Folem Fasin Blong Jisas We i Gat Strong Tingting Blong Prij

1. ?Wanem i mekem se ol man blong Jehova oli defren long ol narafala man?

WAN samting we i mekem se ol man blong Jehova oli defren long ol narafala man we oli talem se oli Kristin, hemia strong tingtinga we oli gat long wok blong prij. (Taetas 2:14) Be maet samtaem, yu harem se yu no gat strong tingting blong prij. Maet yu harem olsem wan elda we i talem se: “Samtaem mi harem se mi no wantem go prij.”

2. ?Wanem i save mekem se samtaem yumi no gat strong tingting blong prij?

² Maet yumi glad moa blong joen long ol narafala wok blong oganaesesen, i bitim we yumi joen long wok blong prij. ?From wanem? From we kwiktaem nomo yumi save luk gudfala frut we i kamaot from ol wok ya we yumi mekem, olsem taem yumi bildim mo fiksim ol bilding blong oganaesesen, yumi givhan long taem blong disasta, o yumi leftemap tingting blong ol brata mo sista blong yumi. Taem yumi wok wetem ol brata mo sista, yumi joen gud mo yumi soemaot se yumi lavlavem yumi, mo yumi save se ol brata mo sista oli glad long ol samting we yumi mekem long olgeta. Be long wok blong prij, maet yumi stap prij plante yia long sem teritori we smol man nomo oli glad blong lesin. O maet yumi faenem ol man we oli no laekem mesej we yumi stap talemaot. Mo tu, yumi save se taem yumi stap kam klosap moa long en, plante man bambae oli agensem yumi. (Mat. 10:22) ?Be wanem i save givhan long yumi blong gat strong tingting mo gohed blong prij?

3. ?Pijatok ya long Luk 13:​6-9, i soemaot se Jisas i gat wanem fasin?

³ Eksampol blong Jisas i save givhan long yumi blong gat strong tingting blong prij. Taem hem i stap prij, oltaem hem i gat strong tingting. Mo taem hem i prij moa, tingting blong hem tu i kam strong moa. (Ridim Luk 13:​6-9.) Long wan pijatok, Jisas i tokbaot wan man we i wok long plantesen blong grep, we i wok had blong tri yia blong lukaot gud long wan figtri, be i no karem frut. Be man ya i no kwik blong katemdaon tri ya, from hem i hop se wan dei tri ya bambae i karem frut. Long sem fasin, Jisas i spenem tri yia blong prij long ol man Jiu, be plante long olgeta oli no kam ol disaepol blong hem. Nating se i olsem, Jisas i no stop blong prij long olgeta, be hem i traehad moa blong kasem hat blong olgeta.

4. ?Wanem ol fo samting we Jisas i mekem we yumi save folem?

⁴ Long stadi ya bambae yumi tokbaot olsem wanem Jisas i soemaot se hem i gat strong tingting, speseli long ol laswan sikis manis blong hem long wol. (Luk 10:1.) Sipos yumi tingting dip long samting we Jisas i talem mo i mekem, bambae yumi gat strong tingting blong prij. Naoia bambae yumi tokbaot fo samting we Jisas i mekem we i save givhan long yumi. (1) Hem i tingbaot nomo samting we Jehova i wantem, (2) hem i tingbaot ol profet tok blong Baebol, (3) hem i dipen long Jehova blong i givhan long hem, mo (4) hem i gat stret tingting, hem i save se bambae i gat sam man oli lesin long hem.

HEM I TINGBAOT NOMO SAMTING WE JEHOVA I WANTEM

5. ?Olsem wanem Jisas i soemaot se hem i tingbaot nomo blong mekem samting we God i wantem?

⁵ Jisas i gat strong tingting blong talemaot “gud nius blong Kingdom,” from hem i save se hemia nao wok we God i wantem hem blong i mekem. (Luk 4:43) Mo wok ya nao i moa impoten long laef blong hem. Mo long ol laswan manis blong hem long wol, hem i gohed yet blong travel i go long “ol taon mo ol vilej” blong tijim ol narafala. (Luk 13:22) Mo tu, hem i trenem plante moa disaepol blong oli talemaot gud nius olsem hem.—Luk 10:1.

6. ?Olsem wanem ol narafala wok we yumi mekem i joen wetem wok blong prij? (Mo tu, yu luk pija.)

