2006 Distrik Asembli Blong Ol Witnes Blong Jeova “!Klosap Nao Yumi Fri!”
1. ?Olsem wanem ol man blong God bifo oli soemaot tangkiu from trufala wosip, mo yumi tede yumi gat wanem semfala janis?
1 King Hesekia we i rul long Juda bifo, i yusum sam man blong oli karem leta blong hem i go long ol man, blong singaot olgeta oli kam joen wanples long Jerusalem. (2 Kron. 30:6, 13) Fasin blong ol man taem oli harem ol tok long leta ya i soemaot tingting blong olgeta long saed blong trufala wosip. (2 Kron. 30:10-12) Long ol manis we bambae oli kam, ol man blong Jeova long taem blong yumi bambae oli gat semfala janis ya blong soemaot tangkiu from spesel blesing we bambae oli gat blong joen wanples blong wosipim Jeova. Kongregesen blong yufala i kasem wan leta finis we i singaot yufala blong joen long Distrik Asembli ya “!Klosap Nao Yumi Fri!” ?Bambae yu yu glad blong mekem olsem leta ya i talem, no nogat?
2. ?Wanem samting yumi mas mekem naoia blong asembli ya i save givhan long yumi?
2 Mekem Plan Naoia: Sipos yumi wantem se program ya long saed blong spirit, we oli rerem wetem lav, i givhan long yumi, yumi mas stap blong lesin long ful program ya. Yu mas waes mo stat naoia blong mekem gudfala plan, blong yu mo famle blong yu i save stap long ol tri dei blong asembli ya. (Prov. 21:5) Blong mekem olsem, maet yu mas askem spel long masta blong yu, sipos hasban no waef blong yu i no wan Witnes yu mas talemaot ol plan blong yu long hem, yu mas faenem ples blong slip, mo yu mas givhan long ol Baebol studen blong yu blong oli joen long evri dei blong asembli ya. Yu no mas wet long las minit blong mekem ol impoten samting ya. Defren olgeta, yu mas prea long Jeova, mo yu mas trastem se “bambae hem i halpem yu.”—Sam 37:5.
3. ?From wanem yumi mas folem plan we ol brata oli mekem long saed blong ples blong slip?
3 Ogenaesesen blong Jeova i wok had blong i gat naf ples blong slip long taon we asembli bambae i stap long hem. Sipos yumi gat tangkiu from hadwok blong ol brata we oli mekem rere ol plan ya, mo sipos yumi tingbaot ol narafala brata sista we bambae oli joen long asembli ya, mo sipos yumi gat respek long tiokratik oda, bambae yumi folem fulwan ol advaes we i stap long haf ya.—1 Kor. 13:5; 1 Tes. 5:12, 13; Hib. 13:17.
4, 5. ?Olsem wanem plan i stap blong givhan long olgeta we oli gat ol spesel nid?
4 Ples Blong Slip Mo Transpot: Ol Proveb 3:27 i talem se: “Sipos yu gat janis blong givhan long narafala man, i gud yu gohed, yu mekem i gud long hem, stret olsem we hem i wantem.” ?Olsem wanem yu save mekem i gud long ol narafala long taem blong asembli? Ol pablisa we oli stap longlongwe bambae oli kam long ples blong asembli. Yumi save givhan long olgeta blong mekem plan fastaem blong faenem ples blong slip mo transpot. Ol olfala pablisa, olgeta we oli handikap, olgeta we oli mekem wok blong fultaem paenia, mo sam narafala bakegen oli nidim help long saed blong transpot mo ples blong slip. Ol famle blong olgeta oli mas ol faswan we oli lukaot long olgeta. (1 Tim. 5:4) Be sipos ol famle oli no naf blong givhan, maet ol Kristin brata sista oli save givhan long olgeta. (Gal. 6:10) Ol elda we oli lukaot long ol Buk Stadi, oli mas jekemgud olgeta we oli gat spesel nid long buk stadi blong olgeta, blong meksua se oli mekemgud plan blong olgeta longtaem bifo we asembli i kam.
5 I gat Pepa Blong Askem Rum Blong Slip blong olgeta we bambae oli joen long asembli. I gud se yumi evriwan i fulumap pepa ya longtaem bifo long asembli blong askem ples blong slip, no blong tekem samfala oli kam slip long haos blong yumi. Sevis Komiti blong kongregesen i mas lukluk gud long fasin blong ol pablisa. Oli mekem ol plan ya blong ol pablisa we oli gat ol gudfala Kristin fasin, mo ol pikinini blong olgeta we oli gat gudfala fasin tu.
6. ?Wanem samting we yumi save mekem blong kasem moa glad long asembli ya?
6 Ol Volontia We Oli Glad Blong Wok: I sua se olgeta we oli joen long asembli ya bambae oli kasem bigfala glad, mo ol kakae long saed blong spirit bambae i givhan long olgeta, mo bambae oli haremgud blong joen wetem ol narafala brata mo sista. Glad blong yumi bambae i kam bigwan moa sipos yumi volontia blong wok, blong mekem se ol defren wok blong asembli ya i gohed gud. (Wok 20:35) Bambae i no longtaem Komiti blong Asembli long ples blong yumi i askem ol brata sista blong oli wok. ?Yu yu glad blong mekem wok long asembli?—Sam 110:3.
7. ?Wanem samting we yu yu laekem tumas long distrik asembli evri yia, mo yu mas gat strong tingting blong mekem wanem?
7 Wan smol boe we i gat faef yia blong hem i joen long wan distrik asembli, nao i talem se: “Long tingting blong mi, distrik asembli i beswan haf blong wosip we yumi mekem i go long Jeova.” Tok ya we i kamaot long hat blong smol boe ya, i givhan long yumi blong luksave se yumi glad tumas taem yumi joen long distrik asembli evri yia. Tok blong man blong raetem Sam i tru nomo taem hem i singsing se: “Sipos mi stap wan dei nomo long haos blong yu, be hemia i gud moa, i winim we mi stap wan taosen dei long ol narafala ples.” (Sam 84:10) Long singsing blong Deved, hem i talemaot se hem i wantem tumas blong ‘stap long haos blong God oltaem long laef blong hem, blong hem i stap lukluk ol gudgudfala fasin blong hem, mo blong i stap tingting gud long olgeta.’ (Sam 27:4) Deved i haremgud tumas blong stap wetem ol man we oli mekem wosip long Jeova. I gud we yumi mekem olsem hem mo yumi gat tangkiu from trufala wosip. Yumi save soemaot tangkiu sipos yumi stap long ol trifala dei blong Distrik Asembli ya “!Klosap Nao Yumi Fri!”
[Bokis blong pija long pej 3]
Taem Blong Program
Fraede mo Sarede
9:30 moning - 5:05 aftenun
Sande
9:30 moning - 4:10 aftenun
[Bokis blong pija long pej 4]
2006 Distrik Asembli Dei Mo Ples
Niukaledoni
◼ Septemba 15-17, 2006
Nouméa: Haos Asembli long Normandie.
◼ Septemba 22-24, 2006
Nouméa: Haos Asembli long Normandie.
Vanuatu
◼ Septemba 1-3, 2006
Port Vila: F.O.L. Port Vila.
Walis
◼ Septemba 30–Oktoba 1, 2006 (tu dei asembli)
Walis: Haos Kingdom long Mala’e, Hihifo.