Niufala Program Blong Spesel Dei Asembli

“Yu Mas Kam Olsem Bigman Long Tingting Blong Yu,” hemia stamba tok blong program blong spesel dei asembli, we i stat long Septemba 2000. (1 Kor. 14⁠:20) ?From wanem i impoten we yumi go long asembli ya? Yumi stap laef long wan wol we i fulap long ol nogud samting mo rabis fasin. Blong winim fasin ya, yumi mas wokem fasin luksave, blong yumi naf blong winim ol raf fasin, taem yumi mekem ol stret fasin. Bae program blong spesel dei asembli ya i save halpem yumi blong mekem olsem.

Long faswan tok, seket elda bambae i tokbaot “Help Blong Kam Bigman Long Save Blong Baebol.” Bambae hem i eksplenem olsem wanem yumi save kam strong long Kristin bilif. Long tok ya “Trenem Tingting Blong Yu Blong Stap Strong Long Saed Blong Spirit,” man we i givim tok i yusum sam eksampel blong soemaot from wanem i impoten tumas blong folem ol advaes blong Baebol.

Ol yangfala tu oli mas trenem tingting blong olgeta. Oli tokbaot poen ya long tufala tok ya, “From Wanem Yu Mas Stap Olsem Pikinini Long Fasin Blong Mekem Sin,” mo “Ol Yangfala We Oli Kasem Save Naoia.” Lesin ol yangfala we oli eksplenem wanem oli mekem blong kam strong long saed blong spirit, blong oli no intres long ol nogud fasin blong wol ya, mo oli stap longwe long trabol.

?Olsem wanem nao yumi save faenem bigfala glad long laef? Bambae man we i givim tok i eksplenem samting ya long laswan tok, hemia “Haremgud From We Yu Folemgud Ol Advaes Blong Baebol.” Bae hem i givim sam eksampel we oli soem we sipos yumi folem ol advaes blong Tok blong God, yumi save winim ol trabol, tekem disisen, mo kasem glad from tijing blong Jeova.

Olgeta ya we oli wantem baptaes blong soem se oli givim laef blong olgeta long God, oli mas talem long presiden elda kwiktaem nomo. Taem yu save wetaem bambae yu gat asembli ya, putum wan mak long kalenda blong yu, mo mekem plan blong go long asembli ya blong kasem ol gudfala save blong program ya. !Yu no mas mestem wan haf blong spesel dei asembli! Samting ya i save givhan long yu blong yu stanap strong long rabis wol ya, mo yu stap tru long Jeova.