2007 Distrik Asembli Blong Ol Witnes Blong Jeova “!Folem Kraes!”
1, 2. (a) ?Moses i talem long ol man Isrel se oli save mekem wanem blong oli save haremgud taem oli kam wanples? (b) ?Wanem ol plan we yumi mas stat blong mekem naoia?
1 Moses i talem long olgeta man Isrel mo ol strenja we oli stap wetem olgeta blong oli kam wanples evri seven yia blong oli ridimaot Loa long olgeta. ?From wanem? “Blong olgeta evriwan oli save harem tok ya, mo blong oli save lanem fasin ya blong ona long Hae God.” (Dut. 31:10-12) I no longtaem ol man blong Jeova bambae oli kam wanples bakegen long trifala dei blong Distrik Asembli ya “!Folem Kraes!” Long Vanuatu, bambae i gat wan Distrik Asembli long Luganville long Ogis 24-26 no long Ogis 31-Septemba 2. Long Nouméa bambae i gat 3 asembli long Septemba 7-9, 14-16 mo 21-23. Long Walis bambae i gat wan asembli be blong tu dei long Oktoba 6-7, no maet Oktoba 13-14.
2 ?Yu yu nidim blong askem spel long masta blong yu? ?Yu yu save halpem ol Baebol stadi blong yu mo ol famle blong yu we oli no bilif blong oli kam wetem yu long asembli ya? Ol advaes we i kam biaen bambae i halpem yu blong rere from asembli ya.
3. (a) ?Wanem tok blong Aesea 25:6 we i stap kamtru tede? (b) ?Oli bin makem wanem long saed blong namba blong man we i kam long faswan dei blong asembli mo wanem samting we yumi wanwan i mas mekem?
3 Stap Long Ol Trifala Dei Blong Asembli Ya: Jeova i givim plante kakae long saed blong spirit long ol man blong hem. (Aes. 25:6) Ol kakae ya, yumi kasem tu long distrik asembli blong yumi we yumi mekem evri yia. Oli bin makem se namba blong ol man we oli kam long faswan dei blong asembli ya i no plante skelem wetem tufala narafala dei. !I gud yu putum mak blong yu stap long ol trifala dei ya! Sipos yu mas askem spel long masta blong yu, i gud yu prea long saed ya. Biaen, ‘mekem tingting blong yu i strong’ blong toktok wetem masta blong yu kwiktaem afta we yu harem oli talemaot ol dei blong asembli. (1 Tes. 2:2; Neh. 2:4, 5) Maet i gud we yu eksplenem long masta blong yu se distrik asembli ya i wan haf blong wosip blong yu mo bambae yu go long hem wan taem nomo long yia. Taem yu mekem olsem longtaem bifo long asembli, samting ya i mekem i isi long masta blong yu blong mekem ol plan blong hem blong i laenap wetem wanem we yu askem finis long hem.
4. ?Olsem wanem yumi save rerem ol Baebol stadi blong yumi mo ol famle blong yumi we oli no bilif blong oli kam long distrik asembli ya?
4 Rerem Ol Baebol Stadi Mo Famle Blong Yu: !Bambae i gud tumas blong luk we Baebol stadi blong yu i kam wetem yu long asembli ya mo bambae hem i haremsave lav we ol brata mo sista oli gat “long wan bigfala kongregesen”! (Sam 22:25, NW) Blong mekem se ol Baebol stadi blong yu oli makemaot taem blong olgeta blong save joen long asembli ya, yu mas talem long olgeta longtaem bifo asembli. Talem long olgeta ol risen from wanem yu yu wantem joen long asembli ya. Yu save soem ol vidio we oli soemaot ol asembli olsem vidio ya United by Divine Teaching blong rerem ol Baebol stadi blong yu long wanem we bambae oli luk long asembli ya. Talemaot ol plan long saed blong asembli ya long ol famle blong yu we oli no bilif. Ale maet, oli save mekem plan blong luk drama no blong kam wetem yu long wan long ol trifala dei ya.
5. (a) ?From wanem i impoten naoia we ol man blong Jeova oli kam wanples? (b) ?Wanwan long yumi i mas mekem wanem naoia?
5 From we yumi “luk we dei ya i kam klosap finis,” i impoten we ol man blong God oli kam wanples. (Hib. 10:25, NW) !I gud we naoia yumi stat mekem ol plan blong yumi blong yumi save stap long trifala dei blong Distrik Asembli ya “!Folem Kraes!”