Soemaot Tingting Blong Paenia
1. ?Olsem wanem bambae yu eksplenem spirit blong paenia?
1 Nating se yumi save mekem wok blong paenia naoia no nogat, evri pablisa blong Kingdom oli save soemaot tingting blong paenia. Oli rili wantem obei long oda ya blong prij mo pulum man i kam disaepol. (Mat. 28:19, 20; Wok 18:5) Oli kea long ol man mo oli rere blong lego plante samting we oli laekem, blong finisim gud wok blong olgeta blong prij. (Mat. 9:36; Wok 20:24) Ol man blong Jeova oli glad nomo blong mekem eni samting we i stret blong givhan long narafala blong lanem trutok. (1 Kor. 9:19-23) Tingbaot eksampol blong wan man we i soemaot tingting ya blong paenia, hemia ivanjelis ya Filip.
2. ?Olsem wanem ol elda mo ol man blong givhan oli save folem strong tingting blong Filip long wok blong prij?
2 Wok Blong Prij Mo Blong Tijim Man: Filip i gat sam bigfala wok blong mekem long kongregesen blong faswan handred yia. (Wok 6:1-6) Nating se i olsem, hem i wan man we i wok strong tu long wok blong talemaot gud nius. (Wok 8:40) Taswe tede, taem ol elda mo ol man blong givhan oli stap mekem ol wok blong olgeta insaed long kongregesen, oli save soemaot tingting blong paenia taem oli givim eksampol tu long wok blong prij wetem glad. !Samting ya i save wekemap tingting blong olgeta insaed long kongregesen!—Rom 12:11.
3. ?Olsem wanem yumi save soemaot tingting blong paenia taem yumi kasem ol traem?
3 Afta long ded blong Steven, ol man oli stat mekem i strong tumas long ol disaepol, mo from samting ya, laef blong ol disaepol i no isi. Be Filip i gohed blong prij, mo hem i wan long ol stamba man we i givhan blong mekem se gud nius i kasem ol man Sameria. (Wok 8:1, 4-6, 12, 14-17) Yumi save folem eksampol blong Filip taem yumi gohed nomo blong talemaot gud nius nating se yumi kasem ol traem, mo taem yumi prij long eni man we yumi mitim.—Jon 4:9.
4. ?Wanem eksampol we Filip i soemaot olsem wan tija?
4 Yumi luksave se Filip i gat gudhan blong tijim Tok blong God long storian we hem i gat wetem man Itiopia ya. (Wok 8:26-38) Wan narafala rod blong soemaot tingting blong paenia hemia blong kamgud moa long fasin blong yusum Baebol mo blong pruvum ol toktok blong yumi wetem Baebol. (Wok 17:2, 3) Olsem Filip, yumi lukaot rod blong serem gud nius long evri ples we yumi save faenem man i stap long hem mo long evri taem we yumi gat janis blong mekem olsem.
5. ?Wanem i save givhan long ol Kristin papa mama blong oli pulum ol pikinini blong olgeta blong tingbaot wok blong paenia?
5 Insaed Long Famle Mo Long Kongregesen: Fasin blong Filip mo eksampol blong hem i gat bigfala paoa long ol gel blong hem. (Wok 21:9) Sem mak tede, ol papa mama we oli soemaot intres fastaem long wok blong Kingdom, oli givhan long ol pikinini blong olgeta blong oli mekem sem mak. Nating se ol papa mama oli taed long en blong wik, be sipos oli soemaot we oli rili wantem prij long ol narafala, samting ya bambae i save tajem hat blong pikinini blong olgeta.—Prov. 22:6.
6. ?Olsem wanem blong soemaot se yumi gat tangkiu long wok blong ol paenia insaed long kongregesen blong yumi?
6 Filip i welkamemgud tufala Kristin ya Pol mo Luk, we tufala i wok strong long wok blong Jeova, hem i tekem tufala i kam long haos blong hem. (Wok 21:8, 10) ?Olsem wanem yumi save soemaot se yumi gat tangkiu long olgeta we oli wok strong long wok blong Jeova mo yumi sapotem olgeta? Maet yumi save askem blong prij wetem ol paenia long wan moning no long wan aftenun, long dei we i no gat plante man oli joen long wok blong prij. (Fil. 2:4) Yumi save invaetem olgeta oli kam long haos blong yumi blong mekem se yumi fren moa wetem olgeta. Mo nating se laef blong yumi i olsem wanem, i gud we yumi evriwan i soemaot tingting ya blong paenia.