?Faet i Afektem Yumi Olsem Wanem?

Faet i save stat long ples we yu neva ting se bambae i gat faet long hem. Nating se sam man oli laef longwe long ples we i gat faet, be olgeta tu oli safa. Mo afta we wan faet i finis, ol nogud samting we oli kamaot from faet ya oli save stap longtaem. Traem luk sam eksampol:

• 

  Kakae i sot. Ripot blong World Food Programme i talem se: “Bigfala risen from wanem ol man oli sot long kakae, hemia from we i gat faet long ples blong olgeta.”

• 

  Problem blong helt. Taem i gat faet, hemia i save mekem se ol man oli wari bigwan. Mo olgeta we oli laef long ol ples we i gat faet oli save kasem kil long bodi, mo tingting blong olgeta i trabol. Mo plante taem i no gat i naf dokta blong givhan long olgeta.

• 

  Lego ples blong olgeta. Yunaeted Nesen Hae Komisna Blong Ol Refuji, i talem se stat long Septemba 2023, bitim 114 milian man raon long wol oli mas lego ples blong olgeta. Wan long ol bigfala risen, hemia from we i gat faet long ples blong olgeta.

• 

  Problem blong mane. Taem i gat faet, plante taem praes blong ol samting i go antap. Mo taem gavman i spenem moa mane long faet i bitim we i givhan long ol hospital mo edukesen, hemia i mekem ol man oli safa. Antap long hemia, i nidim bigfala mane blong bildim bak ol samting we faet i spolem.

• 

  Problem blong envaeronmen. Ol man oli safa taem faet i spolem ples blong olgeta. Hemia i mekem se oli kasem enikaen sik from we wota mo win i kam doti, mo graon tu i kam nogud. Mo nating se faet i finis, be ol man oli save kasem kil yet from ol bom we oli berem long taem blong faet.