Mekem Paoa Blong Tingting Blong Yu i Kam Bigwan
1 Laef blong yumi i strong tumas long ol lasdei ya we yumi stap long hem. From samting ya, ol man blong God long evri ples oli kasem plante wari mo traem. (2 Tim. 3:1-5) Yumi evriwan i nidim sam samting blong leftemap tingting blong yumi blong yumi save stanap strong long bilif blong yumi. (1 Kor. 16:13) Wetem help blong Jeova, yumi save mekem olsem taem yumi gohed blong tekem kakae long Tok blong hem, dipen long spirit blong hem, mo fasgud long ogenaesesen blong hem.—Sam 37:28; Rom 8:38, 39; Rev. 2:10.
2 I gat gudfala risen from wanem stamba tok blong spesel dei asembli blong las yia i olsem: “Kam Olsem We Yufala i Bigman Finis Long Save Blong Yufala.” Stamba tok ya i stanap long 1 Korin 14:20, we aposol Pol i raetem ol tok ya se: “Ol brata mo sista. I nogud yufala i stap we tingting blong yufala i olsem tingting blong pikinini. Long fasin blong yufala, i gud yufala i olsem smol pikinini nomo we hem i no save fasin blong mekem sin. Be long tingting blong yufala, yufala i mas kam olsem we yufala i bigman finis.” ?Wanem tingting blong yu long asembli ya?
3 “!Hem i leftemap tingting blong mifala!” “!Hemia stret samting we mifala i nidim!” Hemia tu nomo blong ol ansa. Wan man we i no wan Witnes i bin kam long spesel dei asembli ya blong luk gel blong hem we i gat 12 yia i tekem baptaes. Man ya tu i talem se hem i laekem tumas ol tok blong asembli ya mo hem i luksave se bambae hem i givhan long famle blong hem. ?Yu tu yu tingting olsem? Naoia, bambae yumi traem tingting bak long sam bigfala poen blong asembli ya.
4 I Nidim Stret Save Blong Mekem Paoa Blong Tingting i Kam Bigwan: Faswan tok hemia, “Stat Naoia Blong Wokem Paoa Blong Tingting.” ?Brata we i mekem tok ya, i tokbaot wanem samting we yumi nidim blong winim ol traem tede? Yumi nidim moa i bitim bren blong yumi. Yumi mas mekem save we yumi kasem long Baebol i kam dip moa, sipos no bambae ol rabis fasin we i stap raon long yumi oli winim yumi. Yumi nidim we God i givhan long yumi blong kasem save ya. Olsem man blong raetem Ol Sam, yumi mas askem Jeova long prea blong hem i mekem yumi kasem save long ol loa blong hem. Olsem nao, bambae yumi naf blong mekem wok blong hem wetem ful hat blong yumi.—Sam 119:1, 2, 34.
5 Long nekis haf, seket elda i soemaot we Jeova i yusum Tok mo ogenaesesen blong hem, blong givim “Help Blong Kam Bigman Long Ol Save Blong Baebol.” Oli eksplenem tok ya “kasem save” se “wan man i naf blong lukluk insaed long wan bisnes mo kasem save long ol wanwan haf blong hem mo olsem wanem oli joen tugeta, ale hem i kasem fulwan mining blong hem.” ?Hu i save givhan long yumi blong wokem fasin ya? Jeova i givim ol man olsem presen blong givhan long yumi blong gohed long saed blong spirit. (Efes. 4:11, 12) Ogenaesesen blong hem long wol i pusum yumi blong ridim Tok blong God evri dei mo blong go long ol miting blong kongregesen evri wik. (Sam 1:2) Yumi kasem tijing we i givhan long yumi blong yusum Baebol mo ol Kristin buk, taem yumi mekem prapa stadi blong yumi wanwan no long famle, mo taem yumi rerem ol miting mo wok blong prij. ?Yu yu stap yusum gud ol samting ya? ?Yu yu gat wan program blong ridim Baebol oltaem? I impoten blong yumi gat wan sipos yumi no wantem foldaon long ol tingting, stael, mo waes blong wol, mo ol samting we oli save pulum yumi be yumi no luksave.—Kol. 2:6-8.
