Yumi Mas Holem Strong Tingting Blong Prij
1 Evri yia stat long 1992, ol Witnes blong Jeova long fulwol oli spenem bitim wan bilian aoa long wok blong talemaot Kingdom mo pulum ol man oli kam disaepol. !Yumi glad we yumi bin gat janis blong joen long nambawan wok ya!—Mat. 28:19, 20.
2 I tru, yumi mas talem tangkiu long Jeova we hem nao i stap sapotem yumi long wok blong prij mo i givim evri samting we yumi nidim long taem naoia we ‘laef i kam strong tumas.’ (2 Tim. 3:1) ?Wanem samting we yumi mas mekem blong yumi gohed strong long impoten wok ya?
3 Stamba Blong Strong Tingting Ya: From bigfala lav we yumi gat long Jeova mo ol man raonabaot long yumi, mo from we yumi wantem holem promes we yumi mekem taem yumi givim laef blong yumi i go long Jeova, samting ya i pusum yumi blong mekem wok blong Kingdom. (Mat. 22:37-39; 1 Jon 5:3) Lav nao i pulum yumi blong lego sam samting we yumi nomo i wantem blong yumi save joen fulwan long wok blong prij. —Luk 9:23.
4 Yumi Mas Wok Had Blong Holem Strong Tingting: Enemi blong yumi Devel Setan i traehad long evri rod blong mekem yumi slak long wok blong prij. Sam samting we i save mekem tingting blong yumi i foldaon, hemia fasin blong ol man long teritori blong yumi we oli no intres, ol samting blong wol we oli pulum ae mo tingting, ol wari long saed blong laef mo long saed blong helt blong yumi wan.
5 From samting ya, yumi mas wok had blong holem strong tingting we yumi gat. I impoten tumas we yumi wokem ‘lav we yumi bin gat fastaem.’ Hemia i minim se yumi mas ridim mo tingting dip long Tok blong God Baebol evri dei, mo yumi mas yusum evri samting we Jeova i givim long yumi tru long “slef ya we i stret mo waes.”—Rev. 2:4; Mat. 24:45, NW; Sam 119:97.
6 Ol profet tok blong Baebol oli soemaot klia se bigfala dei blong Jeova blong spolem ol rabis man i kam klosap finis. (2 Pita 2:3; 3:10) !Taem yumi stap tingbaot we dei ya i klosap, yumi mas wok had blong holem strong tingting blong prij, mo joen wetem ol brata mo sista long fulwol blong mekem wok blong talemaot Kingdom mo pulum ol man oli kam disaepol, naoia we wok ya i stap gohed yet!