Wok Blong Paenia​—!Wan Rod Blong Yusum Taem Blong Yumi Long Waes Fasin!

¹ ‘!Mi gat fulap samting finis blong mekem! ?Yu ting se i waes sipos mi statem wok blong paenia long taem olsem?’ Hemia tingting blong wan sista taem hem i harem tok blong wan paenia elda, long wan seket asembli. Nem blong tok ya, “Gohed Long Wok Blong Paenia.” Wan yangfala brata we hem tu i stap lesin long tok ya, i tingting se, ‘?Olsem wanem elda ya i faenem taem blong mekem wok blong paenia? !Mi mi no wan elda, be laef blong mi i bisi finis wetem ol narafala samting!’

² Taem elda ya i gohed blong tokbaot ol blesing blong wok blong paenia, hem i askem kwestin long sam paenia. Ol paenia ya oli tokbaot sam jenis we oli bin mekem bifo we oli mekem wok ya, mo oli talem olsem wanem we Jeova i blesem olgeta bigwan from traehad we oli mekem. Wan long ol paenia ya i handikap, narafala i mared long wan we i no stap long trutok, mo narawan bakegen i bin lego wok blong hem be hem i gat i naf samting blong laef. From ekspiryens blong ol paenia ya we oli soemaot se Jeova i stap halpem olgeta, brata mo sista ya we tufala i stap lesin long tok ya, tufala i stat skelem tingting mo laef blong tufala. Mifala i singaot yu blong mekem sem mak, from naoia we aoa blong ol paenia i godaon, bambae i isi long plante moa pablisa blong gud nius blong joen long wok ya.

³ Yumi save se Jeova i Man we i Wokem Olgeta Samting mo i Hae Rula blong Heven mo Wol, mo se laef blong yumi i kamaot long hem. (Dan. 4:​17; Wok 17:28) Yumi save gud finis se Jeova i stap yusum wan ogenaesesen nomo long wol ya. Yumi gat jans blong wok oltaem wetem ogenaesesen ya mo sapotem ‘slef we i stret mo waes’ long wok blong talemaot Kingdom bifo we en i kam. (Mat. 24:45; 25:40; 1 Pita 2:9) Naoia we klosap yumi kasem en blong ol “las dei,” yumi luksave se smoltaem nomo i stap yet blong prij. (2 Tim. 3:1) Be, long semtaem, yumi mas givim ol samting we famle blong yumi i nidim long saed blong bodi. Laef naoia i no sem mak olsem bifo. Maet mane we wanwan man i kasem i no naf blong pem evri samting we hem i nidim long laef. (1 Tim. 5:8) Maet helt blong yumi i no moa gud olsem fastaem. Mo, i tru tu se yumi wantem gat smoltaem blong spel mo yumi wantem gat sam mane blong mekem samting we yumi wantem. (Pri. 3:​12, 13) Taswe, maet yumi stap tingting sipos i waes blong mekem disisen ya blong joen long wok blong paenia no nogat.

⁴ I stap long yumi wanwan blong skelemgud laef blong yumi mo mekem disisen sipos yumi save paenia no nogat. (Rom. 14:12; Gal. 6:5) I gud tumas blong luk se plante man oli obei long tok ya we i singaot olgeta blong joen long wok blong paenia. Nating se ol lasdei ya oli givim hadtaem mo problem long yumi, ripot blong wok blong prij we i kamaot long 1999 Yearbook i soem se klosap 700,000 man blong Jeova raon long wol oli stap gohed strong long wok blong paenia. Nating se oli gat hadtaem blong kasem mane, oli no gat transpot, oli gat problem blong helt, no maet oli stap fesem sam narafala problem no hadtaem, be ol brata mo sista ya oli no kam slak blong mekem gudfala wok. I stret nomo we yumi presem olgeta from samting ya. (Gal. 6:9) Oli folem tok blong Jeova we i askem olgeta blong testem hem. (Mal. 3:​10, NW) Oli luksave se wok blong paenia i wan waes rod blong yusumgud smol taem mo olting we oli gat. Mo oli luksave se Jeova i rili blesem olgeta from we oli mekem sam jenis long laef blong olgeta blong joen mo gohed long wok blong paenia.