6 Yumi Mas Trenem Paoa Blong Tingting Blong Yumi: Faswan tok blong brata we i kam long ofis blong Sosaeti, hemia, “Trenem Paoa Blong Tingting Blong Stap Strong Long Saed Blong Spirit.” Brata ya i eksplenem se ol man blong wol oli no luksave samting we i stret mo samting we i no stret. (Aes. 5:20, 21) Hemia from we oli no wantem kasem save mo obei long ol stret rul blong God. Defren olgeta, yumi we yumi kasem trening long saed blong spirit long ogenaesesen blong Jeova, yumi luksave ol stamba rul blong God mo letem olgeta oli lidim yumi long ol wok mo fasin blong yumi. Taswe, yumi wanwan i save pruvum wanem i gud mo i stret long ae blong Jeova mo wanem i laenap wetem samting we hem i wantem.—Rom 12:2.
7 Blong yumi blokem ol tingting blong wol ya we i fasfas mo ol rabis frut blong hem, yumi mas gohed oltaem blong trenem paoa blong tingting blong yumi. ?Bambae yumi mekem olsem wanem? Long Hibrus 5:12-14, aposol Pol i soemaot se yumi no mas dring “melek” blong tok blong God nomo. Yumi nidim strong kakae long saed blong spirit, olsem hemia we yumi kasem long buk stadi blong kongregesen taem yumi stadi long profet tok blong Aesea. Biaen yumi mas glad blong mekem ol samting we yumi lanem oli wok long laef blong yumi. Taem yumi mekem olsem, bilif blong yumi i kam strong moa se ol rul mo loa blong Jeova oli stret. Nao fasin ya i trenem paoa blong tingting blong yumi blong luksave samting we i stret mo samting we i no stret.
8 Sore tumas, be samfala oli bin kam slak long saed blong spirit. ?From wanem? Oli no putum tingting blong olgeta i stap strong long samting we i gud mo i stret long ae blong Jeova. Frut we i kamaot se oli foldaon long trap ya blong lesin long ol program blong radio mo televisin we i tokbaot ol samting we Baebol i agensem, oli lesin long ol miusik we i no stret, no oli joen wetem ol rabis fren tru long kompiuta. Sipos yumi wok wetem waes fasin, bambae yumi no save letem ol rabis fasin long saed blong seks, mo ol man we oli rabis no krangke oli gat paoa long yumi.—Prov. 13:20; Gal. 5:7; 1 Tim. 6:20, 21.
9 Ol Yangfala Oli Mas Stap “Olsem Smol Pikinini Nomo We Hem i No Save Fasin Blong Mekem Sin”: I gat tu haf long asembli ya we oli leftemap tingting blong ol yangfala blong oli mekem paoa blong tingting blong olgeta i kam bigwan. Tufala brata we i mekem tok ya oli soem se blong stap “olsem smol pikinini nomo we hem i no save fasin blong mekem sin,” i minim se oli mas stap olsem we oli no gat tingting nating blong joen long ol samting we i no klin long ae blong Jeova. (1 Kor. 14:20) Ol tok ya oli bin leftemap tingting blong yumi evriwan blong yumi lukaot gud long fasin blong yusum taem blong yumi. Long rod ya, yumi save blokem ol rabis samting we oli save kasem yumi mo spolem yumi. (Efes. 5:15-17) Yumi harem ol tok we i leftemap tingting blong yumi blong makem hamas taem yumi spenem blong ridim ol buk we oli no save givhan long yumi blong gru long saed blong spirit. ?Yu yu bin mekem samting ya? ?Wanem samting we yu yu faenemaot? Antap long fasin blong ridim Baebol evri dei, yumi mas gat strong tingting blong ridim olgeta buk we ogenaesesen i givim. Sipos yumi mekem olsem, samting ya bambae i givhan long yumi evriwan, wetem ol yangfala tu, blong yumi “kasem fasin ya blong luksave mining blong ol samting we i had.”—Prov. 4:7-9.
