Twelef Risen Blong Prij
?From wanem yumi talemaot gud nius mo yumi mekem Baebol stadi long man? ?Yu ting se yumi mekem wok ya nomo from we yumi mas lidim man i go long rod blong laef? (Mat. 7:14) Long lis we i stap daon, risen namba 1 i talem se wok ya i givhan long ol man blong oli kasem laef. Be i no risen namba 1 nao we i moa impoten. Long olgeta 12 risen ya, ?weswan we yu ting se i moa impoten?
1. Yumi givhan long ol man blong oli kasem laef.—Jon 17:3.
2. Yumi givim woning long ol man nogud.—Esik. 3:18, 19.
3. Yumi mekem ol profet tok blong Baebol oli kamtru.—Mat. 24:14.
4. Yumi soemaot long ol man se fasin blong God i stret. Taem Jehova i spolem ol man nogud, bambae oli no save tok agensem hem se hem i no givim janis long olgeta blong jenisim fasin blong olgeta.—Wok 17:30, 31; 1 Tim. 2:3, 4.
5. Jisas i pemaot olgeta man long blad blong hem. Taem yumi givhan long olgeta blong oli kam fren blong God bakegen, i olsem se yumi pem kaon we yumi gat long olgeta.—Rom 1:14, 15.
6. Yumi no wantem gat fol from ded blong wan man.—Wok 20:26, 27.
7. Yumi mas mekem wok ya sipos yumi wantem we God i sevem yumi.—Esik. 3:19; Rom 10:9, 10.
8. Yumi soemaot we yumi lavem ol man raonabaot long yumi.—Mat. 22:39.
9. Yumi soemaot we yumi obei long Jehova mo Pikinini blong hem, Jisas.—Mat. 28:19, 20.
10. Wok ya i wan haf blong wosip blong yumi.—Hib. 13:15.
11. Yumi soemaot we yumi lavem God.—1 Jon 5:3.
12. Yumi leftemap tabu nem blong God.—Aes. 43:10-12; Mat. 6:9.
I tru se i gat sam narafala risen bakegen we i pusum yumi blong prij. Taem yumi prij, samting ya i mekem bilif blong yumi i strong, mo tu hem i givim janis long yumi blong joen wetem God blong mekem wok blong hem. (1 Kor. 3:9) Be long lis ya, risen blong prij we i moa impoten hemia risen namba 12. Nating se ol man oli no lesin long yumi, yumi gohed nomo blong prij from we yumi wantem leftemap tabu nem blong God, mo yumi wantem we Jehova i givim ansa long Setan we i stap jikim hem. (Prov 27:11) Yes, i gat plante gudfala risen from wanem yumi no mas kam slak blong talemaot gud nius mo mekem Baebol stadi long ol man.—Wok 5:42.