Stap Rere From Bigfala Dei Blong Jeova
1. ?Wanem stamba tok blong distrik asembli, mo from wanem stamba tok ya i stretgud?
1 Aesea i raetem se: “Jeova i wan God blong jajem man. Olgeta we oli stap rere from bigfala dei blong hem oli save haremgud.” (Aes. 30:18b, NW) I gat plante stori long Baebol we oli tokbaot jajmen we God i mekem agens long ol enemi blong hem mo ol taem we hem i sevem ol man blong hem we oli stap tru long hem. ?Ol stori ya oli tijim wanem long ol man we oli mekem wosip long Jeova tede? ?Wanem samting we yumi save mekem naoia blong stap rere from “bigfala dei we bambae ol man oli fraet gud long hem”? (Joel 2:31, 32) Distrik asembli ya “!Klosap Nao Yumi Fri!” bambae i pusum yumi blong tingbaot ol kwestin ya mo skelem yumi wan bakegen. Bambae hem i givhan long yumi blong gohed blong trastem Jeova.
2. ?Olsem wanem yumi save soemaot se yumi gat tangkiu from distrik asembli?
2 ?Yu yu mekem plan finis blong stap long ol trifala dei blong asembli ya? ?Yu yu askem finis long bos blong yu blong i givim spel long yu long taem ya? Yu no mas wet. Yu mas prea long saed ya. Biaen, yu go luk bos blong yu blong askem long hem. (Neh. 2:4, 5) Long sem fasin, yumi no mas wet blong mekem rere ol plan long saed blong transpot, ples blong slip, mo ol narafala samting bakegen. Taem yumi mekem gud ol plan blong yumi olsem, yumi soemaot bigfala tangkiu from ol kakae long saed blong spirit we oli stap long tebol blong Jeova. Ol elda oli mas rere blong givhan long olgeta we oli nidim help blong mekem ol plan blong olgeta, antap moa ol olfala long kongregesen.—Gal. 6:10.
3. ?Wanem ol gudfala fasin we ol man blong Jeova oli mas gat taem oli stap long taon we asembli i stap long hem?
3 Gudfala Fasin i Givim Ona Long God: Taem yumi hivap long ol asembli, ol gudfala fasin blong yumi i givim wan witnes long ol man. ?Wanem samting we yumi mas mekem? Taem yumi stap go long ples blong asembli, olgeta we yumi toktok long olgeta oli mas haremgud long ol gudfala Kristin fasin blong yumi, olsem longfala tingting, kwaet fasin, fasin blong bos long yumi wan, mo fasin blong no mekem i strong long narafala. (Gal. 5:22, 23; Fil. 4:5, NW) Yumi evriwan i mas soemaot trufala lav, olsem nao yumi no ‘save mekem ol fasin we man i sek nogud long hem, mo yumi no save tingbaot yumi nomo, mo yumi no save kros kwik.’ Nating sipos i gat hadtaem no trabol, bambae yumi mekem evri samting blong “leftemap nem blong God.”—1 Kor. 10:31; 13:5, NW.
4. ?Olsem wanem ol papa mama oli save givhan long ol pikinini blong olgeta blong oli gat ol gudfala fasin we oli save givim ona long Jeova?
4 Long taem blong wan asembli, bos blong wan hotel i sapraes tumas blong luk gudfala fasin blong ol yangfala blong yumi mo klos mo hea blong olgeta, nao hem i wantem se “ol Witnes blong Jeova oli kam oltaem long hotel blong hem.” !Hemia i wan samting we yumi save glad from! Hem i soemaot gudfala trening mo wok we yufala ol papa mama i mekem blong lukaotgud long ol pikinini blong yufala. I no waes blong ol papa mama oli letem ol pikinini blong olgeta oli stap olgeta nomo long wan rum blong hotel. Oltaem ol papa mama oli mas lukaot gud long ol pikinini blong olgeta. (Prov. 29:15) !I gud we ol gudfala fasin blong olgeta i givim ona long Jeova mo i mekem hat blong hem i glad!—Prov. 27:11.
5. ?Olsem wanem yumi save givim ona long Jeova tru long ol klos mo hea blong yumi?
5 Klos Mo Hea We i Stret: Wanwan long yumi i save mekem se gudfala fasin i stap long taem blong asembli, sipos yumi no putum ol klos mo mekem hea blong yumi folem ol stael we oli narakaen, oli bitim mak, oli no stret, no oli olbaot nomo. Yumi mas mekem olsem taem yumi stap go mo kambak long ples we asembli i stap long hem, taem yumi stap mekem ol defren wok long ples blong asembli, mo taem yumi stap lesin long asembli. Faswan samting we yumi ol man blong wok blong God yumi wari long hem, hemia blong mekem samting we i leftemap nem blong Jeova, be i no ol samting we yumi wanwan i wantem mo haremgud long hem. Ol hed blong famle oli gat bigfala wok ya blong meksua se oltaem klos mo hea blong famle blong olgeta i no pulum ae blong man mo i no flas.—1 Tim. 2:9.
