Ansa Long Wan Kwestin

◼ ?Wanem buk yumi mas stadi wetem ol niuwan bifo we oli tekem baptaes?

Bifo we wan man i givim laef blong hem i go long Jeova mo i tekem baptaes, hem i mas kasem stret save. (Jon 17:3) Bambae hem i kasem save ya we hem i nidim, tru long buklet ya ?Wanem Samting We God i Wantem Yumi Blong Mekem? mo buk ya Save Blong Lidim Yu Long Laef We i No Save Finis. Plante studen bambae oli stat stadi wetem buklet ya Wanem. Be, sipos yumi statem stadi blong wan man wetem Save buk, bambae yumi gohed long buklet ya Wanem taem yumi finisim Save buk. ?From wanem samting ya i impoten?

Buklet ya Wanem i givim sam bigfala poen long saed blong ol stamba tijing blong Baebol. Sipos stadi blong studen i stat long buklet ya, bambae samting ya i givhan long studen blong kasem stamba save long saed blong ol samting we yumi mas mekem blong Jeova i glad long yumi. Sipos studen i stadi long buklet ya afta long buk Save, bambae buklet ya i givhan gud long hem blong tingtingbak long wanem we hem i lanem long Save buk. Nomata wanem rod we yu folem, i gud blong leftemap tingting blong studen blong jekem ol vas mo tingting dip long olgeta. Tokbaot ol pija, from we ol pija oli save givhan bigwan long tijing blong yumi.​—Lukluk Wajtaoa blong Janewari 15, 1997, pej 16-17.

Taem wan studen i stadi finis long tufala buk ya, maet hem i naf blong ansa long ol kwestin blong baptaes we bambae ol elda oli askem long hem. Sipos hem i ansa gud long ol kwestin ya, i no nid blong mekem Baebol stadi wetem hem bakegen long wan narafala buk. Nating se i olsem, tija blong hem i mas gohed blong soem intres long ol samting we studen ya i mekem blong gru long saed blong spirit.​—Lukluk Wajtaoa blong Janewari 15, 1996, pej 14, 17.