2005 Distrik Asembli Blong Ol Witnes Blong Jeova “Obei Long God”

¹ Bigfala Tija blong yumi, Jeova God, i mekem rere plan blong yumi joen wanples, nao hem i save tijim yumi long ol rod blong hem. (Aes. 30:​20, 21; 54:13) Blong mekem olsem, hem i yusum “slef ya we i stret mo waes.” Slef ya i mekem rere ol miting, olsem ol distrik asembli we yumi gat evri yia. (Mat. 24:​45-47, NW) Yumi gat sem filing olsem man ya blong singsing, Deved, we i talem se: “Bambae mi mi presem yu [Jeova] long fes blong olgeta man blong yu.” (Sam 26:12) Deved i kasem save gud se i impoten tumas blong Jeova i tijim yumi, mo hem i gat strong tingting blong stap wetem ol man blong God taem olgeta ya oli joen wanples.

² ?Olsem wanem? ?Yu yu wan long “olgeta man blong [God]” we bambae oli joen long Distrik Asembli “Obei Long God” long yia ya? Sipos yes, ol advaes we oli kam biaen bambae oli givhan long yu blong yu reregud blong stap long asembli ya.

³ Plan Naoia Blong Stap Long Ol Tri Dei: Long teritori we branj ofis blong yumi i lukaot long hem, faswan distrik asembli long yia ya bambae i stap long Vanuatu, long Ogis 26-28. Biaen, i gat tu asembli long Niukaledoni, long Septemba 16-18 mo Septemba 23-25, mo biaen bakegen, long Walis, long Oktoba 1-2. “Man we i mekem gudfala plan mo i stap wok strong long hem, hem i save kasem plante samting.” (Prov. 21:5) Ol tok ya oli makemgud se i impoten tumas we yumi mekem plan naoia blong joen long asembli ya. Blong meksua se yu no mestem wan samting long ol gudfala program ya long saed blong spirit, yu mas waes mo stat naoia blong mekem gud plan blong stap long ol tri dei blong asembli ya. Sipos yu mas askem spel long masta blong yu, i gud yu askem naoia nomo. Sipos i nidim blong yu tokbaot ol plan blong yu long hasban no waef blong yu we i no wan Witnes, yu no mas wet long las minit blong mekem olsem. Nomata wanem trabol we yu fesem, yu mas prea long Jeova, yu mas trastem hem se bambae hem i givhan long yu blong ‘ol plan blong yu bambae oli save gohed gud.’ (Prov. 16:3) Antap moa, i gud sipos yu givhan long ol Baebol studen blong yu blong oli mekem rere plan blong stap long evri dei blong asembli.

⁴ Spesel Nid: Aposol Pol i tokbaot samfala brata, se oli ‘stap mekem hem i harem gud tumas.’ (Kol. 4:​7-11) Wan long ol help we oli givim, hemia se oli givhan long Pol long saed blong ol spesel nid blong hem. ?Olsem wanem yu yu save ‘mekem narafala i harem gud tumas’ long asembli ya? Ol olfala pablisa, olgeta we oli handikap, olgeta we oli mekem wok blong fultaem paenia, mo sam narafala bakegen, maet oli nidim help long saed blong transpot mo ples blong slip. Ol famle blong olgeta oli mas ol faswan blong lukaot long ol nid blong olgeta. (1 Tim. 5:4) Be sipos ol famle oli no naf blong givhan, maet ol Kristin brata sista oli save givhan long olgeta. (Jem. 1:27) Ol elda we oli lukaot long ol buk stadi, oli mas jekemgud olgeta we oli gat spesel nid long buk stadi blong olgeta, blong meksua se oli mekem reregud plan blong olgeta longtaem bifo we asembli i kam.

⁵ I Nidim Volontia: Jisas i soem wan nambawan eksampol taem hem i lukaot long nid blong ol narafala wetem tingting daon. (Luk 9:​12-17; Jon 13:​5, 14-16) Olgeta we oli glad blong wok long ol asembli, oli soemaot sem tingting ya. Klosap nao, Komiti blong Asembli long ples blong yumi bambae i askem ol brata sista blong oli wok wetem olgeta blong mekem se ol defren wok blong asembli ya i gohed gud. I nidim moa we ol elda oli volontia mo akseptem wok. Taem oli glad blong wok, oli givim wan nambawan eksampol long evriwan long kongregesen.​—1 Pita 5:​2, 3.

⁶ Tru long “man blong wok we i gat hed,” Jeova God i mekem plan blong ol man blong hem oli joen wanples long en blong koltaem, blong oli save kasem ol tijing long saed blong spirit. (Luk 12:42) Yumi mas traehad bigwan blong reregud blong stap long ol tri dei blong asembli ya, nao bambae yumi kasem gudfala samting from. Distrik Asembli blong yia ya “Obei Long God,” bambae i mekem tingting blong yumi i strong moa blong mekem wok blong Jeova naoia mo blong olwe. I gud we yumi gat strong tingting blong folem tok blong man blong raetem Ol Sam, we i talem se: ‘Yumi ol man blong God, yumi kam wanples, yumi presem Hae God.’​—Sam 68:26.

[Bokis blong pija long pej 4]

Taem Blong Program

Fraede mo Sarede

9:30 moning - 5:05 aftenun

Sande

9:30 moning - 4:10 aftenun