⁶ Tede tu, impoten wok we Jehova mo Jisas i wantem blong yumi mekem, hemia wok blong prij. (Mat. 24:14; 28:​19, 20) Ol narafala wok we yumi mekem blong Jehova, oli joen wetem wok blong prij. Eksampol, yumi bildim ol Haos Kingdom mo yumi wok long Betel blong sapotem wok blong prij. Mo taem yumi halpem ol brata mo sista long taem blong disasta, hemia i halpem olgeta tu blong go long ol miting mo prij bakegen. Taem yumi luksave se wok blong prij i impoten, mo yumi tingbaot oltaem se hemia nao wok we Jehova i wantem se yumi mekem, bambae yumi gat strong tingting blong joen fulwan long wok blong prij. János, wan elda long Hangari, i talem se: “Oltaem mi tingbaot se i no gat wan narafala wok blong Jehova we i moa impoten i bitim wok blong prij.”

7. ?From wanem Jehova i wantem se yumi gohed blong prij? (1 Timoti 2:​3, 4)

⁷ Sipos yumi tingbaot ol man olsem we Jehova i tingbaot olgeta, bambae yumi gat strong tingting blong prij. Jehova i wantem se plante man oli harem gud nius mo oli akseptem. (Ridim 1 Timoti 2:​3, 4.) From samting ya, hem i trenem yumi blong yumi kam gud moa long fasin blong yumi blong prij. Eksampol, buklet ya Lavem Ol Man—Mekem Disaepol i tokbaot plante gudfala rod we i save halpem yumi blong statem ol storian, we i lidim ol man blong stadi Baebol mo kam ol disaepol blong Kraes. Mo nating se ol man oli no lesin long yumi naoia, be maet bambae oli gat janis yet blong lesin long yumi bifo long en blong bigfala trabol. Samting we yumi talem long olgeta naoia, maet hemia nao samting we bambae i pulum olgeta blong oli wantem wosipim Jehova. Be hemia i save hapen nomo sipos yumi gohed blong prij.

HEM I TINGBAOT OL PROFET TOK

8. From we Jisas i save ol profet tok blong Baebol, ?olsem wanem hemia i givhan long hem?

⁸ Jisas i kasemsave gud olsem wanem ol profet tok blong Baebol bambae oli kamtru. Hem i save se bambae hem i prij blong tri yia mo sikis manis. (Dan. 9:​26, 27) Mo tu, ol profet tok ya oli mekem hem i kasemsave se i no longtaem bambae hem i safa mo i ded. (Luk 18:​31-34) From we Jisas i save ol samting ya, hem i yusum gud taem blong hem. Taswe hem i gat strong tingting blong prij mo finisim wok ya we Jehova i givim long hem.

9. Taem yumi kasemsave long ol profet tok blong Baebol, ?olsem wanem hemia i givhan long yumi?

⁹ Taem yumi kasemsave long ol profet tok blong Baebol, hemia bambae i mekem se yumi gat strong tingting blong prij. Yumi save se en blong rabis sistem blong wol ya i klosap, from ol samting we oli stap hapen long wol tede mo fasin blong ol man i soemaot se yumi stap laef long ol las dei. Mo taem yumi luk ol samting we i stap hapen bitwin wol paoa ya Inglan mo Amerika wetem Rasia, yumi luksave se profet tok long saed blong king blong saot mo king blong not “long taem blong en” i kamtru. (Dan. 11:40) Mo yumi kasemsave tu long mining blong statiu ya we i stap long Daniel 2:​43-45, se ol leg blong hem daon oli pija blong wol paoa ya Inglan mo Amerika. Taem yumi luk profet tok ya i stap kamtru, yumi sua fulwan se i no longtaem, Kingdom blong God bambae i distroem ol gavman blong man. Evri profet tok ya oli soemaot se yumi stap laef klosap long en. Taswe, yumi wantem yusum gud taem blong yumi blong talemaot gud nius.

10. ?Olsem wanem ol profet tok blong Baebol oli mekem se yumi gat strong tingting moa blong prij?

