Long Taem Blong Memoriol, ?Bambae Yu Gat Strong Tingting Olsem Jehova Mo Jisas?

1. ?Ol Witnes blong Jehova oli traehad blong mekem wanem long taem blong Memoriol?

¹ Jehova i gat strong tingting blong mekem stamba tingting blong hem i kamtru. Taem Aesea i stap tokbaot sam long ol blesing we Kingdom blong God bambae i mekem, hem i talem se: “Jehova blong ol ami, hem nao i gat strong tingting blong mekem olsem.” (Aes. 9:7, NW) Long sem fasin, taem Jisas i stap long wol ya, hem i gat strong tingting blong leftemap tru wosip. (Jon 2:13-17; 4:34) Evri yia, long taem blong Memoriol, plante taosen Witnes blong Jehova long olgeta ples oli gat strong tingting olsem Jehova mo Jisas, taem oli traehad blong mekem moa long wok blong prij. ?Yu tu bambae yu mekem olsem?

2. ?Strong tingting bambae i pusum yu blong mekem wanem stat long Sarede 7 Maj?

² Seremaot Pepa Blong Memoriol: Long yia ya, wok blong singaot ol man oli kam long Memoriol i stat long Sarede 7 Maj. I gud yu plan naoia blong yu save mekem moa long wok blong prij. Ol kongregesen bambae oli glad tumas taem oli wok strong blong finisim ol teritori blong olgeta. I gud yu mekem wan spesel traehad blong singaot olgeta we yu stadi Baebol wetem olgeta, ol visit, olgeta we oli wok wetem yu, ol famle, mo ol fren long skul. Yu save givim wan pepa blong Memoriol long olgeta, no yu yusum jw.org, blong singaot olgeta.

3. ?Olsem wanem blong mekem moa long wok blong prij long manis Maj mo Eprel?

³ Haftaem Paenia: Sipos yumi gat strong tingting bambae yumi wantem mekem moa long wok blong prij. I sua se plante brata mo sista bambae oli mekem wok blong haftaem paenia long manis Maj mo Eprel, from we oli save kasem 30 aoa nomo. Long famle wosip, no taem yu mekem prapa stadi blong yu, i gud yu prea long Jehova blong i givhan long yu blong yu mekem moa long wok blong prij. (Prov. 15:22) Sipos yu gat strong tingting blong mekem moa long wok blong prij long taem blong Memoriol, samting ya bambae i pulum ol narafala tu blong oli mekem sem mak. Sipos yu jenisim sam samting long laef, blong yu save mekem moa long wok blong prij, yu stap folem fasin blong Jisas blong gat strong tingting.—Mak 6:31-34.

4. ?Wanem blesing i kamaot taem yumi gat strong tingting olsem Jehova mo Jisas?

⁴ Bambae yumi kasem plante blesing long taem blong Memoriol, sipos yumi gat strong tingting olsem Jehova mo Jisas. Plante man bambae oli harem gud nius. Bambae yumi glad from we yumi mekem wok blong Jehova mo yumi givim samting long ol narafala. (Wok 20:35) Be samting we i impoten moa, hemia se bambae yumi mekem Jehova mo Jisas, tufala i glad tumas.