6. ?From wanem klos mo hea blong yumi i mas stret taem yumi stap spel mo wokbaot afta long asembli?
6 Long en blong dei, taem yumi stap spel long hotel no yumi wokbaot i go long stoa no long restoron, i impoten yet we klos mo hea blong yumi i stret. Sipos yumi go kakae samples afta we asembli i finis long sapa, i stret we yumi werem ol klos we yumi bin werem long dei ya long asembli. Sipos yumi werem baj blong yumi, hemia i save openem rod blong yumi prij long evri ples we yumi go long hem.—2 Kor. 6:3, 4.
7. ?Olsem wanem yumi save givhan blong mekem se i gat oda mo glad long asembli? (Lukluk “Ol Samting Blong Tingbaot Long Taem Blong Distrik Asembli.”)
7 Aesea i talem profet tok ya se: “Hae God i stap sore yet long yufala, mo hem i wantem mekem i gud long yufala. Hem i stap rere yet blong i kaen long yufala.” (Aes. 30:18a) Bigfala tangkiu we yumi gat from fasin sore blong Jeova mo kaengud fasin blong hem i mas pusum yumi blong givim ona long hem tru long ol fasin mo klos blong yumi taem yumi joen wanples long ol asembli. !I gud we Distrik Asembli ya “!Klosap Nao Yumi Fri!” i leftemap nem blong God blong yumi mo i givhan long yumi blong rere from bigfala dei blong hem!
[Bokis blong pija long pej 4]
Ol Samting Blong Tingbaot Long Taem Blong Distrik Asembli
◼ Taem Blong Program: Long trifala dei ya, program bambae i stat long haf pas 9. Doa blong haos asembli bambae i open long 8 klok long moning. Sam minit bifo we asembli i stat, jeaman bambae i sidaon long platfom mo ol Kingdom miusik bambae i stat. Long taem ya, yumi evriwan i mas sidaon rere, nao program i save stat long fasin we i gat oda mo i soem respek. Program bambae i finis long kwota pas faef long Fraede, long faef pas faef long Sarede aftenun, mo long ten pas fo long Sande aftenun.
◼ Paking: From we plante taem ples blong paking i smol, i moagud we plante man oli joen tugeta long wan trak, i bitim we i gat wan no tu man nomo long wan trak.
◼ Blokem Jea: Yu save blokem jea blong olgeta nomo we oli kam long trak blong yu mo olgeta we oli stap long haos blong yu.
◼ Kakae Long Medel Dei: Plis tekem kakae nomo long ples blong asembli no karem kakae i kam, i bitim we yu aot long ples blong asembli long medel dei blong go kakae. Yu save karem kakae long wan smol eski mo putum aninit long jea blong yu. I tabu blong karem ol bigfala eski, ol glas, mo ol dring we i gat alkol long hem.
◼ Presen Mane: Oli spenem plante mane blong mekem rere wan distrik asembli. Yumi save soemaot tangkiu taem yumi givim presen mane long Haos Kingdom blong yumi no long asembli, blong sapotem wok blong yumi long fulwol. Sipos yumi raetem wan jek olsem presen, yumi mas makem nem ya “A.S.T.J.” long hem.
◼ Aksiden Mo Sik: Long sam asembli we oli pas finis, dokta mo olgeta we oli wok long ofis ya oli bin komplen se samfala oli kam singaot olgeta from ol samting we oli no impoten nating. Sipos wan aksiden no wan sik i kamaot long ples blong asembli, plis go talem long man blong welkam we i stap stanap klosap long yu, mo hem bambae i go long ofis blong dokta kwiktaem blong dokta i save luk sipos sikman ya i nidim help kwiktaem. Sipos i nidim, bambae oli singaotem ambulans.
◼ Long Taem Blong Asembli: Ol papa mama oli no mas letem ol pikinini blong olgeta oli ronron olbaot, be oli mas wajemgud olgeta blong meksua se fasin blong olgeta i soemaot se oli obei long God.—Prov. 29:15.
◼ Rikoding: Yu no mas yusum lektrik long ples blong asembli blong rikodem samting, mo sipos yu rikodem ol tok, yu no mas mekem noes we i spolem ol narafala.
◼ Tekem Foto: Sipos yu tekem foto long taem we program i stap gohed, plis yu no mas yusum flas.
◼ Mobael Fon: Yu mas mekem se oli no ring long taem we program i stap gohed blong oli no spolem ol narafala.