Yusumgud Taem Blong Yu
1 Evriwan long yumi i gat sem namba blong aoa long wan wik. Taem we yumi yusum blong talemaot gud nius i impoten tumas, from we yumi yusum taem ya long wan wok blong sevem laef. (Rom 1:16) Yumi save soem se yumi tinghae long impoten wok ya, sipos yumi rere gud long wok blong prij, kam long miting blong prij long stret taem, mo aot kwiktaem blong go long teritori blong prij. Yumi laekem moa blong stap bisi long wok blong prij, bitim we yumi stap wet. Jeova i tijim yumi se: “Blong evri samting i gat wan taem we i stret long hem.” Taswe yumi mas yusumgud taem ya we yumi spenem long minista wok blong yumi.—Pri. 3:1.
2 Yusum Taem Blong Yu Long Waes Fasin: Yumi save kasem plante blesing sipos yumi gat strong tingting blong holem wan program blong joen oltaem long wok blong prij. I tru se, gudfala frut we i kamaot from minista wok blong yumi, i dipen long hamas taem we yumi spenem long wok blong prij. Sipos yumi jenisim sam samting long program blong yumi, maet yumi save givim moa taem long wok blong prij. Eksampel, afta long wok blong prij long sarede, ?yu save gohed blong mekem sam visit bakegen? No long sande, afta we yu prij smol taem, ?yu save mekem sam visit bakegen no wan Baebol stadi? Mo antap long wok blong prij long ol haos wanwan, ?yu save tekem jans blong prij long rod? Long ol defren rod ya, yumi save mekem minista wok blong yumi i kam gud moa.
3 Taem yumi stap prij, i isi blong westem impoten taem, sipos yumi no lukaot gud. I tru se, taem ples i hot tumas, wan smol spel i save mekem yumi harem gud mo givim paoa long yumi blong gohed. Be yumi mas skelemgud, from we maet samtaem yumi no rili nid blong spel.
4 Long ol yia we oli jes pas, i kam had moa blong faenem ol man long haos blong olgeta. Blong winim problem ya, plante pablisa oli prij long ol haos wanwan long ol defren taem blong dei. ?From wanem yu no traem prij long let aftenun no long sapa?
5 Taem ol pablisa oli tekem jans blong prij long rod oli no save yusumgud taem blong olgeta, sipos oli stap storeyan tugeta. I moa gud sipos yumi stap wanwan mo taem yumi luk wan man i stap wokbaot, yumi go klosap long man ya blong storeyan wetem hem. Long rod ya, yumi yusumgud taem blong yumi mo yumi kasem moa glad long wok blong prij.
6 Tekem Evri Jans Blong Prij: Taem wan woman blong haos i talem long wan witnes se hem i no intres, witnes ya i askem long hem sipos i gat sam narafala man i stap long haos ya we hem i save storeyan wetem olgeta. Samting ya i mekem se witnes ya i gat jans blong storeyan wetem bos blong haos. Man ya i sik longtaem mo klosap oltaem i stap long bed. Hop we Baebol i tokbaot i mekem hem i intres bakegen long laef. !I no longtaem hem i aot long bed, hem i stat kam long ol miting long Haos Kingdom, mo hem i tokbaot niufala hop blong hem wetem ol narafala!
7 Wan yangfala sista, i folem advaes ya blong prij long sapa bifo long Buk Stadi. Long fasfala doa, hem i faenem wan gel we i gat 13 yia. Gel ya i lesin gud mo hem i karem sam buk. Nekis dei long skul, yangfala sista i luk sem gel ya bakegen. I no longtaem biaen, hem i askem gel ya blong stadi Baebol wetem hem, mo gel ya i glad blong mekem.
8 Yusum Taem Ya Long Rod We i Beswan: Taem yumi joen oltaem long wok blong prij, samting ya i givhan long yumi blong gat gudhan long wok blong talemaot gud nius. Maet yu save kam gud moa long fasin blong statem storeyan wetem man sipos yu lanem sam gudfala fastok. No, maet yu save kam gud moa long fasin blong tij, taem yu mekem wan Baebol Stadi. Taem yu mekem olsem, bambae yu yusum taem blong yu long wok blong prij long wan rod we i beswan, mo bambae minista wok blong yu i karem frut.—1 Tim. 4:16.
9 From we “yumi no gat plante taem i stap,” yumi mas bisi blong mekem ol Kristin wok. (1 Kor. 7:29) I impoten tumas blong putum taem i stap blong joen long wok blong prij. Yumi mas tinghae long samting ya. I gud tumas, sipos yumi joen oltaem mo wok strong long wok blong prij. Taem blong yumi, hem i wan nambawan presen we Jeova i givim long yumi. Taswe yumi mas yusumgud taem ya mo wetem waes fasin.
[Tok blong pija long pej 4]
Tingbaot Ol Advas Ya:
◼ Kam long miting blong prij long stret taem.
◼ Traem blong no putum plante man long wan grup blong prij.
No westem tumas taem blong go long teritori.
◼ Wokem ol teritori taem yu save se bighaf blong ol man oli stap long haos.
◼ Sipos i sef blong mekem, wok yu wan samtaem.
◼ Mekem ol visit we oli stap klosap long teritori we yu prij long hem.
◼ Sipos yu mas wet long wan we i stap prij yet, i gud blong gohed blong prij.
◼ Taem yu gat jans, i gud blong stap long wok blong prij bitim wan aoa.