Prij—Wan Wok We i Soem Se Yumi Gat Sore
1 Jisas i luk se ol bigfala hip blong man we oli stap lesin long ol tok blong hem, “oli trabol tumas, oli no moa gat paoa, oli olsem ol sipsip we i no gat man blong lukaot long olgeta.” (Mat. 9:36) Wetem kaen fasin mo lav, Jisas i tijim olgeta long ol rod blong Jeova, i mekem oli haremgud, mo i soem sore long olgeta taem hem i givim ol save blong God long olgeta. Taem yumi tingting dip long ol fasin blong Jisas, yumi lanem blong gat tingting mo filing olsem hem, nao yumi soemaot sore long ol man we yumi prij long olgeta.
2 Traem tingbaot samting we Jisas i mekem taem ol man we oli nidim help oli kam luk hem. (Luk 5:12, 13; 8:43-48) Hem i tingbaot olgeta we oli gat spesel nid. (Mak 7:31-35) Hem i kasem save long filing blong ol narafala mo i soemaot se hem i tingbaot olgeta. Hem i no jajem ol man folem ol samting we hem i luk nomo. (Luk 7:36-40) Yes, Jisas i soemaot gud fasin sore we God blong yumi i gat.
3 “Hem i Sore Tumas”: Jisas i no prij from we hemia i wan wok nomo we hem i mas mekem. Hem “i sore tumas” long ol man. (Mak 6:34) Long sem fasin tede, yumi no go prij blong talemaot ol toktok nomo long ol man, be yumi traem blong sevem laef blong olgeta we i sas tumas. Yumi mas traem blong kasem save from wanem ol man oli soem ol defdefren fasin taem yumi prij long olgeta. ?From wanem oli wari mo oli no lesingud? ?Olsem wanem? ?Ol lida blong ol giaman skul oli no lukaot gud long olgeta? ?Oli giaman long olgeta? Sipos yumi intres gud long ol man, hemia i save pulum olgeta blong oli lesin long gud nius.—2 Kor. 6:4, 6.
4 Taem yumi soem sore, yumi save kasem hat blong ol man. Wan stori: Wan woman i harem nogud bitim mak taem hem i lusum smol gel blong hem we i gat tri manis nomo. Taem tu Witnes i go prij long woman ya, hem i singaot tufala i kam insaed. Hem i gat tingting ya se bambae hem i agensem tok we tufala i talem blong soemaot from wanem God i letem ol man oli stap safa. Be sam taem biaen, woman ya i talem se: “Tufala i lesin long mi, tufala i gat bigfala sore, mo taem tufala i lego mi, mi harem gud mo mi agri blong tufala i kambak blong luk mi.” ?Olsem wanem? ?Yu yu traehad blong soem sore long evriwan we yu faenem long wok blong prij?
5 Sipos yumi wokem fasin sore, hemia bambae i givhan long yumi blong leftemap tingting blong ol narafala. Sipos yumi mekem olsem, yumi givim ona long “Papa blong yumi we i gat sore,” Jeova.—2 Kor. 1:3.