Faswan Wok Blong Yumi
1. ?Olsem wanem Jisas i soemaot se wok blong prij i faswan wok blong hem?
1 Faswan wok blong Jisas, hemia wok blong prij. Hem i hadwok blong wokbaot plante handred kilometa long ol ples long Palestaen, blong prij long ol man we hem i mitim olgeta. Hem i no mekem laef blong hem i fasfas wetem plante samting. Olsem nao, hem i tingting moa long wok blong prij, mo i yusum plante taem long wok ya. (Mat. 8:20) Taem wan bigfala hip blong man oli traem blokem Jisas from we oli wantem se hem i tekemaot sik blong wan famle blong olgeta, hem i talem long olgeta se: “Mi mas talemaot gud nius blong kingdom blong God long ol narafala taon tu, from we God i sanem mi blong mi mekem olsem.”—Luk 4:43, NW.
2. ?From wanem wok blong prij i impoten tumas long tingting blong Jisas?
2 ?From wanem wok blong prij i impoten tumas long tingting blong Jisas? Faswan samting we hem i tingbaot, hemia blong mekem nem blong Jeova i tabu. (Mat. 6:9) Hem i lavem Papa blong hem long heven. From samting ya, hem i glad blong mekem ol samting we Papa blong hem i wantem, mo blong obei long olgeta tok blong hem. (Jon 14:31) Mo tu, Jisas i laekem ol man, i tingbaot olgeta, mo i wantem halpem olgeta.—Mat. 9:36, 37.
3. ?Olsem wanem yumi soemaot se wok blong prij i faswan wok blong yumi?
3 Yumi Mas Folem Fasin Blong Jisas: Maet i no isi blong mekem wok blong prij i kam faswan wok blong yumi, olsem Jisas. Hemia from we yumi mas yusum plante taem blong mekem ol samting we oli joen wetem laef blong yumi long wol ya. Mo tu, plante samting blong wol ya oli save pulum tingting blong yumi mo westem taem blong yumi. (Mat. 24:37-39; Luk 21:34) Taswe, yumi mas lukaot gud blong mekem ol samting we oli moa impoten fastaem. Yumi mas makemaot taem blong rere from wok blong prij, mo yumi mas joen oltaem long wok ya. (Fil. 1:10) Yumi traehad blong folem wan fasin blong laef we i no fasfas wetem plante tumas samting, mo yumi no bitim mak blong mekem ol bisnes long wol ya.—1 Kor. 7:31.
4. ?From wanem wok blong prij i mas faswan wok blong yumi naoia?
4 Sipos i no gat plante taem blong mekem evri samting, man we i waes i mekem samting we i impoten fastaem. Olsem nao, taem hem i harem nius se wan hariken i stap kam, hem i yusum taem mo paoa blong hem blong mekemrere ol samting, blong famle blong hem i save stap sef. Mo hem i givim woning tu long ol man raonabaot long hem. Hem i livim ol wok we oli no impoten oli stap fastaem. Ale, naoia bigfala hariken blong Amagedon i klosap tumas. Smoltaem nomo i stap yet. (Sef. 1:14-16; 1 Kor. 7:29) Yumi mas lukaot gud long fasin blong yumi mo long ol tok we yumi stap tijim ol man long hem, nating se hemia insaed no afsaed long kongregesen. Sipos yumi mekem olsem, yumi save sevem yumi wetem ol man we oli stap lesin long yumi. (1 Tim. 4:16) !Yes, sipos yumi wantem we God i sevem yumi, wok blong prij i mas faswan wok blong yumi!