Niufala Plan Blong Tingtingbak Long Ol Asembli
Wol blong Setan i stap kam moa nogud oltaem. Be ‘naoia we yumi stap wet blong luk bigfala Dei we tingting blong yumi i stap long hem,’ Jeova i stap mekem yumi strong blong ‘livim olgeta fasin we oli no stret long fes blong hem mo blong no wantem ol samting blong wol ya, mo blong blokem ol samting we yumi nomo i wantem, mo blong mekem ol fasin we i stret, we God i stap harem gud long hem.’ (Taet. 2:12, 13) Wan plan we Jeova i pulum “slef ya we i stret mo waes” blong rerem, hemia seket asembli mo spesel dei asembli we yumi mekem evri yia. (Mat. 24:45, NW ) !Yumi kasem bigfala paoa long saed blong spirit long ol asembli ya!
Blong givhan long yumi blong rimemba ol tijing we yumi kasem mo blong folem olgeta, wan niufala plan blong tingtingbak long ol asembli ya bambae i stat long sevis yia 2005. Pej 5 mo 6 blong Kingdom Wok ya i tokbaot sam haf blong program blong ol asembli ya, mo ol kwestin blong tingtingbak long wanwan asembli. Ol kongregesen bambae oli tokbaot ol save ya long Miting Blong Kingdom Wok smoltaem bifo mo smoltaem afta long asembli. ?Plan ya bambae i wok olsem wanem?
Wan no tu wik bifo long seket asembli, long Miting Blong Kingdom Wok, bambae i gat wan tok blong ten menet long saed blong “Program Blong Nekiswan Seket Asembli.” Tok ya i blong pulum evriwan long kongregesen blong oli wantem harem program blong asembli ya. Brata we i givim tok ya bambae i tokbaot ol kwestin blong tingtingbak tu, mo bambae i leftemap tingting blong evriwan blong oli raetem ol smosmol not blong rere from tingtingbak we bambae oli mekem long wan miting i no longtaem afta long asembli.
Long ol faswan wik afta long asembli, long Miting Blong Kingdom Wok, bambae i gat wan haf blong 15 menet blong tingtingbak long faswan dei blong asembli. Long nekis wik blong hem, bambae i gat wan haf bakegen blong 15 menet blong tingtingbak long seken dei blong asembli. Long tufala tingtingbak ya, brata bambae i yusum ol kwestin we oli stap long pepa ya. Tingtingbak ya i mas soemaot klia olsem wanem blong yusum ol save blong asembli long laef blong yumi. Long saed blong ol narafala haf long Miting Blong Kingdom Wok, maet ol elda oli mekem plan blong sotem olgeta, katemaot olgeta, no seftem olgeta oli go long wan narafala wik. Olsem nao, bambae i gat taem blong mekem tingtingbak long tufala wik ya.
Bambae yumi folem sem plan long saed blong spesel dei asembli, be bambae i gat wan haf nomo blong 15 menet blong tingtingbak long dei ya. Yumi evriwan i mas kipim pepa ya we i stap insaed long Kingdom Wok ya, nao yumi save yusum biaen blong i givhan long yumi blong kasemgud ol nambawan tijing we Jeova i stap givim long yumi.—Aes. 48:17, 18.