⁵ Ol Paenia Oli Kasem Blesing: Wan sista long Kamerun, we i gat wan smol gel, i eksplenem olsem wanem hem i mekem wok blong paenia. Hem i talem se: “Stat long taem we gel blong mi i bon, mi tekem hem oltaem wetem mi long wok blong prij. Taem we hem i no wokbaot yet, mi karem hem long wan kaliko long baksaed blong mi. Long wan moning, taem mi stap prij, mi stop long saed blong wan rod maket. Nao gel blong mi i tekem sam magasin long basket blong mi mo i wokbaot i go. Hem i go kasem wan narafala rod maket klosap. Nating se hem i no save toktok gud, hem i pulum tingting blong wan woman mo i soem magasin long hem. Woman ya i sapraes tumas blong luk wan smol pikinini olsemia we i joen long wok blong prij. !Ale, hem i glad blong tekem magasin mo i agri blong stadi Baebol tu!”

⁶ Wan elda long Sambia, we i gat wan famle mo i wok fultaem blong winim mane, i harem tok we i singaot ol man blong joen long wok blong haftaem paenia. Nating se hem i bisi finis, hem i mekem disisen blong mekem haftaem paenia. Hem i wantem soem eksampel long ol brata sista long kongregesen mo long famle blong hem. Wan wantaem, hem i putum trak blong hem long saed blong rod mo i plei long wan kaset blong buk ya The Secret of Family Happiness. Hem i singaot ol man we oli pas klosap long trak blong hem, blong oli kam lesin long tok we i kamaot long kaset ya. From samting ya, hem i seremaot 16 buk ya Family Happiness mo 13 Save buk, mo hem i statem tu Baebol stadi.

⁷ Plante brata sista oli joen long wok blong paenia tu, long wan narafala kantri klosap long Simbabwe. Long Epril 1998, wan kongregesen blong 117 pablisa i givim ripot blong 70 haftaem paenia mo 9 fultaem paenia. Wan narafala kongregesen we i gat 94 pablisa i givim ripot se i gat 58 haftaem paenia. Long wan narafala kongregesen bakegen, we i gat 126 pablisa, ripot i soem se 58 brata sista oli joen long wok blong haftaem paenia mo 4 oli fultaem paenia. Long laswan sevis yia, i gat nambawan frut i kamaot long Simbabwe. Nating se ol brata oli bisi tumas long ol wok blong famle, kongregesen, mo wok blong bildim niufala branj ofis, oli traehad blong spenem taem blong olgeta long waes fasin long wok blong prij.

⁸ Ol paenia oli luksave se, blong statem wok blong paenia mo blong gohed long wok ya, oli no save dipen long prapa paoa blong olgeta. Oli faswan blong luksave se wanem samting we oli mekem, hemia i from we oli dipen long “paoa we God i givim.” (1 Pita 4:​11) Bilif blong olgeta i givhan long olgeta blong gohed long minista wok blong olgeta evri dei. Ol paenia we oli karem gudfala frut long wok blong olgeta, oli no lukaot samting we olgeta nomo oli wantem no we olgeta nomo i save harem gud from. Oli luksave se blong gohed long wok ya, oli mas ‘faet agensem plante traem,’ be taem oli mekem olsem, oli kasem plante blesing.​—1 Tes. 2:2.