¹⁰ Taem yumi kasemsave long ol profet tok blong Baebol, bambae yumi wantem talemaot tu long ol man. Wan sista long Dominikan Ripablik, we nem blong hem Carrie i talem se: “Taem mi tingbaot ol nambawan samting we Jehova i promes blong mekem long fiuja, mi wantem tumas blong talemaot long ol narafala. Mo taem mi luk ol problem we ol man oli stap fesem tede, mi luksave se olgeta tu oli nidim blong harem ol promes ya.” Ol profet tok blong Baebol oli leftemap tingting blong yumi blong gohed blong prij, mo oli soemaot se Jehova nao i stap givhan long yumi blong mekem wok ya. Leila, we i laef long Hangari, i talem se: “Aesea 11:​6-9 i pulum mi blong tokbaot gud nius long olgeta ya tu we i luk olsem se bambae oli no lesin long mi. Mi save se Jehova i save givhan long eni man blong i jenis.” Mo Christopher, wan brata long Sambia, i talem se: “Mak 13:10 i talem se gud nius bambae i kasem olgeta ples long wol. Taswe mi harem se i wan ona we mi save givhan blong mekem profet tok ya i kamtru.” ?Wanem ol profet tok long Baebol we i pulum yu blong yu gohed blong prij?

HEM I DIPEN LONG JEHOVA BLONG I GIVHAN LONG HEM

11. ?From wanem Jisas i mas dipen long Jehova blong i givhan long hem, blong i gat strong tingting blong prij? (Luk 12:​49, 53)

¹¹ Oltaem Jisas i dipen long Jehova blong i givhan long hem blong i gat strong tingting blong prij. Nating se Jisas i toktok kaen long ol man, be hem i save se gud nius blong Kingdom we hem i stap talemaot, bambae i mekem ol man oli kros mo agensem hem. (Ridim Luk 12:​49, 53.) Mo plante taem ol lida blong skul oli stap traem blong kilim hem i ded. (Jon 8:59; 10:​31, 39) Be Jisas i gohed blong prij from hem i save se Jehova i stap wetem hem. Hem i talem se: “Mi mi no stap mi wan nomo, Papa we i sanem mi mi kam, hem i stap wetem mi. . . . Hem i no lego mi mi stap mi wan, from we oltaem mi mekem ol samting we hem i glad long hem.”—Jon 8:​16, 29.

12. ?Olsem wanem Jisas i rerem ol disaepol blong hem blong oli gohed blong prij taem oli fesem fasin agens?

¹² Jisas i talem long ol disaepol blong hem se oli mas dipen long Jehova blong i givhan long olgeta. Mo hem i talem long olgeta plante taem se Jehova bambae i givhan long olgeta taem oli fesem fasin agens. (Mat. 10:​18-20; Luk 12:​11, 12) Be hem i talem tu se oli mas lukaot gud. (Mat. 10:16; Luk 10:3) Oli no mas fosem ol man blong lesin long olgeta sipos oli no wantem. (Luk 10:​10, 11) Mo hem i talem tu long olgeta se oli mas ronwe sipos ol man oli wantem kilim olgeta. (Mat. 10:23) Nating se Jisas i gat strong tingting mo i dipen long Jehova, be taem hem i luksave se i gat denja, hem i ronwe.—Jon 11:​53, 54.

13. ?From wanem yu save sua se Jehova bambae i givhan long yu?

¹³ Yumi nidim we Jehova i givhan long yumi blong prij wetem strong tingting taem yumi fesem fasin agens. (Rev. 12:17) ?From wanem yu save sua se Jehova bambae i givhan long yu? Traem tingbaot prea blong Jisas long Jon japta 17. Hem i askem long Jehova blong i lukaot gud long ol aposol, mo Jehova i ansarem prea blong hem. Buk blong Ol Wok i tokbaot olsem wanem Jehova i halpem ol aposol blong oli prij wetem strong tingting, nating se oli fesem fasin agens. Long prea blong Jisas, hem i askem Jehova blong i lukaot gud long olgeta tu we bambae oli bilif long mesej we ol aposol oli stap talemaot mo oli kam ol disaepol long fiuja. Mo hemia i minim yu tu. Jehova i no stop blong ansarem prea blong Jisas. Taswe bambae hem halpem yu olsem we hem i bin halpem ol aposol.—Jon 17:​11, 15, 20.

14. ?From wanem yumi sua se bambae yumi naf blong prij wetem strong tingting? (Mo tu, yu luk pija.)

