“God i Save Mekem Olgeta Samting”
1 Bigfala wok blong Kristin kongregesen hemia blong talemaot mesej blong Kingdom long olgeta ples long wol. (Mat. 24:14) Hemia i wan bigfala wok. Plante man oli ting se i nidim sam moa narafala samting i bitim hemia we yumi gat, blong mekem se mesej ya i kasem ful wol. Long tingting blong sam narafala, yumi no naf blong finisim wok ya from oltaem ol man oli jikim, agensem, mo oli mekem trabol long yumi. (Mat. 24:9; 2 Tim. 3:12) Ol man we oli gat hafhaf tingting long wok blong yumi, oli rili ting se yumi no naf blong finisim wok ya. Be, Jisas i talem se: “God i save mekem olgeta samting.”—Mat. 19:26.
2 Ol Gudfala Eksampol Blong Folem: Jisas i statem minista wok blong hem, hem wan nomo agensem wol ya. Blong blokem Jisas blong i no win long wok ya, ol enemi blong hem oli traem enikaen rod blong daonem respek blong hem, biaen oli mekem hem i harem nogud tumas bifo we oli kilim hem i ded. Nating se i olsem, long en, Jisas i talemaot wetem strong tingting se: “Mi mi winim paoa blong olgeta samting blong wol ya finis.” (Jon 16:33) !Hemia i wan bigfala samting ya we hem i mekem!
3 Ol disaepol blong Jisas oli soem semfala strong tingting long Kristin wok blong prij. Plante long olgeta ol man oli ronem olgeta, wipim olgeta, putum olgeta long kalabus, mo tu oli kilim olgeta i ded. Nating se i olsem, oli “stap harem gud tumas from we God i luk olgeta olsem we oli naf blong kasem sem long fes blong ol man, from nem blong Jisas.” (Wok 5:41) Nating se ol man oli traem agensem olgeta, oli gohed blong finisimgud bigfala wok ya blong talemaot gud nius gogo i “finisim olgeta ples long wol.”—Wok 1:8; Kol. 1:23.
4 Rod Blong Win Long Wok Ya Tede: Yumi bin gat strong tingting tu blong talemaot Kingdom nating se ol man oli agensem yumi. Ol man oli traem putum tabu long wok ya, oli mekem trabol long yumi, putum yumi long kalabus, mo mekem sam narafala raf fasin blong stopem yumi, nating se i olsem yumi stap win. ?Olsem wanem nao yumi naf blong mekem olsem? “Hae God i talem long hem se, ‘Serubabel. Mi mi Hae God, mi gat olgeta paoa, mo mi talem long yu, se bambae yu yu win, be i no long paoa blong ol soldia blong yu, mo i no long paoa blong yu. Bambae yu win long paoa blong [“spirit,” NW ] blong mi nomo.’ ” (Sek. 4:6) !From we Jeova i stap bianem yumi, i no gat wan samting i save stopem wok blong yumi!—Rom. 8:31.
5 Taem we yumi prij, i no nid blong yumi sem no yumi fraet se yumi no naf. (2 Kor. 2:16, 17) Yumi gat plante risen blong gohed blong talemaot gud nius blong Kingdom. Wetem help blong Jeova, bambae yumi finisimgud “!samting we i strong tumas blong man i mekem!”—Luk 18:27.