⁹ Eksampel Blong Pol i Gud Blong Folem: Baebol i tokbaot olgeta wok we aposol Pol i mekem taem hem i prij, mo olsem wanem hem i givhan bigwan long plante man. Yumi save talem se Pol i rili gat plante wok blong mekem. Ol man oli kilim hem mo hem i kasem hadtaem long saed blong bodi, be hem i stanap strong from we hem i wantem gohed blong talemaot gud nius mo mekem ol kongregesen oli strong. Mo tu, hem i gat wan sik we hem i mas faet agensem oltaem. (2 Kor. 11:21-​29; 12:​7-​10) Hem i rili wantem spenem taem blong hem long waes fasin. Hem i luksave se, Jeova nomo i halpem hem blong mekem olgeta wok ya we hem i stap mekem. (Fil. 4:​13) Long olgeta we Pol i givhan long olgeta, i no gat wan we i talem se Pol i bin westem taem mo paoa blong hem long wok blong Jeova, no se i moa gud sipos hem i bin yusum taem mo paoa blong hem blong mekem wan narafala samting. !Tru ya, tede yumi stap harem gud yet from waes fasin we Pol i bin folem blong yusum taem blong hem! Yumi glad tumas from tok we tabu spirit blong God i pusum Pol blong raetem. Tok ya i halpem yumi blong skelem wanem samting long laef blong yumi i impoten moa, ale, yumi save fasgud long trutok naoia we laef i kam strong tumas.

¹⁰ Naoia i “no gat plante taem i stap” blong talemaot gud nius. (1 Kor. 7:​29; Mat. 24:14) Taswe, i stret blong askem long yumi wan se, ‘?Sipos mi save se tumora laef blong mi bambae i finis, mi save talem long Jeova tede se mi bin yusum taem blong mi long waes fasin?’ (Jem. 4:​14) I gud sipos yumi prea long Jeova naoia, mo talemaot long hem se yumi, ol Witnes blong hem, yumi wantem yusum taem blong yumi long waes fasin. (Sam 90:12) Prea long Jeova blong i halpem yu blong mekem se laef blong yu i no fasfas long plante samting. Maet bifo, yu bin talem se yu no save mekem wok blong paenia. Be naoia, ?yu ting se yu naf blong mekem wok ya?

¹¹ Yusumgud Taem We Yu Gat Long Laef Blong Yu: Yumi save se ol samting long laef blong yumi oli defdefren. Taswe, i no yumi evriwan we i save kasem 70 aoa evri manis olsem fultaem paenia, nating sipos yumi wantem mekem olsem. Be, plante pablisa oli mekem plan blong prij 50 aoa olsem haftaem paenia. Samfala oli save mekem wok ya plante taem long wan yia, no oli save gohed blong mekem wok ya evri manis. Sipos ol samting long laef blong yu naoia, oli mekem se yu no save joen long wok blong haftaem no fultaem paenia, yu no mas harem nogud. Gohed blong prea from ol samting long laef blong yu, se oli jenis. Be, sipos i rili no gat rod blong jenisim ol samting long laef blong yu, yu mas tingbaot se Jeova i glad nomo long eni samting we yu yu naf blong givim wetem fulhat blong yu, long wok blong hem. (Mat. 13:23) Hem i luksave se yu stanap strong long saed blong hem, mo se yu stap traehad blong prij oltaem, we neva wan manis i save pas we yu no tekem jans blong prij. Maet yu save traem kamgud moa long fasin blong yu blong prij, blong gat gudhan long wok blong talemaot mo tijim gud nius.​—1 Tim. 4:​16.

¹² ‘Bigfala dei blong Jeova we i mekem man i fraet’ i kam klosap tumas. Taswe, yumi mas yusum smoltaem ya we i stap yet long waes fasin, sipos yumi wantem finisim wok we hem i givim blong yumi mekem. (Joel 2:​31) Setan i save se taem blong hem i sot. Hem i traehad long olgeta paoa blong hem, blong mekem laef blong yumi i fasfas mo blong mekem se yumi no tingting long ol samting we oli rili impoten. (Fil. 1:​10; Rev. 12:12) Yu neva mas ting se Jeova i no intres long yu mo se hem i no save halpem yu blong mekem laef blong yu i stret blong kasem mak ya blong mekem moa long wok blong prij. (Sam 145:16) Yumi glad tumas se, plante we oli lukluk bakegen long ol samting long laef blong olgeta, oli faenem se oli save joen long wok blong haftaem no fultaem paenia. Yes, ol paenia oli kasem bigfala glad from we oli yusum taem blong olgeta long waes fasin. ?Yu yu wantem joen wetem olgeta?