?Bambae Yu Yu Stap Long Taem Ya?
1 Wan Witnes we i stap longtaem finis long trutok, i bin talem se: “!Sipos yu mestem faswan dei blong asembli, i olsem se yu mestem plante samting finis!” ?From wanem hem i gat filing olsem? From we faswan dei hem i stat blong wan bigfala kakae long saed blong spirit we Jeova i rere finis blong yumi. (Aes. 25:6) Sipos yumi stap long stat blong asembli, samting ya i soem se yumi gat sem filing olsem man blong raetem Sam we i talem se: “Taem ol man oli talem long mi se, ‘Yumi go long haos blong Hae God,’ mi mi glad tumas.”—Sam 122:1
2 Be las yia, long sam distrik asembli we stamba blong hem “Profet Tok We i Kamaot Long God” namba blong ol man we oli kam long Fraede, i no plante olsem long Sarede mo Sande. Samting ya i minim se bigfala namba blong ol brata blong yumi, oli mestem blong harem sam haf blong ol tok we i soemaot ol impoten save long saed blong ol profet tok. Mo tu, oli mestem nambawan fasin fren wetem ol brata long taem ya.
3 No Letem Wok Long Saed Blong Bodi i Blokem Yu: Maet wan risen se, sam oli fraet blong lusum wok blong olgeta taswe oli no kam long Fraede. Be, plante Witnes oli faenem se bos blong olgeta i save agri blong letem olgeta i go long asembli, sipos oli askem hem bifo finis. Wan bos i bin sapraes long fasin we wan paenia sista i gat blong go long evri miting blong kongregesen mo ol asembli. Samting ya i pulum hem blong stap wan ful dei long asembli ya we sista i bin joen long hem.
4 Yu no mas ting se bos blong yu i no save letem yu blong kam long asembli, no yu mas gat tingting ya se sipos yu mestem wan dei blong asembli, hemia i nating nomo. Yu mas gat strongfala bilif, blong soem long bos blong yu long Baebol, from wanem fasin blong go long ol asembli hem i wan impoten haf long wosip blong yu. (Hib. 10:24, 25) Putum ful tras blong yu long olgeta promes blong Jeova, mo yu mas luksave se wanem samting we yu nidim long saed blong bodi, bambae yu save kasem sipos yu putum olgeta samting long saed blong spirit i stap fasples long laef blong yu.—Mat. 6:33; Hib. 13:5, 6.
5 Stamba samting hemia blong gat tangkiu long “ol samting we oli moa impoten.” (Fil. 1:10,11, NW; Sam 27:4) Samting ya i save pusum yumi blong mekem ol plan, blong haremgud fulwan long ol impoten blesing ya we i kam long Jeova. Stat blong mekem ol stret plan blong yu naoia, mo yu mas gat strong tingting blong stap long trifala dei ya.