Tok Blong God i Stret Gud Blong Tijim Yumi

1. ?Wanem stamba tok blong asembli blong tu dei, mo bambae yumi harem ansa blong wanem kwestin?

¹ Jehova i “Bigfala Tija.” Hem i nambawan tija long heven mo long wol. (Aes. 30:20, 21, NW) ?Jehova i tijim yumi olsem wanem? Hem i givim wan buk we i gud moa i bitim ol narafala buk. Buk ya hemia Tok blong hem, Baebol. ?Olsem wanem ol tijing blong God oli givhan long yumi long saed blong bodi, tingting, filing, mo spirit? Ansa blong kwestin ya bambae i kamaot long asembli blong tu dei long 2014. Stamba tok blong hem i stanap long 2 Timoti 3:16, mo i talem se “Tok Blong God i Stret Gud Blong Tijim Yumi.”

2. ?Wanem ol kwestin we bambae yumi faenem ansa blong olgeta?

² Yu Traem Luk Sipos Yu Save Ansa Long Ol Kwestin Ya: Ol impoten poen blong asembli ya bambae oli kamaot long ansa blong ol kwestin ya:

• ?Tijing blong God i gat paoa long laef blong yumi olsem wanem? (Aes. 48:17, 18)

• Sipos yumi jenisim sam samting long laef blong yumi blong mekem wok blong Jehova fultaem, ?bambae yumi kasem wanem? (Mal. 3:10)

• ?Yumi mas mekem wanem taem yumi harem “ol narafala tijing”? (Hib. 13:9)

• ?Yumi save folem fasin blong Jisas blong tij olsem wanem? (Mat. 7:28, 29)

• ?From wanem olgeta we oli tij long kongregesen oli mas tijim olgeta bakegen? (Rom 2:21)

• ?Tok blong God i stret gud olsem wanem? (2 Tim. 3:16)

• ?Taem Jehova i seksekem olgeta neson, samting ya i mekem wanem long ol man? (Hag. 2:6, 7)

• ?Jehova i trastem yumi olsem wanem? (Efes. 5:1)

• ?From wanem yumi mas wok had blong yumi save stap oltaem long trutok? (Luk 13:24)

3. ?From wanem i impoten we yumi kam lesin long ful program blong asembli ya?

³ Long stat blong 2 Timoti japta 3, jes bifo we Pol i raetem ol tok we i stamba tok blong asembli ya, hem i tokbaot ol samting we bambae oli kamaot long ol las dei. Hem i raetem se: “Ol man nogud wetem ol man blong giaman, bambae oli save gohed blong mekem i mowas olgeta. Bambae oli save giaman moa long ol man, mo olgeta tu oli save bilif long ol giaman toktok blong olgeta bakegen.” (2 Tim. 3:13) Blong ol giaman toktok ya oli no spolem yumi, i impoten we yumi lesin mo yumi mekem ol advaes blong God i wok long laef blong yumi. Taswe, yumi mas mekem tingting blong yumi i strong blong kam lesin long ful program blong asembli ya.