Gohed Blong Prij We Yumi No Kam Slak
1 Samtaem maet yumi harem se yumi stap wokem ol semfala teritori oltaem mo smol man nomo oli intres. Nating se i olsem, i gat plante risen from wanem yumi mas gohed blong prij.—Mat. 28:19, 20.
2 Blong Givim Witnes: Jisas i talem fastaem finis se wok blong talemaot gud nius blong Kingdom i wan impoten haf blong saen ya we i soemaot se yumi stap long “lashaf blong fasin blong laef long wol ya” mo hem i wan wok we i givim ‘witnes long fes blong olgeta man.’ (Mat. 24:3, 14, NW) Taem ol man oli luk we yumi stap talemaot gud nius blong Kingdom samting ya i givim bigfala witnes long olgeta. Nating se oli no wantem lesin long mesej, be afta we yumi lego eria we yumi prij long hem, sam man oli stap tokbaot yumi plante aoa no plante dei. Taem yumi luksave risen from wanem yumi mas prij, samting ya i bambae i halpem yumi blong gohed strong. Taem yumi stap prij blong mekem profet tok blong Baebol i kamtru, blong givim witnes mo blong givim woning long ol man, yumi stap mekem Jeova i glad tumas long yumi.—2 Tes. 1:6-9.
3 Yumi Nidim Blong Gohed Strong: From we i gat fulap samting we i save pulum tingting blong ol man mo mekem se oli spenem moa taem long ol samting ya, yumi nidim strong tingting blong gohed nomo blong traem mekem intres blong olgeta i gru. Ol Witnes blong Jeova oli visitim wan woman evri wik gogo wan yia i pas nao woman ya i jes akseptem ol Witnes blong kam insaed long haos blong hem blong storebaot Baebol. Hem i laekem tumas ol samting we i harem nao hem i akseptem Baebol stadi, hem i stat kam long ol miting mo smol taem biaen i wantem tekem baptaes.
4 From we fasin blong laef i stap jenis kwiktaem, ol man tu oli stap jenisim fasin blong olgeta. Plante man we bifo oli no wantem we ol Witnes oli toktok long olgeta, naoia oli glad blong harem nambawan hop we yumi talemaot long olgeta. Sipos i gat wan nomo long olgeta ya we i akseptem mesej blong Kingdom, traehad blong yumi bambae i no blong nating nomo.
5 Long fulwol, plante plante “man we oli trabol, oli stap harem nogud from ol samting nogud ya we ol narafala man ya oli stap mekem.” (Esik. 9:4) Gudfala frut we i kamaot from wok blong Kingdom we yumi stap mekem i pruvum se olgeta we hat blong olgeta i stret oli stap lesin long mesej blong Kingdom. (Aes. 2:2, 3) From samting ya, yumi mas gohed blong prij we tingting blong yumi i no kam slak mo yumi strong oltaem blong soemaot lav long ol man taem yumi “talemaot gud nius, we i nius blong pis.”—Aes. 52:7; Wok 5:42.