Program Blong Niufala Spesel Dei Asembli

Program blong Spesel Dei Asembli we bambae i stat long Septemba 1999, nem blong hem se: “Faenemaot Tingting Blong God We i Dip.” (1 Kor. 2:​10, NW) ?Bambae asembli ya i tijim yumi long wanem nambawan samting?

Fulap man oli wantem kasem moa save long plante samting. Be taem oli kasem save ya, oli no haremgud. Save blong Baebol nao i givim paoa long yumi, olsem tok blong seket elda bambae i soemaot. Nem blong tok ya, “Lukluk Long Tok Blong God Blong Haremgud.” Mo brata we i visitim asembli ya, hem bambae i soemaot we yumi mas faenemaot ol dip save blong Baebol fastaem, nao samting ya bambae i halpem yumi blong joen moa long wok blong prij. Bambae hem i askem kwestin ya long yumi, se: “?Yu Tingbaot Wok Blong Prij Olsem Wanem?”

?Ol papa mama oli save mekem wanem blong tijim ol pikinini blong olgeta blong kasem dip save long Tok blong God? Bambae yumi kasem sam advaes long tok ya: “Putum Tok Blong God Insaed Long Ol Pikinini Blong Yumi.” Ol yangfala oli save kam strong moa sipos oli kampani wetem ol fren long kongregesen we oli strong long saed blong spirit. Long tok ya “Ol Yangfala Oli Lan From Ol Olfala,” bambae yumi luk sam eksampel long saed blong ol gudfala kampani ya.

Jeova i save talemaot mining blong ol tokhaed. ?From wanem i stret blong yumi traem faenemaot ol dip save blong Baebol naoia? Brata we i visitim asembli ya bambae i soemaot olsem wanem Jeova i eksplenem finis ol tokhaed long taem bifo mo naoia tu. Tok blong hem i karem nem ya, “Sloslou Jeova i Stap Soemaot Ol Samting We Oli Dip.” Bambae tok ya i mekem yumi strong blong stap “faenemaot tingting blong God we i dip.”

Mekem plan naoia blong stap long asembli ya. Olgeta we oli wantem tekem baptaes blong soemaot we oli givim finis laef blong olgeta long Jeova, oli mas talem kwiktaem long presiden elda. Ol samting we yumi harem long asembli ya, bambae oli pulum yumi blong wantem go dip moa blong faenemaot save long Tok blong God. !I nogud yumi mestem spesel dei ya blong tijim yumi long saed blong spirit!