?From Wanem Yumi Stap Prij Long Ol Man Bakegen Mo Bakegen?
1 ?Yu bin tingbaot kwestin ya, maet taem yu stap mekemrere blong go prij? Long samfala ples we yumi prij plante taem finis long olgeta, ol man oli luksave yumi kwiktaem mo oli no wantem lesin. Maet samfala nomo oli lesin. Be, i gat plante strong risen blong prij long olgeta bakegen.
2 Faswan samting, yumi kasem oda blong talemaot mesej blong Kingdom gogo en i kamtru. (Mat. 24:14; 28:19, 20) Profet Aesea i stap tingbaot hamas yia moa we hem i mas gohed blong prij. Ansa we hem i kasem, i stap long Aesea 6:11. I klia nomo—hem i mas talemaot mesej blong God bakegen mo bakegen long ol man. Tede tu, nating se plante man oli no lesin, Jeova i wantem se yumi prij bakegen mo bakegen long ol man long teritori blong yumi. (Esik. 3:10, 11) Hemia wan tabu wok we God i putum long han blong yumi.—1 Kor. 9:17.
3 Wan narafala risen blong prij bakegen mo bakegen long ol man, hemia se, wok ya i givim jans long yumi blong soem se yumi rili onagud long Jeova long hat blong yumi. (1 Jon 5:3) Mo tu, taem yumi tingbaot ol samting we bambae oli kamaot long ol man i no longtaem, ?olsem wanem yumi save kam slak blong soem lav mo givim woning long ol man raonabaot long yumi? (2 Tim. 4:2; Jem. 2:8) Sipos yumi fasgud long wok ya, yumi givim plante jans long ol man ya blong obei long mesej blong God we i save sevem laef blong olgeta. Olsem nao, bambae oli no save talem se oli no bin kasem woning.—Esik. 5:13.
4 Antap long hemia, yumi no save wetaem samfala oli save jenisim tingting blong olgeta. Maet oli mekem olsem sipos wan samting i jenis long laef blong olgeta, wan famle i ded, no maet ol nogud samting we oli stap hapen long wol i mekem olgeta oli tingting dip long fyuja. Mo bakegen, maet wan samting we yumi talem long olgeta i wekemap tingting blong olgeta blong lesin. (Ekles. 9:11; 1 Kor. 7:31) Mo tu, samfala oli muf i go long narafala ples. Maet yumi faenem sam man we oli jes muf i kam long teritori blong yumi, mo we oli wantem lesin long gud nyus. Maet oli ol yangfala we naoia oli stap olgeta nomo, mo oli stap tingting dip long mining blong laef.
5 ?Bambae yumi gohed blong prij bakegen mo bakegen long ol man? !Yes! Baebol i talem plante tok blong pusum yumi blong gobak oltaem long ol man. Long en, taem wok blong prij i finis finis, bambae Jeova i blesem yumi from we yumi bin traehad longtaem long wok blong prij. Mo bambae hem i blesem olgeta we oli bin lesin wetem fasin tangkyu long gud nyus blong Kingdom.—1 Tim. 4:16.