei blong evri manis. Taswe, i impoten tumas we yumi evriwan i givim kwiktaem ripot blong wok blong prij blong yumi long en blong evri manis. Ale, sekretari i raetemdaon ripot blong prij long pepa blong Ripot blong ol Pablisa blong Kongregesen, mo hem i sanem pepa ya. Evri pablisa i save askem blong luk prapa kad blong ol ripot blong olgeta.
4 Taem wan pablisa i go stap long wan narafala kongregesen, sekretari i mas sanem kad blong ripot blong pablisa ya i go long niufala kongregesen blong hem wetem wan leta we i talemaot se pablisa ya bambae i joenem narafala kongregesen ya. Sipos no, sekretari blong niufala kongregesen bambae i mas askem long kongregesen we pablisa ya i stap long hem fastaem blong sanem pepa ya.—Minista Wok Blong Yumi, pej 100, 101.
5 Sekretari i jekem wok blong ol paenia, mo i letem ol narafala elda, antap moa elda we i lukaot long wok blong prij, oli save long eni problem we maet ol paenia ya oli stap fesem. Hem i givim ol nem blong ol pablisa we oli prij wanwan taem nomo long ol brata we oli lidim ol Buk Stadi blong Kongregesen. Sekretari mo elda we i lukaot long wok blong prij, tufala i lidim wok blong lukaot mo givhan long ol pablisa we oli no moa prij.—Kingdom Wok Blong Yumi, Novemba 1987, pej 1 (Engglis no Franis).
6 Taem yumi save moa long wok blong sekretari, i gud we yumi mekem evri samting we yumi naf, blong bambae wok blong hem i no had tumas.—1 Kor. 4:2.