Yumi “Mas Gat Sore” Long Ol Man
1. ?Tede, plante man oli nidim wanem samting?
1 Tede, plante man oli nidim moa we narafala i gat sore mo i givhan long olgeta. Ol samting long wol ya oli stap kam nogud, i mekem se ol man long olgeta ples long wol oli no moa glad, tingting blong olgeta i foldaon, mo oli harem se laef blong olgeta i nogud tumas. Yes, plante milian man oli wantem we narafala i halpem olgeta. Taswe, yumi ol Kristin, yumi mas soemaot se yumi gat sore long ol man raonabaot long yumi. (Mat. 22:39; Gal. 6:10) ?Yumi save gat sore ya olsem wanem?
2. ?Wanem beswan rod we yumi save gat sore long ol man?
2 Long Wok Blong Prij: God nomo i stamba blong fasin ya blong leftemap tingting blong ol man. (2 Kor. 1:3, 4) Jehova i wantem we yumi folem fasin blong hem, hemia se yumi “mas gat sore” long ol man, mo hem i givim wok long yumi blong go talemaot gud nius blong Kingdom long ol man raonabaot long yumi. (1 Pita 3:8) Kingdom blong God nomo i save mekem ol man we oli stap safa oli harem gud bakegen. Taswe, taem yumi wok strong blong talemaot gud nius, hemia beswan rod blong “mekem ol man we tingting blong olgeta i foldaon olgeta, oli harem gud bakegen.” (Aes. 61:1) From we Jehova i sore long ol man, i no longtaem bambae hem i finisim olgeta rabis fasin, mo i stanemap wan niufala wol we stret fasin nomo i stap long hem.—2 Pita 3:13.
3. ?Yumi save gat sem tingting olsem Jisas olsem wanem?
3 Yumi Gat Sem Tingting Olsem Jisas: Nating se Jisas i stap prij long ol hip man, be hem i no luk olgeta olsem wan grup blong man nomo. Be hem i kasem save se olgeta wanwan oli mas fren gud wetem God. Ol man ya oli olsem ol sipsip we i no gat man blong lukaot long olgeta. Taem Jisas i luk olgeta, hem i sore long olgeta, ale samting ya i pulum hem blong tijim olgeta wetem longfala tingting. (Mak 6:34) Taem yumi gat sem tingting olsem Jisas long saed blong ol man, bambae yumi tu yumi gat sore long olgeta man wanwan. Taem yumi mekem olsem, ol man bambae oli harem save long toktok blong yumi mo bambae oli luksave long fes blong yumi. Wok blong prij i mas faswan samting long laef blong yumi, mo taem yumi toktok long man, yumi mas jenisim tok blong yumi blong mekem se i stret long samting we man i intres long hem.—1 Kor. 9:19-23.
4. ?From wanem yumi mas sore long ol man?
4 Wan bigfala hip blong ol man long olgeta neson oli lesin long gud nius blong Kingdom, mo oli glad taem yumi intres long olgeta. Taem yumi gohed blong gat sore long ol man, bambae yumi leftemap Jehova, God ya blong yumi we i gat sore, mo bambae yumi mekem hem i glad.—Kol. 3:12.