Yu Gat Bigfala Janis Blong Presem Jehova
1. ?Wanem niufala plan ya we bambae i givhan long yumi blong “presem Jehova”?
1 Long manis Maj long yia ya, wan niufala plan i kamaot. Hemia se ol pablisa we oli mekem wok blong haftaem paenia, oli save kasem 30 aoa long manis Maj mo Eprel mo long manis we eria elda i visitim kongregesen blong yufala. Sipos eria elda i visitim yufala tu taem long wan yia, ol pablisa oli save fulumap pepa blong mekem wok blong haftaem paenia long wan long tufala manis ya. Olgeta we oli mekem haftaem paenia long ol manis ya, oli save stap long ful miting ya we eria elda i mekem wetem ol fultaem paenia mo ol spesel paenia. Nating se yumi no naf blong kasem 50 aoa, be fo taem long wan yia yumi save “presem Jehova” yet, taem yumi traehad blong kasem 30 aoa long wok blong haftaem paenia—Sam 109:30; 119:171.
2. ?Olgeta we oli mekem wok blong haftaem paenia long taem blong visit blong eria elda, bambae oli glad from wanem?
2 Long Taem Blong Visit Blong Eria Elda: Naoia plante moa pablisa oli save mekem wok blong haftaem paenia long taem blong visit blong eria elda. Mo oli save lefleftemap tingting blong olgeta, taem oli prij wetem hem. (Rom 1:11, 12) Maet samfala bambae oli glad blong askem long bos blong olgeta, sipos oli save spel wan dei, nao oli save prij wetem eria elda. Olgeta we oli wok fultaem, oli save askem long eria elda sipos oli save prij wetem hem long sarede no sande. Olgeta we oli mekem wok blong haftaem paenia, bambae oli glad tumas blong joen long miting blong ol fultaem paenia mo ol spesel paenia.
3. ?From wanem long manis blong memoriol, i wan nambawan janis blong mekem wok blong haftaem paenia?
3 Long Maj Mo Eprel: Olgeta we oli fulumap pepa blong kasem 30 aoa long manis blong Memoriol tu, i olsem we oli givim moa “sakrefaes” long Jehova. (Hib. 13:15) Long tufala manis ya, Maj mo Eprel, yumi save mekem wok blong haftaem paenia. Hemia wan nambawan janis blong mekem moa long wok blong Jehova. Evri yia, long tufala manis ya, yumi glad blong joen wetem ol brata mo sista, blong singaot ol man oli kam long Memoriol. Antap long hemia, yumi save prij wetem ol defdefren brata mo sista. Afta long Memoriol, yumi save gobak bakegen blong visitim ol man we oli kam, mo yumi save pulum tingting blong olgeta blong kam lesin long spesel tok blong Memoriol tu. !Ating hemia wan nambawan janis blong mekem wok blong haftaem paenia!—Luk 6:45.