¹⁴ Naoia we en i kam klosap moa, maet bambae i had blong yumi talemaot gud nius. Be Jisas i mekem yumi sua se bambae yumi kasem help we yumi nidim, blong yumi save gohed blong gat strong tingting blong prij. (Luk 21:​12-15) I gud yumi mekem olsem Jisas mo ol disaepol blong hem, we yumi letem ol man oli jusum se bambae oli lesin long yumi o nogat, be yumi no rao wetem olgeta. Nating se long sam kantri oli putum tabu long wok blong yumi, ol brata oli gohed blong talemaot gud nius from we oli dipen long Jehova, be i no long prapa paoa blong olgeta. Long faswan handred yia, Jehova i givim paoa long ol man blong hem. Taswe, tede tu bambae hem i givim paoa long yumi, blong “finisim gud wok blong talemaot gud nius” olsem we hem i wantem. (2 Tim. 4:17) Yu save sua se sipos yu dipen long Jehova, bambae yu naf blong prij wetem strong tingting.

HEM I GAT STRET TINGTING

15. ?Wanem i soem se Jisas i gat stret tingting long wok blong prij?

¹⁵ Jisas i gat stret tingting, hem i save se i gat sam man we bambae oli lesin long gud nius. Mo hemia nao i halpem hem blong i stap glad mo i gohed blong wok strong long wok blong prij. Eksampol, klosap long en blong yia 30 K.T., Jisas i luk se i gat plante man we oli rere blong lesin long gud nius, mo hem i talem se oli olsem wan garen we ol kakae blong hem oli rere blong havestem. (Jon 4:35) Samwe wan yia biaen, hem i talem long ol disaepol blong hem se: “I gat plante kakae blong havestem.” (Mat. 9:​37, 38) Mo biaen hem i talem bakegen se: “I gat plante kakae blong havestem . . . Yufala i mas plis long Masta blong havest, blong hem i sanem sam moa man blong wok oli kam havestem ol kakae ya blong hem.” (Luk 10:2) Jisas i sua se bambae i gat sam man we oli lesin long gud nius, mo hem i glad taem oli mekem olsem.—Luk 10:21.

16. ?Olsem wanem ol pijatok blong Jisas oli halpem yumi blong gat stret tingting long wok blong prij? (Luk 13:​18-21) (Mo tu, yu luk pija.)

¹⁶ Jisas i givhan long ol disaepol blong hem blong olgeta tu oli gat stret tingting, mo hemia i mekem se oli gat strong tingting blong prij. Tingbaot tu pijatok we hem i talem. (Ridim Luk 13:​18-21.) Hem i tokbaot se mesej blong Kingdom i olsem wan smol sid blong mastad we i gru i kam wan bigfala tri. Hem i yusum pijatok ya blong soemaot se wok blong talemaot gud nius blong Kingdom bambae i gru i kam bigwan, mo bambae i no gat man i save stopem. Mo tu, hem i yusum pijatok blong is blong soemaot se mesej blong Kingdom bambae i kasem olgeta ples long wol, mo i jenisim laef blong ol man nating se ol narafala oli no luksave kwiktaem. From samting ya, Jisas i mekem ol disaepol oli sua se mesej we oli stap talemaot, bambae i halpem plante man.

17. ?From wanem yumi mas gohed blong gat stret tingting long wok blong prij?

¹⁷ Taem yumi tingbaot se wok blong prij i stap givhan long laef blong plante man raon long wol, hemia i mekem se yumi wantem gohed blong prij. Evri yia, plante milian man we oli intres oli stap kam long Memoriol, mo oli stap stadi Baebol wetem yumi. Plante taosen man oli stap baptaes mo oli stap joen wetem yumi long wok blong prij. Yumi no save hamas man yet we bambae oli lesin long yumi taem yumi prij, be yumi save se Jehova i stap hivimap wan bigfala hip blong ol man, we bambae oli laef tru long bigfala trabol we i stap kam. (Rev. 7:​9, 14) Jehova we i Masta blong havest, i save se plante man yet bambae oli glad blong lesin long gud nius. Taswe yumi gat gudfala risen blong gohed blong prij.

18. ?Yumi wantem se ol man oli luksave wanem long saed long yumi?

¹⁸ Taem ol man oli luk strong tingting we ol disaepol blong Jisas oli gat long wok blong prij, ‘oli jes tingbaot se oli bin stap wetem Jisas.’ (Wok 4:13) Yumi tu, sipos yumi mekem bes blong yumi mo yumi gat strong tingting blong prij, ol man bambae oli luksave klia se yumi stap folem fasin blong Jisas we i gat strong tingting blong prij.