10 “Blesing We i Kamaot Taem Yumi Folem Ol Rul Blong Baebol Wetem Save”: Hemia nem blong laswan tok blong spesel dei asembli. Brata we i kam long ofis blong Sosaeti i eksplenem se Jeova i Stamba blong save we i givim laef, hemia i hae moa olgeta i bitim save blong olgeta man. !Traem tingbaot janis we yumi gat blong kasem save long samting long sem fasin olsem Jeova i kasem save long hem! Hem i givim fasin ya i fri nomo long olgeta we oli lukaotem mo askem wetem bilif. (Prov. 2:3-5, 9; 28:5) ?Yu yu yusum gud samting ya?
11 Ol tok ya oli pulum yumi blong lanem blong luksave ol rul blong God taem we yumi stap ridim Baebol. (2 Tim. 3:16, 17) Stadi gud long olgeta blong kasem klia save long wanem we Jeova i stap talem. Tektaem blong tingting dip long ol rul ya mo putum olgeta oli stap strong long tingting mo hat blong yu. Fasin ya bambae i trenem paoa blong tingting blong yu nao yu save tekem ol gudfala disisen long laef blong yu. (Jos. 1:8) Naoia yumi save luk sam samting we plante man oli fesem, mo luk olsem wanem yumi save kasem gudfala frut taem yumi folem ol rul blong Baebol.
12 ‘?Mi mi mas folem ol niufala stael blong klos mo hea?’ Plante taem, ol man blong wol oli putum klos mo mekem hea long ol fasin we oli soemaot se oli rebel. Tingting ya i pulum olgeta blong oli putum klos we i olbaot mo we i no naes, no klos we i pulum narafala long saed blong seks. ?Wanem ol rul blong Baebol we oli save halpem yumi blong blokem fasin ya? From we yumi trenem paoa blong tingting blong yumi finis, bambae yumi tingbaot rul we i stap long 1 Timoti 2:9, 10: “Putum klos . . . we i stret nomo, i no blong pulum ae blong man, mo i no blong flas. . . . Hemia i prapa fasin blong ol [man] we oli stap talem se oli lavem God.” Sam narafala rul we oli laenap wetem poen ya, i gat hemia we i stap long 2 Korin 6:3 mo Kolosi 3:18, 20.
13 ‘?Mi mas mekem wanem blong famle blong mi i stap joen gud?’ Fasin blong storian insaed long famle i impoten tumas. Jemes 1:19 i talem se: “Yufala evriwan i mas rere oltaem blong lesin, be yufala i no mas hareap blong toktok. Mo yufala i no mas hareap blong kros.” Ol memba blong famle oli mas lesin mo toktok, from we i nidim tufala samting ya blong gat fasin blong toktok gud tugeta long famle. Sipos yumi tok long fasin we i spolem narafala, i flas, mo i no kaen, nating se samting we yumi talem i tru, ating bambae yumi no givhan be yumi mekem ol samting oli kam moa nogud. Taswe, nating sipos yumi wan hasban no waef, wan papa mama no pikinini, yumi ‘mas toktok gud . . . long ol tok we ol narafala oli save glad long hem.’—Kol. 4:6.
14 ‘?Fasin blong ronem ol sas samting i stap spolem mi?’ Fasin blong ronem ol sas samting i wan fasin blong wol, we i mekem laef blong man i fasfas. Hem i no givhan long man blong kasem trufala glad. (Pri. 5:10; Luk 12:15; 1 Tim. 6:9, 10) Blong givhan long yumi blong ronwe long trap ya, Jisas i tijim impoten rul ya long yumi: Ae blong yumi i mas klia gud. Blong gat wan laef we i skel gud, we i no fasfas, yumi nidim blong lukluk i go nomo long ol samting blong Kingdom, mo putum olgeta narafala samting biaen.—Mat. 6:22, 23, 33.
15 ?Bambae Yumi Traehad Blong Mekem Wanem?: Insaed long tok blong God, i gat ol stret rul we oli save lidim yumi blong tekem ol disisen. Yumi nidim blong lanem ol rul ya, tingting dip long olgeta, mo kasem save olsem wanem blong mekem olgeta oli wok long laef blong yumi. Taem yumi mekem olsem, yumi ‘trenem paoa blong tingting blong yumi blong luksave samting we i stret mo samting we i no stret.’ Long rod ya, bambae yumi save haremgud mo yumi givim ona long Jeova.—Hib. 5:14, NW.